ନୂଆଦିଲ୍ଲୀ ,୧୪।୧: ମାଳଦ୍ଵୀପ ରାଷ୍ଟ୍ରପତି ମହମ୍ମଦ ମୁଇଜୁ ରବିବାର ଭାରତ ପକ୍ଷରୁ ନିୟୋଜିତ ସମସ୍ତ ସାମରିକ କର୍ମଚାରୀଙ୍କୁ ପ୍ରତ୍ୟାହାର କରିବାକୁ କହିଛି। ଏଥିପାଇଁ ମାର୍ଚ୍ଚ ୧୫ ପର୍ଯ୍ୟନ୍ତ ସମୟ ଧାର୍ଯ୍ୟ କରିଛି ଦ୍ବୀପଦେଶ। ଭାରତ ସରକାର କହିଛନ୍ତି ଯେ ଉଭୟ ପକ୍ଷ ଏହି ପ୍ରସଙ୍ଗରେ ଆଲୋଚନା କରିବେ। ମୁଇଜୁଙ୍କ ସରକାର ଏହି ଦାବି ଏଭଳି ସମୟରେ କରିଛି ଯେତେବେଳେ ଏହି ସମସ୍ୟାର ସମାଧାନ ପାଇଁ ଉଭୟ ଦେଶ ଗଠନ କରିଥିବା ଏକ ଉଚ୍ଚ ସ୍ତରୀୟ କୋର କମିଟିର ବୈଠକ ମାଲେରେ ଅନୁଷ୍ଠିତ ହଇଛି।
ରାଷ୍ଟ୍ରପତି ମୁଇଜୁଙ୍କ ସଚିବ ଅବଦୁଲ୍ଲା ନାଜିମ ଇବ୍ରାହିମ ମାଲେରେ ଏକ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ ମାର୍ଚ୍ଚ ମଧ୍ୟଭାଗରେ ସୈନ୍ୟ ପ୍ରତ୍ୟାହାର କରିବାକୁ ଭାରତୀୟ କର୍ତ୍ତୃପକ୍ଷଙ୍କୁ ଜଣାଇବାକୁ ମୁଇଜୁ ଏହି ସଭାରେ ଯୋଗ ଦେଇଥିବା ମାଲଦ୍ୱୀପ ପ୍ରତିନିଧୀଙ୍କୁ କହିଛନ୍ତି।
ସ୍ଥାନୀୟ ଗଣମାଧ୍ୟମ ଇବ୍ରାହିମଙ୍କ ସୂତ୍ରରୁ କହିଛନ୍ତି ଯେ ମାଳଦ୍ଵୀପରୁ ଭାରତୀୟ ସୈନ୍ୟ ପ୍ରତ୍ୟାହାରକୁ ନେଇ ଏହା ହେଉଛି ଦ୍ୱାଦଶ ବୈଠକ ଏବଂ କୂଟନୈତିକ ସ୍ତରରେ ଆଲୋଚନା ଚାଲିଛି। ଭାରତୀୟ ସୈନିକମାନେ ମାଳଦ୍ଵୀପରେ ରହିପାରିବେ ନାହିଁ। ଏହା ହେଉଛି ରାଷ୍ଟ୍ରପତି ମହମ୍ମଦ ମୁଇଜୁ ଏବଂ ତାଙ୍କ ପ୍ରଶାସନର ନୀତି ଅଟେ।
ଏହି ପରିପ୍ରେକ୍ଷୀରେ ବୈଦେଶିକ ବ୍ୟାପାର ମନ୍ତ୍ରଣାଳୟ ପକ୍ଷରୁ ଜାରି ଏକ ବିବୃତ୍ତିରେ କୁହାଯାଇଛି ଯେ ମାଲଦ୍ୱୀପବାସୀଙ୍କୁ ମାନବିକ ତଥା ଚିକିତ୍ସା ସେବା ଯୋଗାଉଥିବା ଭାରତୀୟ ବିମାନ ଚଳାଚଳ ପ୍ଲାଟଫର୍ମର ନିରନ୍ତର କାର୍ଯ୍ୟ ପାଇଁ ସମାଧାନ ଖୋଜିବା ପାଇଁ ଉଭୟ ପକ୍ଷ ଆଲୋଚନା କରିଛନ୍ତି। ହିନ୍ଦୁସ୍ତାନ ଟାଇମ୍ସ ରିପୋର୍ଟ ଅନୁଯାୟୀ, ଦୁଇଟି ହେଲିକପ୍ଟର ଏବଂ ଗୋଟିଏ ବିମାନ ଚଳାଇବା ପାଇଁ ମାଲଦ୍ୱୀପରେ ପ୍ରାୟ ୭୭ ଭାରତୀୟ ସାମରିକ କର୍ମଚାରୀ ଉପସ୍ଥିତ ଅଛନ୍ତି।
ଜାରି ରହିଥିବା ବିକାଶମୂଳକ ପ୍ରକଳ୍ପର କାର୍ଯ୍ୟକାରିତାକୁ ତ୍ୱରାନ୍ୱିତ କରିବା ସହିତ ପାରସ୍ପରିକ ସହଭାଗିତାକୁ ବୁଝାମଣା ପାଇଁ ଦ୍ୱିପାକ୍ଷିକ ସହଯୋଗ ସହ ଜଡିତ ପ୍ରସଙ୍ଗ ଉପରେ ମଧ୍ୟ ଉଭୟ ପକ୍ଷ ଆଲୋଚନା କରିଛନ୍ତି ବୋଲି ବିବୃତ୍ତିରେ କୁହାଯାଇଛି। ଏଥିରେ କୁହାଯାଇଛି ଯେ ଯେତେବେଳେ ଡିସେମ୍ବରରେ ମୁଇଜୁ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସିଓପି୨୮ ର ବୈଠକରେ ସାକ୍ଷାତ ହୋଇଥିଲେ, ସେତେବେଳେ ଭାରତ ଏବଂ ମାଲଦ୍ୱୀପ ଏକ ଉଚ୍ଚ ସ୍ତରୀୟ କୋର ଗ୍ରୁପ୍ ଗଠନ କରିବାକୁ ରାଜି ହୋଇଥିଲେ।
ଚାଇନା ଗସ୍ତରୁ ଫେରିବା ପରେ ରାଷ୍ଟ୍ରପତି ମୁଇଜୁ ଅନେକ ପଦକ୍ଷେପ ଘୋଷଣା କରିଛନ୍ତି, ଯାହାର ଉଦ୍ଦେଶ୍ୟ ସ୍ୱାସ୍ଥ୍ୟ ସେବା ତଥା ଖାଦ୍ୟ ନିରାପତ୍ତା ଭଳି ପ୍ରସଙ୍ଗରେ ଭାରତ ଉପରେ ମାଲଦ୍ୱୀପର ନିର୍ଭରଶୀଳତାକୁ ହ୍ରାସ କରିବା ବୋଲି କୁହାଯାଉଛି।
