କୋଲକାତା, ୧୯।୫ : କଡ଼ା ଆଭିମୁଖ୍ୟ ଗ୍ରହଣ କରି ତୃଣମୂଳ କଂଗ୍ରେସ(ଟିଏମସି) ଅଧ୍ୟକ୍ଷା ତଥା ମୁଖ୍ୟମନ୍ତ୍ରୀ ମମତା ବାନାର୍ଜୀ ଦଳର ନେତାମାନଙ୍କୁ ଚେତାବନୀ ଦେଇଛନ୍ତି। ସେ କହିଛନ୍ତି ଯେ କୌଣସି ଦୁର୍ନୀତିକୁ ସହ୍ୟ କରାଯିବ ନାହିଁ । ଦୁର୍ନୀତିରେ ଲିପ୍ତ ଥିବା ନେତାଙ୍କୁ ତୁରନ୍ତ ଦଳରୁ ବହିଷ୍କାର କରାଯିବ। ମେଦିନାପୁର କଲେଜ ଗ୍ରାଉଣ୍ଡରେ ଏକ ଦଳୀୟ ସଭାକୁ ସମ୍ବୋଧିତ କରି ମମତା କହିଛନ୍ତି, ମୁଁ ତୃଣମୂଳ ପ୍ରତିଷ୍ଠା ଭାରତର ସର୍ବୋତ୍ତମ ଦଳ ଭାବେ ପରିଣତ କରିବା ସ୍ବପ୍ନ ନେଇ କରିଥିଲି। ସେଥିପାଇଁ ମୁଁ ଦୁର୍ନୀତିକୁ ସହ୍ୟ କରିବି ନାହିଁ।
ଦଳରେ କେହି ଅପରିହାର୍ଯ୍ୟ ନୁହଁନ୍ତି। ଯଦି ମୁଁ ଦୁର୍ନୀତିରେ ଜଡିତ ଥିବା ବିଷୟରେ ଶୁଣେ, ତେବେ ମୁଁ ସମ୍ପୃକ୍ତ ବ୍ୟକ୍ତିଙ୍କୁ ପାଞ୍ଚ ମିନିଟ ମଧ୍ୟରେ ଦଳରୁ ବାହାର କରିଦେବି । ତୃଣମୂଳ ସ୍ତରରେ ଦଳର କର୍ମୀଙ୍କୁ ଆମି ନୋଇ, ଆମରା (ମୁଁ ନୁହେଁ, ଆମେ)’ କହିବା ପାଇଁ ନିର୍ଦ୍ଦେଶ ଦେଇ ଟିଏମସି ଅଧ୍ୟକ୍ଷା କହିଛନ୍ତି ଯେ ଦଳର ନେତାମାନେ ଏକାଠି କାମ କରିବା ଉଚିତ। କୌଣସି ଜିଲାକୁ ପ୍ରଶାସନିକ ବୈଠକ ପାଇଁ ଗଲେ, ସେଠାରେ ବୁଥ ସ୍ତରୀୟ ଦଳର କର୍ମୀଙ୍କୁ ମଧ୍ୟ ଭେଟିବେ ବୋଲି ସେ କହିଛନ୍ତି। ଭୂମିରେ ବସିଥିବା କର୍ମୀମାନେ ହିଁ ବଡ, ମଞ୍ଚରେ ବସିଥିବା ଲୋକେ ନୁହଁନ୍ତି।
ଆସନ୍ତା ପଞ୍ଚାୟତ ନିର୍ବାଚନରେ ବୁଥ ସ୍ତରର କର୍ମକର୍ତ୍ତାଙ୍କ ଗୁରୁତ୍ୱ ଉପରେ ଆଲୋକପାତ କରି ମମତା କହିଛନ୍ତି ଯେ ବିଧାନସଭା ନିର୍ବାଚନ ତଥା ପୌରସଂସ୍ଥା ନିର୍ବାଚନରେ ପୁନର୍ବାର ବିଜୟ ସତ୍ତ୍ୱେ ଟିଏମସିର ତୃଣମୂଳ ସ୍ତରର କର୍ମକର୍ତ୍ତା ଟିକେଟ ବଣ୍ଟନରେ ଅସନ୍ତୋଷ ପ୍ରକାଶ କରିଛନ୍ତି। ଅନେକ ପାର୍ଟି କାଉନସିଲର ଯେଉଁମାନେ ଟିକେଟ ପାଇନଥିଲେ, ସ୍ବାଧୀନ ଭାବରେ ପ୍ରତିଦ୍ୱନ୍ଦ୍ୱିତା କରିଥିଲେ ଏବଂ ସେମାନଙ୍କ ମଧ୍ୟରୁ କେତେକଙ୍କୁ ଦଳରୁ ବହିଷ୍କାର କରାଯାଇଥିଲା। ଲୋକଙ୍କ ପାଇଁ କାମ କରିବାକୁ ଦଳର ନେତାମାନଙ୍କୁ ନିବେଦନ କରି ମମତା କହିଛନ୍ତି ଯେ ଆମେ ଆମର କାର୍ଯ୍ୟକଳାପ ଦ୍ୱାରା ନେତା ହୋଇଥାଉ। ମୁଁ କାର୍ଯ୍ୟ କରୁଥିବା ନେତାମାନଙ୍କୁ ପସନ୍ଦ କରେ। ଆମକୁ ସାଧାରଣ ଲୋକଙ୍କ ପାଇଁ ଅକ୍ଲାନ୍ତ ପରିଶ୍ରମ କରିବାକୁ ପଡିବ ଏବଂ ସାଧାରଣ ଲୋକଙ୍କୁ ସାହାଯ୍ୟ କରିବାକୁ ପଡିବ। ପ୍ରକୃତ ନେତା ଲୋକଙ୍କ ସହିତ ଛିଡା ହୁଅନ୍ତି ବୋଲି ସେ କହିଛନ୍ତି।
ଏହା ସହିତ ମମତା ଝିଇମାନଙ୍କୁ ଆଗକୁ ଆସି ପଞ୍ଚାୟତ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଆହ୍ବାନ ଦେଇଥିଲେ। ସେ କହିଛନ୍ତି ଯେ ଆଗେଇ ଆସି ଗାଁରେ କାମ କରିବା ଉଚିତ। ଅଧିକରୁ ଅଧିକ ମହିଳା ଆମ ଦଳରେ ଅନ୍ତର୍ଭୁକ୍ତ ହେବା ଆବଶ୍ୟକ। ସେହିଭଳି ଛାତ୍ର ଓ ଯୁବକମାନେ ଦଳର ଭବିଷ୍ୟତ ହୋଇଥିବାରୁ ଆଗକୁ ଆସିବା ଜରୁରୀ। ତାଙ୍କ ସରକାରର ୧୧ ବର୍ଷ ପୂରଣ ହେବା ଅବସରରେ ମେଦିନାପୁରର ଲୋକଙ୍କୁ ଧନ୍ୟବାଦ ଜଣାଇ ମମତା କହିଛନ୍ତି ଯେ ଏହି ଅଞ୍ଚଳ ହେଉଛି ସଂଗ୍ରାମରର ସ୍ଥାନ, ଏହା ବିପ୍ଳବୀଙ୍କ ମାଟି। ମୁଁ ଅଗଷ୍ଟ ୯ ରେ ଏଠାକୁ ପୁଣି ଆସିବି ବୋଲି ମମତା କହିଛନ୍ତି।