ନୂଆଦିଲ୍ଲୀ, ୬।୮ : ପଶ୍ଚିମବଙ୍ଗର ବିରୋଧୀଦଳର ନେତା ଶୁଭେନ୍ଦୁ ଅଧିକାରୀ ରାଜ୍ୟ ଯୋଜନା ଅନ୍ତର୍ଗତ ଗ୍ରହଣ କରାଯାଇଥିବା ଅର୍ଥର ଅପବ୍ୟବହାର ଏବଂ ହେରଫେର ହୋଇଥିବା ଅଭିଯୋଗ କରିଛନ୍ତି। ସେ ଶନିବାର ଟୁଇଟ କରି କହିଛନ୍ତି, କେନ୍ଦ୍ର ଗ୍ରାମ୍ୟ ଉନ୍ନୟନ ମନ୍ତ୍ରଣାଳୟ ଦ୍ୱାରା କେନ୍ଦ୍ର ସରକାରଙ୍କ ପ୍ରତ୍ୟେକ ଯୋଜନା ପାଇଁ ଆବଣ୍ଟିତ ଅର୍ଥର ଅପବ୍ୟବହାର କରିବା ମୁଖ୍ୟମନ୍ତ୍ରୀ ମମତା ବାନାର୍ଜୀ ସରକାରଙ୍କ ଏକ ଟ୍ରେଡ ମାର୍କ ପାଲଟିଛି।
ରାଜ୍ୟରେ ଘଟୁଥିବା ଏହି ବଡ ଦୁର୍ନୀତି ପ୍ରତି ମୁଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଏ ବାବଦରେ ଏକ ଚିଠି ଲେଖିଛି ବୋଲି ସେ କହିଛନ୍ତି। ଶୁଭେନ୍ଦୁ ଅଧିକାରୀ କହିଛନ୍ତି ଯେ ପଶ୍ଚିମବଙ୍ଗର ତୃଣମୂଳ କଂଗ୍ରେସ ସରକାର ଅମ୍ଫନ ଏବଂ ୟାସ ଭଳି ପ୍ରାକୃତିକ ବିପର୍ଯ୍ୟୟ, କୋଭିଡ ମହାମାରୀ ଭଳି ସ୍ବାସ୍ଥ୍ୟ ବିପର୍ଯ୍ୟୟରେ କେନ୍ଦ୍ରୀୟ ଯୋଜନା ଅନ୍ତର୍ଗତ ରାଜ୍ୟକୁ ଆସିଥିବା ସହାୟତାକୁ ହଡ଼ପ କରିଛନ୍ତି।
ଭାଜପା ନେତା ଶୁଭେନ୍ଦୁ କହିଛନ୍ତି ଯେ ବର୍ତ୍ତମାନର ପଶ୍ଚିମବଙ୍ଗ ସରକାର ମନେରଗା ଟଙ୍କାର ହରଫେର କରିଛନ୍ତି। ଅର୍ଥର ଅପବ୍ୟବହାର କରିବା ଲାଗି ଚାରା ରୋପଣ ଭଳି ଏକ ନୂତନ ଉପାୟ ଆପଣାଯାଇଛି। ରାଜ୍ୟ ସରକାର ସୁନ୍ଦରୀଗଛ ଚାରା ଅବା ଫଳ ଗଛ ଚାରା ଲଗାଇବା ନାମରେ କେନ୍ଦ୍ରୀୟ ଯୋଜନାର ପାଣ୍ଠିରୁ କୋଟି କୋଟି ଟଙ୍କା ଠକେଇ କରୁଛନ୍ତି। ଯାଞ୍ଚ ସମୟରେ ଅଧିକାରୀମାନେ କହିଛନ୍ତି ଯେ ବାତ୍ୟାରେ ଚାରାଗୁଡ଼ିକ ନଷ୍ଟ ହୋଇ ଯାଇଛି।
ପ୍ରଧାନମନ୍ତ୍ରୀ ମୋଦିଙ୍କୁ ଲେଖିଥିବା ଚିଠିରେ ସେ କହିଛନ୍ତି ଯେ ରାଜ୍ୟରେ ଯୋଜନାବଦ୍ଧ ଭାବେ କେନ୍ଦ୍ରୀୟ ଯୋଜନାଗୁଡ଼ିକର ମୂଳ ନାମ ପରିବର୍ତ୍ତନ କରାଯାଇଛି। କେନ୍ଦ୍ରୀୟ ଯୋଜନା ପାଇଁ ରାଜ୍ୟର ତୃଣମୂଳ ସରକାର ତାଙ୍କର ନାମ ବ୍ୟବହାର କରୁଛନ୍ତି। ପ୍ରଧାନ ମନ୍ତ୍ରୀ ଗ୍ରାମ୍ୟ ସଡ଼କ ଯୋଜନାକୁ ଗ୍ରାମୀଣ ସଡ଼କ ଯୋଜନା ଭାବରେ ନାମିତ କରାଯାଇଛି। କୋଭିଡ ମହାମାରୀ ଲଢ଼େଇ ସମୟରେ ଯନ୍ତ୍ରପାତି କ୍ରୟରେ ପ୍ରାୟ ୨୦୦୦ କୋଟି ଟଙ୍କା ଠକେଇ ହୋଇଛି।
ତାହାର ସଠିକ ଅନୁସନ୍ଧାନ ହେବା ଉଚିତ ବୋଲି ସେ ଚିଠିରେ ଉଲ୍ଲେଖ କରିଛନ୍ତି। ପଶ୍ଚିମବଙ୍ଗରେ ବିଭିନ୍ନ କେନ୍ଦ୍ରୀୟ ପ୍ରାୟୋଜିତ ଯୋଜନାରେ ବିଶେଷ କରି ମନରେଗା, ପ୍ରଧାନ ମନ୍ତ୍ରୀ ଆବାସ ଯୋଜନା ଏବଂ ପ୍ରଧାନ ମନ୍ତ୍ରୀ ଗ୍ରାମ୍ୟ ସଡ଼କ ଯୋଜନା ଇତ୍ୟାଦିରେ ବହୁ ଦୁର୍ନୀତିର ପ୍ରର୍ଦ୍ଦାଫାଶ୍ ପ୍ରକାଶ ପାଉଛି। ଏହା ଏକ ଜଣାଶୁଣା ସତ୍ୟ ଯେ, ମନରେଗା ଅଧୀନରେ ହୋଇଥିବା କାର୍ଯ୍ୟଗୁଡ଼ିକୁ କାର୍ଯ୍ୟକାରୀ ନକରି ମିଥ୍ୟା ଦେୟ ପ୍ରମାଣପତ୍ର ପଠାଯାଇଥିଲା। କୋଟି କୋଟି ଟଙ୍କା ଠକିବା ପାଇଁ ମନରେଗା ପାଣ୍ଠି ଅପବ୍ୟବହାର କରାଯାଉଛି ବୋଲି ସେ ଅଭିଯୋଗ କରିଛନ୍ତି।
