କୋଲକାତା,୧୨।୧ : ତୃଣମୂଳ କଂଗ୍ରେସ ଏମପି ମହୁଆ ମୋଇତ୍ର ତାଙ୍କର ଅନନ୍ୟ ଶୈଳୀ ପାଇଁ ଜଣାଶୁଣା। ଭାଜପାକୁ କଡ଼ା ସମାଲୋଚନା ଜାରି ରଖିଥିବା ମହୁଆ ପୁଣି ଥରେ ଭିନ୍ନ ଢ଼ଙ୍ଗରେ ଭାଜପାକୁ ଟାର୍ଗେଟ କରିଛନ୍ତି। ସେ ବର୍ତ୍ତମାନ ଚା’ ତିଆରି କରୁଥିବାର ଏକ ଭିଡିଓ ପୋଷ୍ଟ କରିଛନ୍ତି। ଭିଡିଓ ସହିତ ସେ ଲେଖିଛନ୍ତି ଚା’ ତିଆରି କରିବାକୁ ଏବେ ଚେଷ୍ଟା କରୁଛି, କିଏ ଜାଣେ ମୋତେ ଏହା କେଉଁଠିକୁ ନେଇଯିବ?’ ସୂଚନାଯୋଗ୍ୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କ ପିଲାଦିନରେ ଚା’ ବିକ୍ରି କରୁଥିବାର କୁହାଯାଉଛି।
ସୋସିଆଲ ମିଡ଼ିଆରେ ଭାଇରାଲ ହେଉଥିବା ଏହି ଭିଡିଓଟି ମହୁଆଙ୍କର କୃଷ୍ଣାନଗର ଲୋକସଭା ନିର୍ବାଚନମଣ୍ଡଳୀରୁ ଆସିଛି। ଭିଡିଓରେ, ମହୁଆ କ ରାସ୍ତା କଡରେ ଥିବା ଚା’ ଷ୍ଟଲରେ ଅଛନ୍ତି ଏବଂ ଫୁଟୁଥିବା ଚା’ରେ ଚିନି ପକାଉଥିବାର ନଜର ଆସିଛନ୍ତି। ୟୁଜରମାନେ ଏହି ଭିଡିଓ ଉପରେ ମଜାଳିଆ ମନ୍ତବ୍ୟ ଦେଇଛନ୍ତି। ପୂର୍ବତନ ଭାଜପା ନେତା ତଥା ନେତାଜୀ ସୁଭାଷ ଚନ୍ଦ୍ର ବୋଷଙ୍କ ନାତି ଚନ୍ଦ୍ର କୁମାର ବୋଷ କହିଛନ୍ତି, ମୁଁ ନିଶ୍ଚିତ ଯେ ଏହା ଆପଣଙ୍କୁ କେଉଁଠିକୁ ନେଇଯିବ। ଅନ୍ୟ ଜଣେ ୟୁଜର ଲେଖିଛନ୍ତି ଦେଶ ପାଇଁ କେବଳ ଜଣେ ଚାୱାଲା ଯଥେଷ୍ଟ ।
