ଖମାର,୨୦।୪(ଡି.ଏନ.ଏ.)- ପାଲଲହଡ଼ା ଉପଖଣ୍ଡରେ ୨୨ ତାରିଖରେ ହେବାକୁ ଥିବା ମାଲ୍ୟଗିରି ମହୋତ୍ସବ ପାଇଁ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି। ମଙ୍ଗଳବାର ପାଲଲହଡ଼ା ଉପଜିଲାପାଳଙ୍କ ସମ୍ମିଳନୀ କକ୍ଷରେ ମହୋତ୍ସବର ଅଧ୍ୟକ୍ଷ ତଥା ବିଧାୟକ ମୁକେଶ ପାଳ ଖବରଦାତାମାନଙ୍କୁ ଏ ନେଇ ସୂଚନା ଦେଇଛନ୍ତି। ଅନ୍ୟମାନଙ୍କ ମଧ୍ୟରେ ମହୋତ୍ସବ ଆବାହକ ଉପଜିଲାପାଳ ଅଜିତ କୁମାର ପ୍ରଧାନ, ତହସିଲଦାର ଲମ୍ବୋଦର ମାରାଣ୍ଡି, ଗୋଷ୍ଠୀ ଉନ୍ନୟନ ଅଧିକାରୀ ଦିଲୀପ କୁମାର ବାଡା, ପଞ୍ଚାୟତ ସମିତି ଅଧ୍ୟକ୍ଷା ରୀନାରାଣି ନାଏକ, ନବକିଶୋର ନାଏକ ଏବଂ କୋଷାଧକ୍ଷ ଜଳଧର ମହାନ୍ତି ପ୍ରମୁଖ ଉପସ୍ଥିତ ଥିଲେ।
ସୂଚନା ଅନୁଯାୟୀ, ଆସନ୍ତା ୨୦ ତାରିଖ ସକାଳ ସାଢେ ୬ଟାରେ ଉପଖଣ୍ଡର ୬ଗୋଟି ସ୍ଥାନରୁ ମଶାଲ ଶୋଭାଯାତ୍ରା ବାହାରିବ। ଖୁଲୁଡ଼ି ଗିରିଶ୍ୱର ମନ୍ଦିର, ରଜଡ଼ଙ୍ଗ ଶିବମନ୍ଦିର, ମଗରମୁହାଣ, ପବିତ୍ରପୁର, ମାଲ୍ୟଗିରି ପାହାଡର ଶିଖର ମଠରୁ ମଶାଲ ଅଣାଯାଇ ଜଗନ୍ନାଥ ମନ୍ଦିରରେ ୨୨ ତାରିଖ ପର୍ଯ୍ୟନ୍ତ ରଖାଯିବ। ୨୨ ତାରିଖ ଅପରାହ୍ନ ୪ଟାରେ ଜଗନ୍ନାଥ ମନ୍ଦିରରୁ ମଶାଲକୁ ଶୋଭାଯାତ୍ରାରେ ମା’ କୁଣ୍ଢେଇବିରାଙ୍କ ନିକଟକୁ ନିଆଯାଇ ପୂଜାର୍ଚ୍ଚନା କରାଯିବ। ପରେ ଷ୍ଟାଡିୟମକୁ ନିଆଯାଇ ମହୋତ୍ସବକୁ ଉଦ୍ଘାଟନ କରାଯିବ। ସା ୭ଟାରେ ମହୋତ୍ସବ କମିଟି ଅଧ୍ୟକ୍ଷ ମୁକେଶ କୁମାର ପାଳଙ୍କ ଅଧ୍ୟକ୍ଷତାରେ ଓଡ଼ିଶା ବିଧାନସଭାର ଉପବାଚସ୍ପତି ରଜନୀକାନ୍ତ ସିଂହ ଏହାକୁ ଉଦ୍ଘାଟନ କରିବେ। ସମ୍ମାନିତ ଅତିଥି ଭାବେ ଢେଙ୍କାନାଳ ଏମ୍ପି ମହେଶ ସାହୁ ଓ ଆଠମଲ୍ଲିକ ବିଧାୟକ ରମେଶ ଚନ୍ଦ୍ର ସାଏ ଯୋଗଦେବାର କାର୍ଯ୍ୟକ୍ରମ ରହିଛି I ମନୋରଞ୍ଜନ କାର୍ଯ୍ୟକ୍ରମରେ ରାଜ୍ୟସ୍ତରୀୟ ଓଡ଼ିଶୀ ନୃତ୍ୟ, ଗୋଟିପୁଅ ନୃତ୍ୟ, ୨୩ ତାରିଖରେ ଯୋଡିଶଙ୍ଖ ଓ ଘୁମୁରା ନୃତ୍ୟ, ୨୪ ତାରିଖରେ ସମ୍ବଲପୁରୀ, ପାଇକ ଆଖଡ଼ା ପରିବେଷଣ କରାଯିବ। ପ୍ରତ୍ୟେକ ଦିନ ଜିଲାସ୍ତରୀୟ ୩ଗୋଟି ଲୋକକଳା ଏବଂ ଉପଖଣ୍ଡ ଭିତରୁ ୭ଗୋଟି ଦଳ କଳା ପ୍ରଦର୍ଶନ କରିବେ। ସେହିପରି ଓଲିଉଡ୍ ଗାୟକ ଅଭିଜିତ ମଜୁମଦାର ମଧ୍ୟ ଯୋଗଦେଇ ସଙ୍ଗୀତ ପରିବେଷଣ କାର୍ଯ୍ୟକ୍ରମ ରହିଛି। ୨୩ ତାରିଖରେ ଜିଲାପାଳ ଓ ଆରକ୍ଷୀ ଅଧୀକ୍ଷକ, ୨୪ ତାରିଖରେ ମୁଖ୍ୟ ଅତିଥି ଭାବେ ଖଣି ମନ୍ତ୍ରୀ ପ୍ରଫୁଲ୍ଲ କୁମାର ମଲ୍ଲିକ ଓ ସମ୍ମାନିତ ଅତିଥି ଭାବେ ଏମ୍ପି ମହେଶ ସାହୁ, ତାଳଚେର ଓ ଛେଣ୍ଡିପଦା ବିଧାୟକ ଯୋଗଦେବେ ବୋଲି ସ୍ଥିର ହୋଇଛି। ପଲ୍ଲିଶ୍ରୀ ମେଳା ସହ ମୀନାବଜାର ଖୋଲାଯିବା ବୋଲି ମହୋତ୍ସବ କମିଟି ଅଧ୍ୟକ୍ଷ ପାଳ ପ୍ରକାଶ କରିଛନ୍ତି।
