କୋଲକାତା,୬ା୬:ପଶ୍ଚିମବଙ୍ଗ ବିଧାନସଭା ନିର୍ବାଚନରେ ପରାଜୟ ପରେ ତୃଣମୂଳ କଂଗ୍ରେସ (ଟିଏମ୍ସି)ରେ ମମତା ବାନାର୍ଜୀଙ୍କ ସ୍ଥିତି ଦିନକୁ ଦିନ ଖରାପ ହେବାରେ ଲାଗିଛି। ପୂର୍ବରୁ ସେ ଡାକିଥିବା ଏକ ବୈଠକରେ ୮୦ ଜଣ ଦଳୀୟ ବିଧାୟକଙ୍କ ମଧ୍ୟରୁ ମାତ୍ର ୨୦ ଜଣ ଯୋଗ ଦେଇଥିଲେ। ପୂର୍ବତନ ମୁଖ୍ୟମନ୍ତ୍ରୀ ମମତାଙ୍କ କାଳୀଘାଟସ୍ଥିତ ବାସଭବନରେ ଶୁକ୍ରବାର ଅନୁଷ୍ଠିତ ବୈଠକରେ ମାତ୍ର ୮ ବିଧାୟକ ସାମିଲ ହୋଇଛନ୍ତି। ଟିଏମ୍ସି ବିଦ୍ରୋହର ସମ୍ମୁଖୀନ ହୋଇଥିବାବେଳେ ଏହାକୁ ଏଡ଼ାଇବାକୁ ଯାଇ ଏହା ଦଳର ଜାତୀୟ କାର୍ଯ୍ୟକାରିଣୀ ବୈଠକ ହୋଇଥିବାରୁ ସବୁ ବିଧାୟକ ଏବଂ ଏମ୍ପିଙ୍କୁ ଡକାଯାଇ ନ ଥିଲା ବୋଲି କୁହାଯାଇଛି। ଦଳର ୨୮ ଲୋକ ସଭା ସଦସ୍ୟଙ୍କ ମଧ୍ୟରୁ ୬ ଜଣ ଏବଂ ୧୩ ରାଜ୍ୟ ସଭା ସଦସ୍ୟଙ୍କ ମଧ୍ୟରୁ ୨ ଜଣ ଉପସ୍ଥିତ ଥିଲେ।
ଟିଏମ୍ସି ଗଢ଼ାଯିବାର ୨୮ ବର୍ଷ ମଧ୍ୟରେ ପ୍ରଥମ ଥର ବିଦ୍ରୋହର ସମ୍ମୁଖୀନ ହୋଇଛି। ମମତା ଶୁକ୍ରବାର ଦଳର ସାଂଗଠନିକ ସ୍ତରରେ ବଡ଼ ପରିବର୍ତ୍ତନ କରିଛନ୍ତି। ଦଳୀୟ କାର୍ଯ୍ୟକର୍ତ୍ତା ଭାବେ ସେ ଅନୁଗତ ଏବଂ ବର୍ଷୀୟାନ ନେତାମାନଙ୍କୁ ନେଇଛନ୍ତି। ଦଳରେ ନିଜ କର୍ତ୍ତୃତ୍ୱକୁ ସୁଦୃଢ଼ କରିବା ପାଇଁ ମମତା ସାଂଗଠନିକ ପରିବର୍ତ୍ତନ କରିଥିବା କୁହାଯାଉଛି। ଅଭିଷେକ ବାନାର୍ଜୀ ଦଳର ରାଷ୍ଟ୍ରୀୟ ସାଧାରଣ ସମ୍ପାଦକ ପଦ ବଜାୟ ରଖିଥିବାବେଳେ ରାଜ୍ୟ ସଭା ସଦସ୍ୟ ଡେରେକ୍ ଓ’ବ୍ରାଏନ୍ ଏବଂ ଡୋଲା ସେନ୍ ଯୁଗ୍ମ ସମ୍ପାଦକ ହୋଇଛନ୍ତି। ୨ ଦିନ ପୂର୍ବରୁ ୫୮ ବିଦ୍ରୋହୀ ଖୋଲାଖୋଲି ବିଦ୍ରୋହ ଘୋଷଣା କରିବା ସହ ବହିଷ୍କୃତ ବିଧାୟକ ରୀତାବ୍ରତ ବାନାର୍ଜୀଙ୍କୁ ବିଧାନସଭାରେ ବିରୋଧୀ ଦଳ ନେତା କରିଥିଲେ। ଏହି ଘଟଣା ପରେ ମମତା ଦଳର ସମସ୍ତ କମିଟି ଓ ଛାମୁଆ ସଂଗଠନକୁ ଭଙ୍ଗ କରିଥିଲେ।