ମାଲକାନଗିରି,୧୩ା୧୦ (ଡି.ଏନ୍.ଏ.): ଓଡ଼ିଶା ଏବଂ ତେଲଙ୍ଗାନା ସରକାରଙ୍କ ଦାବି ପରେ ଓଡ଼ିଶାର ମାଲକାନଗିରିଠାରୁ ତେଲଙ୍ଗାନାର ଭଦ୍ରାଚଳମ୍ ପର୍ଯ୍ୟନ୍ତ ରେଳଲାଇନ ସମ୍ପ୍ରସାରଣ ନିମନ୍ତେ ରେଲ୍ଓ୍ବେ ପକ୍ଷରୁ ବଜେଟରେ ୨୮୦୦ କୋଟି ଟଙ୍କା ମଞ୍ଜୁର ହୋଇଥିଲା। ତେଲଙ୍ଗାନା ପକ୍ଷରୁ ସର୍ଭେ କାମ ଆଗେଇଥିବାବେଳେ ଓଡ଼ିଶା ପକ୍ଷରୁ ଏ ପର୍ଯ୍ୟନ୍ତ ସର୍ଭେ ଆରମ୍ଭ ହୋଇ ପାରିନାହିଁ। ପ୍ରାଥମିକ ପର୍ଯ୍ୟାୟରେ ମାଲକାନଗିରି-ଭଦ୍ରାଚଳମ୍ ୧୭୩ କି.ମି. ରେଳଲାଇନ ମଧ୍ୟରେ ୪୮ ବଡ଼ ପୋଲ ଓ ୧୬୫ ଛୋଟ ପୋଲ ନିର୍ମାଣ କରାଯିବା ପ୍ରସ୍ତାବ ରହିଛି। ମାଲକାନଗିରିଠାରୁ ବଦଲି, କୁଆସିଗୁଡ଼ା, ରାଜନଗୁଡ଼ା, ମହାରାଜପାଲ୍ଲୀ ଓ ଲୁନିମାନଗୁଡ଼ା ଦେଇ ସୀମାନ୍ତ ସାବେରୀ ନଦୀ କୂଳ ପର୍ଯ୍ୟନ୍ତ ମାଲକାନଗିରି ଜିଲା ଦେଇ ରେଳଲାଇନ୍ ଯିବ। ଅନ୍ୟପକ୍ଷରେ ତେଲଙ୍ଗାନା ସରକାର ତାଙ୍କ ଅଞ୍ଚଳ ଦେଇ ଯାଉଥିବା ଓଡ଼ିଶା ସୀମାରୁ ଭଦ୍ରାଚଳମ୍ ମଧ୍ୟରେ ଜମି ସର୍ଭେ କାର୍ଯ୍ୟ ୨ ମାସ ହେଲା ତ୍ୱରାନ୍ବିତ କରିଥିବା ବିଶେଷ ସୂତ୍ରରୁ ଜଣାପଡ଼ିଛି। ଏ ନେଇ ଦାୟିତ୍ୱରେ ଥିବା ମାଲକାନଗିରି ଉପଜିଲାପାଳ ଅକ୍ଷୟ କୁମାର ଖେମୁଣ୍ଡୁଙ୍କୁ ପଚାରିବାରୁ କାମର ଅଗ୍ରଗତି ନେଇ ରେଲ୍ଓ୍ବେ ସହ ଆଲୋଚନା ଚାଲିଥିବା କହିଛନ୍ତି। ଉଲ୍ଲେଖଯୋଗ୍ୟ, ମାଲକାନଗିରିରୁ ଭଦ୍ରାଚଳମ୍ ପର୍ଯ୍ୟନ୍ତ ରେଳଲାଇନ ସମ୍ପ୍ରସାରଣ ହେଲେ ଦକ୍ଷିଣ ଭାରତର ଅନେକ ରାଜ୍ୟରୁ ଓଡ଼ିଶାକୁ ରେଳ ସଂଯୋଗ ହୋଇପାରିବ। ଏହାଦ୍ୱାରା ବ୍ୟବସାୟିକ ଦୃଷ୍ଟିରୁ ଓଡ଼ିଶା ଲାଭବାନ ହେବ ବୋଲି କୁହାଯାଉଛି। ତେବେ ଓଡ଼ିଶା ପକ୍ଷରୁ ସର୍ଭେ ଓ ଜମି ଅଧିଗ୍ରହଣ କାମ କେବେ ଆରମ୍ଭ ହେବ ତାହାକୁ ସମସ୍ତଙ୍କ ଅପେକ୍ଷା। ବହୁ ପ୍ରତୀକ୍ଷିତ ଜୟପୁର-ମାଲକାନଗିରି ୧୩୦ କି.ମି. ରେଳଲାଇନ ପାଇଁ ମଧ୍ୟ ୯୦୦ରୁ ଊର୍ଦ୍ଧ୍ୱ କୋଟି ଟଙ୍କା ମଞ୍ଜୁର ହୋଇଥିବାବେଳେ ସର୍ଭେ କାମ ଶେଷ ପର୍ଯ୍ୟାୟରେ ପହଞ୍ଚିଛି। ମାଲକାନଗିରି ଜିଲା ସୀମାନ୍ତ ଗୋବିନ୍ଦପାଲ୍ଲୀଠାରୁ ଏମ୍ଭି-୪୨ ପର୍ଯ୍ୟନ୍ତ ସର୍ଭେ ନିମନ୍ତେ ମାଲକାନଗିରି, ମାଥିଲି ଓ ଖଇରପୁଟ ତହସିଲଦାରଙ୍କୁ ଦାୟିତ୍ୱ ଦିଆଯାଇଥିଲା। ତିନି ତହସିଲ ପକ୍ଷରୁ ସର୍ଭେ କାମ ସମ୍ପୂର୍ଣ୍ଣ ହେବାକୁ ଯାଉଥିବା ସୂଚନା ମିଳିଛି।
