ଭୁବନେଶ୍ୱର,୧୪।୧୦(ବ୍ୟୁରୋ): ବରିଷ୍ଠ ସାମ୍ବାଦିକ ନବୀନ ଦାସଙ୍କ ବଡ଼ପୁଅ ମନିଷ ଅନୁରାଗଙ୍କ ମୃତ୍ୟୁ ଦିନକୁ ଦିନ ରହସ୍ୟ ଘେରକୁ ଚାଲି ଯାଉଛି। ତଦନ୍ତରେ ନୂଆ ନୂଆ ତଥ୍ୟ ସାମ୍ନାକୁ ଆସୁଛି। ମନିଷଙ୍କର ଦୁଇ ସାଙ୍ଗ ମୃତ୍ୟୁଞ୍ଜୟ ମିଶ୍ର ଓ ଦୀନେଶ ମହାପାତ୍ରଙ୍କୁ ଅଟକ ରଖି ପୋଲିସ ତାଙ୍କୁ ପଚରାଉଚରା କରୁଛି। ତେବେ ଘଟଣାଦିନ ରାତିରେ ଖାଇବା ବିଲ୍କୁ ନେଇ ସେମାନଙ୍କ ମଧ୍ୟରେ ଝଗଡ଼ା ହୋଇଥିବା ଜଣାପଡ଼ିଛି। ପାଟିତୁଣ୍ଡ ହେବା ପରେ ବାର୍ କର୍ତ୍ତୃପକ୍ଷ ମନିଷଙ୍କ ଫୋନକୁ ବନ୍ଧକ ରଖିଥିଲେ। ପରେ ସେ ଘରକୁ ଫୋନ କରି ୩୫ ହଜାର ଟଙ୍କା ଆଣି ବିଲ ଦେଇଥିଲେ। ବିଲ୍ ଦେବା ପରେ ସେ ଏକୁଟିଆ ବାହାରି ଚାଲି ଆସିଥିଲେ। ଏହା ସିସିଟିଭି ଫୁଟେଜରୁ ଜଣାପଡ଼ିଛି।
ସୂଚନାଯୋଗ୍ୟ, ମନୀଷ ଗତ ଶନିବାର ସନ୍ଧ୍ୟାରେ ବିଳମ୍ବିତ ରାତି ପର୍ଯ୍ୟନ୍ତ ଘରକୁ ନ ଫେରିବାରୁ ପରିବାର ଲୋକେ ତାଙ୍କୁ ଫୋନ କରିଥିଲେ। ସେ ସାଙ୍ଗଙ୍କ ସହ ଅଛନ୍ତି ଘଣ୍ଟେ ଭିତରେ ଫେରିବେ ବୋଲି କହିଥିଲେ। କିଛି ଟଙ୍କା ଦରକାର ଥିବାରୁ ମା’ ଫୋନ୍ ପେ ଜରିଆରେ ତାଙ୍କୁ ଦୁଇ ଥରରେ ୮ହଜାର ଟଙ୍କା ପଠାଇଥିଲେ। ଭୋର୍ ୪ଟା ୧୨ରୁ ତାହା ସୁଇଚ୍ ଅଫ୍ ହୋଇଯାଇଥିଲା। ରବିବାର ସକାଳେ ପରିବାର ଲୋକେ ଖୋଜାଖୋଜି କରି ନ ପାଇବାରୁ ଥାନାରେ ଅଭିଯୋଗ କରିଥିଲେ। ପୋଲିସ ଅପହରଣ ମାମଲା ରୁଜୁ କରି ଖୋଜା ଖୋଜି କରିବା ସମୟରେ ଇନ୍ଫୋସିଟି ଛକ ନିକଟରୁ ତାଙ୍କ କାର୍ ମିଳିଥିଲା। ପରେ ଅପରାହ୍ନ ୨ଟାରେ ପାତ୍ରପଡ଼ା ଗାଁ ପୋଖରୀରୁ ତାଙ୍କ ମୃତଦେହ ଭାସୁଥିବା ଅବସ୍ଥାରେ ଜବତ କରି ବ୍ୟବଚ୍ଛେଦ ପରେ ପୋଲିସ ପରିବାର ଲୋକଙ୍କୁ ହସ୍ତାନ୍ତର କରିଥିଲା।
