ଭୁବନେଶ୍ୱର,(ରବିନାରାୟଣ ଜେନା)/ ସମ୍ବଲପୁର,(ପ୍ରମୋଦ ବହିଦାର) ୧।୮: ରାଜ୍ୟରେ ଲଗାଣ ବର୍ଷା ଯୋଗୁ ସୃଷ୍ଟି ହୋଇଥିବା ବନ୍ୟା ଏବେ ଭୟଙ୍କର ରୂପ ନେଉଛି। କେଉଁଠି ଘରଦ୍ୱାର ଧୋଇ ନେଉଛି ତ ଆଉ କେଉଁଠି ନଦୀବନ୍ଧ ଭାଙ୍ଗି ଫସଲ ମାଟିରେ ମିଶାଇ ଦେଉଛିି। ପରିସ୍ଥିତି ଏପରି ହୋଇଛି, ଲୋକେ ଦିନରାତି ନଦୀବନ୍ଧ ଜଗି ରହୁୁଛନ୍ତି। କାଳେ ବନ୍ୟାଜଳ ନଦୀବନ୍ଧ ଭାଙ୍ଗି ଗାଁ ଭିତରେ ପଶିଯିବ ଏବଂ ଜିନିଷପତ୍ର ଧୋଇ ନେବ ସେଥିପାଇଁ ଲୋକେ ଗାଁ ମୁଣ୍ଡରେ ଜଗି ରହୁଛନ୍ତି। ଉତ୍ତର ଓଡ଼ିଶା ବନ୍ୟା ଯୋଗୁ ଭଦ୍ରକ, ବାଲେଶ୍ୱର, କେନ୍ଦୁଝର, ମୟୂରଭଞ୍ଜ, ଯାଜପୁର ଘୋର ପ୍ରଭାବିତ ହୋଇଥିବା ବେଳେ ମହାନଦୀରେ ଏବେ ବଡ଼ ବନ୍ୟା ସ୍ଥିତି ଉପୁଜିଛି। ହୀରାକୁଦର ୨୨ ଗେଟ୍ ଖୋଲାଯିବା ପରେ କଟକ, ଖୋର୍ଦ୍ଧା, ନୟାଗଡ଼ ଆଦି ଜିଲାକୁ ବନ୍ୟାଜଳ ବହୁଳମାତ୍ରାରେ ପ୍ରବେଶ କରୁଛି। ଅଦ୍ୟାବଧି ୮ଲକ୍ଷରୁ ଊର୍ଦ୍ଧ୍ୱ ଲୋକ ପ୍ରଭାବିତ ହୋଇଥିବା ବେଳେ ତଳମୁଣ୍ଡରେ ବନ୍ୟାଜଳ ପହଞ୍ଚତ୍ଲା ବେଳକୁ ପ୍ରଭାବିତଙ୍କ ସଂଖ୍ୟା ଢେର ବଢ଼ିବାର ଆଶଙ୍କା ସୃଷ୍ଟି ହେଲାଣି। ବନ୍ୟା ସ୍ଥିତିର ସମୀକ୍ଷା କରିବା ପାଇଁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଶନିବାର ଆକାଶମାର୍ଗରୁ ଅନୁଧ୍ୟାନ କରିବାର କାର୍ଯ୍ୟସୂଚୀ ରହିଛି।
ଶୁକ୍ରବାର ରାତି ସାଢ଼େ ୯ଟା ସୁଦ୍ଧା ହସ୍ତଗତ ସୂଚନା ଅନୁସାରେ ଜଳଭଣ୍ଡାରର ଜଳସ୍ତର ବୃଦ୍ଧି ପାଇ ୬୨୫.