କେନ୍ଦୁଝର,୧୦ା୯(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଫାଷ୍ଟ ଟ୍ରାକ ବିଚାରପତି ବିଜୟ କୁମାର ମିଶ୍ର ଏକ ନାବାଳିକା ଅପହରଣ ଏବଂ ବଳାତ୍କାର ମାମଲାର ବିଚାର କରି ବଡ଼ ରାୟ ଦେଇଛନ୍ତି। ଏହି ମାମଲାରେ ବେତନଟି ଥାନା ଅନ୍ତର୍ଗତ ଅଭିଯୁକ୍ତ ଶୁଭେନ୍ଦୁ ପ୍ରଧାନ(୩୨)ଙ୍କୁ ଦଫା ୩୬୩/୩୬୬/୩୭୬/(୨)(ଏନ୍)ଓ ପୋସ୍କୋ ଧାରା ୬ ଅନୁସାରେ ୨୦ବର୍ଷ ସଶ୍ରମ କାରାଦଣ୍ତ ସହ ୧୦ହଜାର ଟଙ୍କା ଜରିମନା ଆଦେଶ କରିଛନ୍ତି। ଜରିମନା ଅନାଦେୟ ଅଧିକ ୧ବର୍ଷ ସଶ୍ରମ କାରାଦଣ୍ତ ରାୟ ଶୁଣାଇଛନ୍ତି।
ପ୍ରକାଶ ଥାଉ କି, ୨୦୨୩ ମସିହା ଅପ୍ରେଲ ୧୧ରେ ୧୭ବର୍ଷିୟା ନାବାଳିକା କଲେଜକୁ ପରୀକ୍ଷା ଦେବାକୁ ସକାଳ ୭ଟାବେଳେ ଯାଇଥିଲେ। ଏହି ସମୟରେ ଶୁଭେନ୍ଦୁ ନାବାଳିକାଙ୍କୁ ଅପହରଣ କରିନେଇଥିଲା। ଘରକୁ ନ ଫେରିବା ସହ ନାବାଳିକା ଙ୍କ ସନ୍ଧାନ ନ ମିଳିବାରୁ ପରିବାର ଲୋକେ ପାଟଣା ଥାନାରେ ଅଭିଯୋଗ କରିଥିଲେ। ପୋଲିସ ୬୨/୨୩ରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିବା ସହ ପୀଡିତାଙ୍କୁ ବାଙ୍ଗାଲୋରରୁ ଉଦ୍ଧାର କରିଥିଲା। ସେହି ସମୟରେ ଅଭିଯୁକ୍ତ ଚମ୍ପଟ ମାରିଥିଲେ। ପୀଡିତାଙ୍କ ବୟାନ ଅନୁସାରେ,ଅଭିଯୁକ୍ତ ଜଣଙ୍କ ଜୋରଜବରଦସ୍ତ ତାଙ୍କୁ ଭୟଭୀତ କରାଇ ନାବାଳିକାଙ୍କୁ ଅପହରଣ କରି ବିଭିନ୍ନ ସ୍ଥାନରେ ବଳାତ୍କାର କରିଥିବା ଜଣାପଡିଥିଲା। ଏହି ଘଟଣା କାହା ଆଗରେ ପ୍ରକାଶ କଲେ ଜୀବନରେ ମାରିଦେବାକୁ ଧମକ ଦେଇଥିବାରୁ ପୀଡିତା କାହାର ସାହାର୍ଯ୍ୟ ନେଇ ପାରି ନ ଥିଲେ। ପରେ ଭୁବନେଶ୍ବର ରେଳଷ୍ଟେଶନ ନିକଟରୁ ଅଭିଯୁକ୍ତଙ୍କୁ ପୋଲିସ ଗିରଫ କୋର୍ଟ ଚାଲାଣ କରିଥିଲା। ପୀଡିତା ଅଭିଯୁକ୍ତଙ୍କ ତଳଶ୍ରେଣୀ ଛାତ୍ରୀ ବୋଲି ପୋଲିସ ଜାଣିବାକୁ ପାଇଥିଲେ। ଆଜି କେନ୍ଦୁଝର ଫାଷ୍ଟ ଟ୍ରାକ ବିଚାରପତି ୧୫ଜଣ ସାକ୍ଷୀ ବୟାନ ଓ ପୋଲିସ ତଦନ୍ତ ରିପୋର୍ଟକୁ ଭିତ୍ତି କରି ଅଭିଯୁକ୍ତ ଶୁଭେନ୍ଦୁ ପ୍ରଧାନ ଙ୍କୁ ଉପରୋକ୍ତ ମାମଲାରେ ଦୋଷୀ ସାବ୍ୟସ୍ତ କରି ୨୧ସି ଧାରା ୩୬୩ ରେ ୫ବର୍ଷ କାରାଦଣ୍ତ ସହ ୨ହଜାର ଟଙ୍କା ଜରିମାନା ଅନାଦେୟ ଅଧିକ ୩ମାସ ସଶ୍ରମକାରାଦଣ୍ତ, ୩୬୬ଧାରା ଅନୁସାରେ, ୭ବର୍ଷ ସହ ୫ହଜାର ଟଙ୍କା ଜରିମାନା, ଜରିମାନା ଅନାଦୟ ଅଧିକ ୬ମାସ କାରାଦଣ୍ତ ସହ ୨୧ସି ଧାରା ୩୭୬(୨)(ଏନ) ଓ ପୋକ୍ସୋ ଆଇନର ଧାରା ୬ରେ ୨୦ବର୍ଷ ସଶ୍ରମ କାରାଦଣ୍ତ ସହ ୧୦ହଜାର ଟଙ୍କା କାରାଦଣ୍ତାଦେଶ ଶୁଣାଇଛନ୍ତି। ପୀଡିତାଙ୍କୁ ୫ଲକ୍ଷ ଟଙ୍କା ଅନୁକମ୍ପା ରାଶି ପ୍ରଦାନ ନିମନ୍ତେ ଜିଲା ଆଇନସେବା ପ୍ରାଧିକରଣକୁ ସୁପାରିଶ କରିଛନ୍ତି। ସରକାରଙ୍କ ପକ୍ଷରୁ ସ୍ପେସାଲ ପିପି ଜ୍ଞାନେନ୍ଦ୍ରନାଥ ଜେନା ମାମଲା ପରିଚାଳନା କରୁଥିଲେ।
