କୋଲକାତା,୧୪ ।୩: ପଶ୍ଚିମବଙ୍ଗ ସମେତ ୪ ରାଜ୍ୟରେ ବିଧାନସଭା ନିର୍ବାଚନ ପାଇଁ ତାରିଖ ଘୋଷଣା ସରିଛି । ଏବେ ସମସ୍ତ ରାଜନୈତିକ ଦଳ ବିଜୟ ଲକ୍ଷ୍ୟରେ ନିଜର ସମସ୍ତ ଶକ୍ତି ଲଗାଇ ପ୍ରଚାର କାର୍ଯ୍ୟରେ ବ୍ୟସ୍ତ ହୋଇଗଲେଣି । ତେବେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ନାମାଙ୍କନ ପତ୍ର ଦାଖଲ ସମୟରେ ଆକ୍ରମଣର ଶିକାର ହୋଇ ଏବେବି ଅସୁସ୍ଥ ଅଛନ୍ତି । ଏହାପରେ ବି ସେ ରବିବାର ହ୍ୱିଲ ଚେୟାରରେ ବସି ମେଗା ରୋଡ ଶୋ’ କରିବେ ବୋଳି ଜଣାପଡିଛି । ଏହାପରେ କୋଲକାତାରେ ଏକ ସଭାରେ ବି ଯୋଗଦେବେ । ଅନ୍ୟପଟେ ଭାରତୀୟ ଜନତା ପାର୍ଟି(ଭାଜପା) ବି ପ୍ରଚାର ପାଇଁ ଅଣ୍ଟା ଭିଟି ସାରିଲାଣି । ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହା ରବିବାରଠାରୁ ପଶ୍ଚିମବଙ୍ଗକୁ ଦୁଇ ଦିନିଆ ଗସ୍ତରେ ଆସିବେ । ସେପଟେ ପ୍ରତିରକ୍ଷାମନ୍ତ୍ରୀ ରାଜନାଥ ସିଂ ଆସାମରେ ୩ ରାଲି କରିବେ । ପଶ୍ଚିମବଙ୍ଗରେ ଶାସକ ତୃଣମୂଳ କଂଗ୍ରେସ ୧୭ ମାର୍ଚ୍ଚରେ ତା’ର ନିର୍ବାଚନ ଘୋଷଣା ପତ୍ର ଜାରି କରିବ ବୋଲି ଅନୁମାନ କରାଯାଉଛି ।
