ଲକ୍ଷ୍ନୌ,୯ା୩: ଉତ୍ତରପ୍ରଦେଶର ରାମପୁର ଜିଲାରେ ସ୍ବାମୀ ଭାଗବଣ୍ଟାକୁ ନେଇ ଏକ ଅଜବ ମାମଲା ସାମ୍ନାକୁ ଆସିଛି। ଏଠାରେ ଜଣେ ପୁରୁଷଙ୍କୁ ଦୁଇଜଣ ମହିଳା ବିବାହ କରିବାକୁ ଚାହୁଁଥିଲେ। ତାଙ୍କର ଦ୍ୱିତୀୟ ବିବାହ ପ୍ରଥମ ସ୍ତ୍ରୀଙ୍କ ସହମତିରେ ହୋଇଥିଲା। ଆଶ୍ଚର୍ଯ୍ୟକର ବିଷୟ ହେଉଛି ଉଭୟ ସଉତୁଣୀଙ୍କ ସହମତିରେ ସ୍ବାମୀ ବି ଭାଗବଣ୍ଟା ହୋଇଛନ୍ତି। ୨ ସ୍ତ୍ରୀଙ୍କ ପାଖରେ ସ୍ବାମୀ ୩ ଦିନ ଲେଖା ରହିବାକୁ ଚୁକ୍ତି ହୋଇଛି। ଏହି ଘଟଣା ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
ଘଟଣାଟି ଉତ୍ତରପ୍ରଦେଶର ରାମପୁର ଜିଲା ଧୋକପୁରୀଟଣ୍ଡା ଅଞ୍ଚଳରେ ଘଟିଛି। ଜଣେ ବିବାହିତ ବ୍ୟକ୍ତି ସୋସିଆଲ ମିଡିଆରେ ଆସାମର ଜଣେ ଯୁବତୀଙ୍କୁ ଭଲ ପାଉଥିଲେ। ଦୁହିଁଙ୍କ ମଧ୍ୟରେ ପ୍ରେମର ଭୂତ ଏପରି ହୋଇଗଲା ଯେ, ଦୁହେଁ ଚଣ୍ଡିଗଡ଼ରେ ଲିଭ୍-ଇନ୍ରେ ରହିଲେ। କିଛି ଦିନପରେ ଯୁବତୀ ଜଣଙ୍କ ଗର୍ଭବତୀ ହୋଇଥିଲେ। ଏଥିରେ ବ୍ୟକ୍ତିଜଣଙ୍କ ଭୟଭୀତ ହୋଇ ଚଣ୍ଡିଗଡ଼ରୁ ନିଜ ଗାଁକୁ ପଳାଇଲେ। ତାଙ୍କ ପ୍ରେମିକା ତାଙ୍କୁ ଖୋଜି ଖୋଜି ଆସି ଗାଁରେ ପହଞ୍ଚିଥିଲେ। ଏହି ସମୟରେ ଘଟଣା ସମସ୍ତଙ୍କ ସାମ୍ନାକୁ ଆସିଥିଲା। ବ୍ୟକ୍ତିଜଣଙ୍କ ପ୍ରଥମ ସ୍ତ୍ରୀଙ୍କ ସହମତି ଦ୍ୱିତୀୟ ବିବାହ କଲେ। ପରେ ଉଭୟ ସ୍ତ୍ରୀ ବିଚାର କଲେ ତାଙ୍କ ସ୍ବାମୀ ସୋମବାର, ମଙ୍ଗଳବାର ଏବଂ ବୁଧବାର ପ୍ରଥମ ସ୍ତ୍ରୀଙ୍କ ସହ ରହିବେ। ସେହିପରି ଗୁରୁବାର, ଶୁକ୍ରବାର ଏବଂ ଶନିବାର ଦ୍ୱିତୀୟ ସ୍ତ୍ରୀଙ୍କ ସହ ରହିବେ। ରବିବାର ସେ ତାଙ୍କ ବୃଦ୍ଧ ମାତାପିତାଙ୍କ ସହ ରହିବେ। ଏଥିରେ ସମସ୍ତେ ରାଜି ହୋଇଥିଲେ। ଏହି ଘଟଣା ଏବେ ଚାରିଆଡ଼େ ଚର୍ଚ୍ଚା ହେଉଛି।
