କରୋନା ମହାମାରୀରୁ ରକ୍ଷା ପାଇବା ପାଇଁ ସରକାରଙ୍କ ପକ୍ଷରୁ କିଛି ଗାଇଡଲାଇନ୍ସ ଜାରି କରାଯାଇଛି। ଯେପର୍ଯ୍ୟନ୍ତ ଭ୍ୟାକସିନ୍ ନ ଆସିଛି ସେପର୍ଯ୍ୟନ୍ତ ବାହାରକୁ ବାହାରିଲେ ମୁହଁରେ ମାସ୍କ ପିନ୍ଧିବା, ସାନିଟାଇଜର ବ୍ୟବହାର କରିବା ଓ ସାମାଜିକ ଦୂରତ୍ୱ ରକ୍ଷା କରିବାକୁ ବାଧ୍ୟତାମୂଳକ କରାଯାଇଛି। ହେଲେ ସରକାରଙ୍କ ଏହି ଆଦେଶକୁ ଜଣେ ବ୍ୟକ୍ତି ଏଭଳି ଅନୁକରଣ କରିଛନ୍ତି ଯେ, ଲୋକଙ୍କଠାରୁ ସାମାଜିକ ଦୂରତ୍ୱ ରକ୍ଷା କରିବାକୁ ଯାଇ ସେ ଗଛର ଶୀର୍ଷ ଉପରକୁ ଚଢ଼ିଯାଇଛନ୍ତି। ଏହି ଘଟଣା ଘଟିଛି ଇଂଲଣ୍ଡର ବାଥ୍ରେ। କିଛି ଯୁବକ ବାଥ୍ ସ୍ଥିତ ରୟାଲ ଭିକ୍ଟୋରିଆ ପାର୍କରେ ବୁଲୁଥିବା ସମୟରେ ସେଥିମଧ୍ୟରୁ ଜଣେ ଯୁବକଙ୍କ ଆଖି ଏକ ଗଛ ଉପରେ ପଡ଼ିଥିଲା।
ଯେଉଁଠାରେ କେହି ଜଣେ ବସିଥିବାର ତାଙ୍କୁ ଅନୁମାନ ହୋଇଥିଲା। ଏହାପରେ ସେ ତାଙ୍କ କ୍ୟାମେରାର ଲେନ୍ସକୁ ଜୁମ୍ କରି ଫଟୋ ଉଠାଇଥିଲେ। ଯେଉଁଥିରେ ଜଣେ ଯୁବକ ଜଣଙ୍କ ୬୦ଫୁଟ ଉଚ୍ଚ ଗଛ ଉପରେ ଆରାମ୍ରେ ବସି ସାଣ୍ଡଓ୍ବିଚ ଖାଇବାର ମଜାନେଉଥିବାର ଦେଖିବାକୁ ମିଳିଥିଲା। ଏହାକୁ ଦେଖି ପାର୍କକୁ ଆସିଥିବା ଯୁବକମାନେ ଆଶ୍ଚର୍ଯ୍ୟ ହୋଇଯାଇଥିଲେ ଏବଂ ଏହାର ଏକ ଭିଡିଓ କରିଥିଲେ। ପରେ ଉକ୍ତ ଭିଡ଼ିଓକୁ ଫେସବୁକ୍ରେ ଶେୟାର କରାଯାଇଥିଲା। ଏହି ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବା ସହ ୟୁଜର୍ସମାନେ ମଜାଳିଆ କମେଣ୍ଟ ମଧ୍ୟ ଦେଇଛନ୍ତି। କରୋନା ମୁକାବିଲା ପାଇଁ ଏହା ଭଲ ସାମାଜିକ ଦୂରତ୍ୱ ବୋଲି କେତେକ ୟୁଜର୍ସ କହିଛନ୍ତି। ଅନ୍ୟପଟେ ଏହି ଭିଡିଓ ଶେୟାର ହେବାର ମାତ୍ର କିଛି ସମୟ ମଧ୍ୟରେ ଏହାକୁ ଲକ୍ଷାଧିକ ଲୋକ ଦେଖିଥିବା ବେଳେ ୧୪୩ରୁ ଊର୍ଦ୍ଧ୍ୱ ଲାଇକ୍ସ ଓ ୨୪୩ରୁ ଊର୍ଦ୍ଧ୍ୱ ଶେୟାର କରାଯାଇଥିବା ଜରାପଡ଼ିଛି।