୨୫ ଫୁଟ୍ରେ ପହଞ୍ଚତ୍ଛି। ଏହି ସମୟରେ ଜଳଭଣ୍ଡାରକୁ ପ୍ରତି ସେକେଣ୍ଡରେ ହାରାହାରି ୪ ଲକ୍ଷ ୫୨ ହଜାର ୫୬୬ ଘନଫୁଟ ବନ୍ୟାଜଳ ପ୍ରବେଶ କରୁଥିବାବେଳେ ଜଳଭଣ୍ଡାରରୁ ସର୍ବମୋଟ ହାରାହାରି ୩ ଲକ୍ଷ ୮୯ ହଜାର ୦୩୩ ଘନଫୁଟ ଅତିରିକ୍ତ ବନ୍ୟାଜଳ ନିଷ୍କାସନ ହେଉଛି। ସୂଚନାଯୋଗ୍ୟ, ହୀରାକୁଦ ଜଳଭଣ୍ଡାରର ସର୍ବୋଚ୍ଚ ଜଳଧାରଣ କ୍ଷମତା ୬୩୦ ଫୁଟ୍ ରହିଛି।
ମହାନଦୀରେ ବନ୍ୟାଜଳ ବୃଦ୍ଧି ପାଉଥିବାରୁ ଏବେ ବଡ଼ବନ୍ୟା ସ୍ଥିତି ସୃଷ୍ଟି ହେବାକୁ ଯାଉଛି। ତଳିଆ ଅଞ୍ଚଳ ଲୋକେ ହୀରାକୁଦର ୨୨ ଫାଟକ କଥା ଶୁଣି ଭୟାତୁର ଅବସ୍ଥାରେ ରହିଛନ୍ତି। ଏହି ପରିପ୍ରେକ୍ଷୀରେ ଏସ୍ଆର୍ସିଙ୍କ ରିପୋର୍ଟ ଅନୁଯାୟୀ, ନରାଜଠାରେ ୨୬.୪୧ ମିଟର ବିପଦ ସଙ୍କେତ ରହିଥିବାବେଳେ ପୂର୍ବାହ୍ନରେ ୨୫.୪୧ ମିଟରରେ ଜଳ ପ୍ରବାହିତ ହେଉଥିଲା। ହୀରାକୁଦର ୨୨ ଫାଟକ ଖୋଲିବା ପରେ ଏଠାରେ ଜଳସ୍ତର ବିପଦ ସଙ୍କେତ ଉପରେ ପ୍ରବାହିତ ହେବାର ଆଶଙ୍କା ରହିଛି। ଏଠାରେ ୧୦ଲକ୍ଷ ତଳେ ଜଳ ପ୍ରବାହିତ କିଭଳି ହେବ ସେଥିପାଇଁ ଜଳସମ୍ପଦ ବିଭାଗ ପକ୍ଷରୁ ଜଳପରିଚାଳନାକୁ ଗୁରୁତ୍ୱ ଦିଆଯାଇଛି। ଏହା ପ୍ରଭାବରେ ତଳମୁଣ୍ଡରେ କି ପ୍ରକାର ସ୍ଥିତି ଉପୁଜିବ ତାକୁ ନେଇ ସରକାରଙ୍କ ପକ୍ଷରୁ ବ୍ୟାପକ ପ୍ରସ୍ତୁତି ଚାଲିଛି। ସେହିପରି ବୈତରଣୀର ଆନନ୍ଦପୁରଠାରେ ବିପଦ ସଙ୍କେତ ସ୍ତର ୩୮.୩୬ ମିଟର ରହିଥିବାବେଳେ ଏଠାରେ ପ୍ରାୟ ୩୭.୪୪ ମିଟର ଉପରେ ବନ୍ୟା ଜଳ ପ୍ରବାହିତ ହେଉଛି। ଆଖୁଆପଦାଠାରେ ବିପଦ ସଙ୍କେତ ସ୍ତର ୧୮.୩୩ ମିଟର ରହିଥିବାବେଳେ ଏଠାରେ ସନ୍ଧ୍ୟା ସୁଦ୍ଧା ୧୮ମିଟର ଉଚ୍ଚରେ ଜଳସ୍ତର ପ୍ରବାହିତ ହେବାକୁ ରହିଛି। ଜଳକାର ମଠାନିଠାରେ ମଧ୍ୟ ଜଳସ୍ତର ବିପଦ ସଙ୍କେତ ପାଖାପାଖି ରହିଛି।
