ବେଲୁଚିସ୍ତାନ,୧୩।୧୧: ପାକିସ୍ତାନର ବେଲୁଚିସ୍ତାନ ପ୍ରାନ୍ତରେ ଏକ ସୁରକ୍ଷା ଚୌକି ଉପରେ ହୋଇଥିବା ଭୟଙ୍କର କାର ବୋମା ବିସ୍ଫୋରଣରେ ୫ ଜଣଙ୍କର ମୃତ୍ୟୁ ଘଟିଥିବା ବେଳେ ୧୩ ଜଣ ଆହତ ହୋଇଛନ୍ତି। ଜଣେ ସୁରକ୍ଷା ଅଧିକାରୀ ଶୁକ୍ରବାର ଦିନ ଏହି ସୂଚନା ଦେଇଛନ୍ତି। ଗୁରୁବାର ଦିନ ମସ୍ତୁଙ୍ଗ ଜିଲାର କଣ୍ଡାୱା ଅଞ୍ଚଳରେ ଏହି ଆକ୍ରମଣ ଘଟିଛି। ବିସ୍ଫୋରକ ଭର୍ତ୍ତି ଏକ ଗାଡ଼ିକୁ ଫ୍ରଣ୍ଟିୟର୍ କର୍ପସ୍ (FC) ଚୌକିରେ ଧକ୍କା ଦିଆଯାଇଥିଲା।
ଅଧିକାରୀଙ୍କ ସୂଚନା ଅନୁଯାୟୀ, ନିହତ ହୋଇଥିବା ତିନି ଜଣ ଆତଙ୍କବାଦୀଙ୍କ ମଧ୍ୟରେ ଆତ୍ମଘାତୀ ବିସ୍ଫୋରଣକାରୀ ମଧ୍ୟ ସାମିଲ ଥିଲା। ଏହା ବ୍ୟତୀତ ବିସ୍ଫୋରଣରେ ସାଧାରଣ ନାଗରିକଙ୍କ ଜୀବନ ମଧ୍ୟ ଯାଇଛି। ଏଫ୍ସି (FC) ଯବାନଙ୍କ ସମେତ ଅନ୍ୟ ୧୩ ଜଣ ଆହତ ହୋଇଛନ୍ତି। ବିସ୍ଫୋରଣ ଏତେ ଶକ୍ତିଶାଳୀ ଥିଲା ଯେ ଆଖପାଖର ଘରଗୁଡ଼ିକ ଏବଂ ଏକ ମସଜିଦର ବ୍ୟାପକ କ୍ଷୟକ୍ଷତି ହୋଇଛି। ମୃତ ସାଧାରଣ ନାଗରିକଙ୍କ ମଧ୍ୟରେ ମହିଳା ଏବଂ ଶିଶୁ ମଧ୍ୟ ରହିଥିବା ଜଣାପଡ଼ିଛି।
ପରେ ନିଷିଦ୍ଧ ସଂଗଠନ ‘ବେଲୁଚ୍ ଲିବରେସନ୍ ଆର୍ମି’ (BLA) ଏହି ଆକ୍ରମଣ ପାଇଁ ନିଜକୁ ଦାୟୀ କରିଛି। ସଂଗଠନ ପକ୍ଷରୁ କୁହାଯାଇଛି ଯେ ଆତ୍ମଘାତୀ ଆକ୍ରମଣକାରୀର ନାମ ଓସାମା ଶାହୱାନୀ ଥିଲା, ଯିଏକି ୨୦୨୨ ମସିହାରେ ଏହି ସଂଗଠନରେ ସାମିଲ ହୋଇଥିଲା। ତେବେ ସୁରକ୍ଷା ଅଧିକାରୀଙ୍କ କହିବା ଅନୁଯାୟୀ, ୨୦୨୪ ମସିହାରେ ନିଖୋଜ ବ୍ୟକ୍ତିଙ୍କ ତାଲିକାରେ ଶାହୱାନୀର ନାମ ସାମ୍ନାକୁ ଆସିଥିଲା।
ଅଧିକାରୀ ଜଣକ ଆହୁରି କହିଛନ୍ତି ଯେ ଏହି ଘଟଣାରୁ ସ୍ପଷ୍ଟ ହେଉଛି କିପରି ଏହି ନିଷିଦ୍ଧ ବିଦ୍ରୋହୀ ଗୋଷ୍ଠୀ ବେଲୁଚ୍ ଯୁବକମାନଙ୍କୁ ଜୋରଜବରଦସ୍ତ ନିଜ ସଂଗଠନରେ ସାମିଲ କରୁଛି ଏବଂ ସେମାନଙ୍କ ଠିକଣା ବିଷୟରେ ପ୍ରଶାସନକୁ ବିଭ୍ରାନ୍ତ କରୁଛି।
ଏହା ପୂର୍ବରୁ ଗତ ନଭେମ୍ବର ୧୧ ତାରିଖରେ ପାକିସ୍ତାନର ଖାଇବର ପଖତୁନଖ୍ୱା ପ୍ରାନ୍ତରେ ଆତଙ୍କବାଦୀମାନେ ପୋଲିସ ଟିମ୍କୁ ଟାର୍ଗେଟ୍ କରି ବଡ଼ ଆକ୍ରମଣ କରିଥିଲେ। କୋହାଟ ଜିଲାରେ ପୂର୍ବରୁ ଛକି ରହି କରାଯାଇଥିବା ଏହି ଆକ୍ରମଣରେ ଜଣେ ଡିଏସପି (DSP) ଏବଂ ସବ୍-ଇନ୍ସପେକ୍ଟରଙ୍କ ସମେତ ଅତି କମରେ ୧୧ ଜଣ ପୋଲିସ କର୍ମଚାରୀ ସହିଦ ହୋଇଥିବା ବେଳେ ୧୨ ଜଣ ଆହତ ହୋଇଥିଲେ। ଏହି ସମୟରେ ଆତଙ୍କବାଦୀମାନେ ୫ଟି ପୋଲିସ ଗାଡ଼ିରେ ନିଆଁ ଲଗାଇ ଦେଇଥିଲେ। ବେଆଇନ ସୁନା ଖନନ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ପୋଲିସ ଟିମ୍ ଯାଉଥିବା ବେଳେ ଦରବୋକାଚ ଜଲନ୍ଧର ବାନ୍ଦା ଅଞ୍ଚଳରେ ଆତଙ୍କବାଦୀମାନେ ଅତର୍କିତ ଭାବେ ଆଖିବୁଜା ଗୁଳିଚାଳନା କରିଥିଲେ।