ଖମାର, ୨୨।୧୦ (ଡି.ଏନ.ଏ.): ଅନୁଗୋଳ ଜିଲା ପାଲଲହଡ଼ା ବ୍ଲକ ଖମାର ଥାନା ଇଞ୍ଜିଡ଼ ପଞ୍ଚାୟତସ୍ଥିତ ସାଆନ୍ଦା ଗ୍ରାମରେ ଶୁକ୍ରବାର ସକାଳେ ବାଣ ତିଆରିବେଳେ ବିସ୍ଫୋରଣ ଘଟି ଜଣେ କାରିଗରଙ୍କ ମୃତ୍ୟୁ ଓ ୩ ଜଣ ଗୁରୁତର ହୋଇଥିବା ଚର୍ଚ୍ଚା ହେଉଛି। ଏପରି କି ମୃତାହତ ଓ ଘଟଣାସ୍ଥଳର ଫଟୋ ସୋସିଆଲ୍ ମିଡିଆରେ ଘୂରି ବୁଲୁଛି। ତେବେ ମୃତାହତଙ୍କ ପରିଚୟ ମିଳିପାରି ନ ଥିବାବେଳେ ପୋଲିସ ଘଟଣାସ୍ଥଳକୁ ଯାଇଥିଲେ ମଧ୍ୟ ଏ ନେଇ କୌଣସି ସୂଚନା ଦେଉନାହିଁ। ଘଟଣା ସମ୍ପର୍କରେ ତଥ୍ୟ ଦେଉ ନ ଥିବାରୁ ପୋଲିସ ଏହାକୁ ଲୁଚାଇବାକୁ ପ୍ରୟାସ କରୁଥିବା ସାଧାରଣରେ ଆଲୋଚନା ହେଉଛି।
ସୋସିଆଲ ମିଡିଆରେ ହେଉଥିବା ଚର୍ଚ୍ଚା ଅନୁଯାୟୀ, ସକାଳ ୮ଟାରେ ଗଁାର ଜଣେ ବ୍ୟକ୍ତି ନିଜ ଘରେ ଦୀପାବଳିରେ ବ୍ୟବସାୟ ପାଇଁ ବାଣ ପ୍ରସ୍ତୁତ କରୁଥିଲେ। ତାଙ୍କ ସହ ଅନ୍ୟ ୩ଜଣ ମଧ୍ୟ ବାଣ ଭିଡ଼ୁଥିଲେ। ହେଲେ କୌଣସି କାରଣରୁ ବାଣ ବିସ୍ଫୋରଣ ହେବାରୁ ଘଟଣାସ୍ଥଳରେ ଜଣଙ୍କ ମୃତ୍ୟୁ ହୋଇଯାଇଥିଲା। ଅନ୍ୟ ୩ଜଣ ଗୁରୁତର ହୋଇଥିଲେ। ସେମାନଙ୍କୁ ପ୍ରଥମେ ଖମାର ମେଡିକାଲରେ ଭର୍ତ୍ତି କରାଯାଇଥିଲା। ସେଠାରୁ ଗୁରୁତରଙ୍କୁ ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟ ପଠାଇ ଦିଆଯାଇଥିଲା। ଖବରପାଇ ଅପରାହ୍ନ ୩ଟା ବେଳେ ଖମାର ପୋଲିସ ଗଁାରେ ପହଞ୍ଚିଥିଲା। ହେଲେ ତଦନ୍ତ ସମ୍ପର୍କରେ କୌଣସି ସୂଚନା ଥାନାରୁ ମିଳିପାରୁ ନାହିଁ। ଥାନା ଅଧିକାରୀ ପ୍ରଶାନ୍ତ ପଢିହାରୀ କହିଛନ୍ତି, ଘଣାସ୍ଥଳକୁ ଯାଇଥିଲେ ବି ମୃତ କି ଆହତ, କାହାକୁ ମଧ୍ୟ ଠାବ କରାଯାଇପାରି ନାହିଁ।