ରାଜ୍ୟରେ ସୃଷ୍ଟି ହୋଇଥିବା ବନ୍ୟା ଯୋଗୁ ବିଶେଷ କରି ବାଲେଶ୍ୱର, ଭଦ୍ରକ, ଯାଜପୁର, ମୟୂରଭଞ୍ଜ, ଢେଙ୍କାନାଳ ପ୍ରଭୃତି ଜିଲାରେ ଗମ୍ଭୀର ପରିସ୍ଥିତି ସୃଷ୍ଟି ହୋଇଛି। ରାଜ୍ୟରେ ୧୫ଟି ଜିଲାରେ ୮ଲକ୍ଷରୁ ଊର୍ଦ୍ଧ୍ୱ ଲୋକ ପ୍ରଭାବିତ ହୋଇଥିବାବେଳେ ଏହି ୫ଟି ଜିଲାରେ ୭ଲକ୍ଷରୁ ଊର୍ଦ୍ଧ୍ୱ ଲୋକ ପ୍ରଭାବିତ ହୋଇଛନ୍ତି। ଅନ୍ୟପକ୍ଷରେ ସ୍ବତନ୍ତ୍ର ରିଲିଫ କମିଶନର(ଏସ୍ଆର୍ସି)ଙ୍କ ପକ୍ଷରୁ ଗୁରୁବାର ୨୦ଟି ଜିଲାରେ ବନ୍ୟା ପରିସ୍ଥିତି ସୃଷ୍ଟି ହୋଇଥିବା କୁହାଯାଇଥିବାବେଳେ ଶୁକ୍ରବାର ଏଥିରେ ପରିବର୍ତ୍ତନ କରାଯାଇଛି। ଶୁକ୍ରବାର କଟକ, ଖୋର୍ଦ୍ଧା, ନୟାଗଡ଼, ନୂଆପଡ଼ା ଜିଲାକୁ ବନ୍ୟା ତାଲିକାରେ ଯୋଡ଼ା ଯାଇଥିବାବେଳେ ୯ଟି ଜିଲାରେ ବନ୍ୟା ସ୍ଥିତିରେ ସୁଧାର ଆସିଥିବାରୁ ତାକୁ ବାଦ୍ ଦିଆଯାଇଛି। ବନ୍ୟା ତାଲିକାରୁ ବାଦ୍ ପଡ଼ିଥିବା ଜିଲା ମଧ୍ୟରେ ଅନୁଗୋଳ,ବଲାଙ୍ଗୀର, ବରଗଡ଼, କଳାହାଣ୍ଡି, କୋରାପୁଟ, ମାଲକାନଗିରି, ରାୟଗଡା, ସୁବର୍ଣ୍ଣପୁର ଓ ସୁନ୍ଦରଗଡ଼ ରହିଛି। ଏହା ସ୍ବତନ୍ତ୍ର ରିଲିଫ କମିଶନରଙ୍କ ରିପୋର୍ଟରୁ ଜଣାଯାଇଛି।
ଏସ୍ଆର୍ସିଙ୍କ ରିପୋର୍ଟ ଅନୁଯାୟୀ, ରାଜ୍ୟ ସରକାରଙ୍କ ପକ୍ଷରୁ ୨ଲକ୍ଷ ୬୮ହଜାର ୯୪୩ ଲୋକଙ୍କୁ ଶୁକ୍ରବାର ଅପରାହ୍ନ ସୁଦ୍ଧା ସ୍ଥାନାନ୍ତର କରାଯାଇଛି। ସେମାନଙ୍କୁ ରନ୍ଧା ଖାଦ୍ୟ ବଣ୍ଟନ କରାଯାଉଛି। ଏହାବାଦ୍ ଅବଶିଷ୍ଟ ବନ୍ୟା ପ୍ରପୀଡ଼ିତଙ୍କ ପାଇଁ ରିଲିଫ ସାମଗ୍ରୀ ଯୋଗାଣ କରାଯାଉଛି। ଯେଉଁ ୯ଟି ଜିଲାରେ ବନ୍ୟା ସ୍ଥିତି ନାହିଁ ସେଠାରେ ତୁରନ୍ତ କ୍ଷୟକ୍ଷତି ଆକଳନ କରି ରିପୋର୍ଟ ଦେବାକୁ ସରକାରଙ୍କ ପକ୍ଷରୁ ଜିଲା ପ୍ରଶାସନକୁ ନିର୍ଦ୍ଦେଶ ଦିଆଯାଇଛି।
