ନୂଆଦିଲ୍ଲୀ,୨୪।୮: ଭାରତ ସରକାର ଗହମ ରପ୍ତାନି ଉପରେ ଲାଗିଥିବା କଟକଣାକୁ ହଟାଇ ଦେଇଛନ୍ତି। ଡାଇରେକ୍ଟରେଟ ଜେନେରାଲ ଅଫ ଫରେନ ଟ୍ରେଡ (DGFT) ପକ୍ଷରୁ ଜାରି ନୋଟିଫିକେସନରେ ଏହି ନିଷ୍ପତ୍ତିର ସୂଚନା ଦିଆଯାଇଛି। ଏବେ ଡ୍ୟୁରମ କିସମର ଗହମ, ଅଟା ଏବଂ ଗହମରୁ ପ୍ରସ୍ତୁତ ଅନ୍ୟାନ୍ୟ ଉତ୍ପାଦର ରପ୍ତାନିକୁ ଅନୁମତି ମିଳିଛି। ଏହା ପୂର୍ବରୁ ଚଳିତ ବର୍ଷ ଫେବୃଆରୀରେ ସରକାର ସୀମିତ ପରିମାଣର ଗହମ ରପ୍ତାନିକୁ ଅନୁମତି ଦେଇଥିଲେ।
ସୋମବାର ଜାରି ହୋଇଥିବା ଏହି ନୋଟିଫିକେସନ ପରେ ବିଶ୍ୱ ବଜାରରେ ଗହମର ଯୋଗାଣ ବଢ଼ିପାରେ। ଏହା ସହ ଗହମ ପାଇଁ ଅନ୍ୟ ଦେଶ ଉପରେ ନିର୍ଭରଶୀଳ ଦେଶଗୁଡ଼ିକୁ ମଧ୍ୟ ଆଶ୍ୱସ୍ତି ମିଳିପାରେ। ଭାରତ ଗହମ ଉତ୍ପାଦନ କ୍ଷେତ୍ରରେ ବିଶ୍ୱର ଦ୍ୱିତୀୟ ବୃହତ୍ତମ ଉତ୍ପାଦକ। ଦେଶର ଗତ ଗହମ ଫସଲ ରେକର୍ଡ ୧୨୦.୬ ମିଲିୟନ ଟନ୍ରେ ପହଞ୍ଚିଥିଲା। ଦେଶରେ ଗହମ ଉତ୍ପାଦନ ଦୀର୍ଘଦିନ ଧରି ମଜବୁତ ରହିଛି। ତେବେ ୨୦୨୨ରୁ ସରକାର ବଡ଼ ପରିମାଣରେ ଗହମ ରପ୍ତାନି ଉପରେ କଟକଣା ଲଗାଇଥିଲେ। ରୁଷିଆ-ୟୁକ୍ରେନ ଯୁଦ୍ଧ ଆରମ୍ଭ ହେବା ପରେ ଦେଶରେ ପର୍ଯ୍ୟାପ୍ତ ଗହମ ଉପଲବ୍ଧତା ବଜାୟ ରଖିବା ଏବଂ ଖାଦ୍ୟ ସୁରକ୍ଷା ସୁନିଶ୍ଚିତ କରିବା ପାଇଁ ଏହି ପଦକ୍ଷେପ ନିଆଯାଇଥିଲା। ଏବେ ପୁଣି ରପ୍ତାନିକୁ ଅନୁମତି ମିଳିଥିବାରୁ ଅନ୍ତର୍ଜାତୀୟ ବଜାରରେ ଭାରତୀୟ ଗହମର ଚାହିଦା ବଢ଼ିପାରେ। ଏହାର ଫାଇଦା ଭାରତୀୟ ଚାଷୀ ଓ ରପ୍ତାନିକାରୀମାନଙ୍କୁ ମଧ୍ୟ ମିଳିବାର ଆଶା ରହିଛି।
ରୁଷିଆ ଏବଂ ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ ଯୋଗୁ କଳା ସାଗର ଅଞ୍ଚଳରୁ ଗହମ ଓ ଅନ୍ୟାନ୍ୟ ଶସ୍ୟର ଯୋଗାଣ ପ୍ରଭାବିତ ହେଉଛି। କଳା ସାଗର ବିଶ୍ୱର ପ୍ରମୁଖ ଗହମ ରପ୍ତାନି ଅଞ୍ଚଳ ମଧ୍ୟରୁ ଅନ୍ୟତମ। ଏହାର ପ୍ରଭାବ ଅନ୍ତର୍ଜାତୀୟ ବଜାର ଉପରେ ମଧ୍ୟ ପଡ଼ୁଛି। ଏଭଳି ସମୟରେ ଭାରତରୁ ଗହମ ରପ୍ତାନି ବଢ଼ିଲେ ଏସିଆ, ଆଫ୍ରିକା ଏବଂ ପଶ୍ଚିମ ଏସିଆର ଗହମ ଆମଦାନୀ ଉପରେ ନିର୍ଭରଶୀଳ ଦେଶଗୁଡ଼ିକୁ ରାହତ ମିଳିପାରେ। ଯୁଦ୍ଧ ମଧ୍ୟରେ ଭାରତ ସରକାରଙ୍କ ଏହି ନିଷ୍ପତ୍ତି ବିଶ୍ୱ ବଜାରରେ ଗହମ ଯୋଗାଣ ବଢ଼ାଇବାରେ ସହାୟକ ହୋଇପାରେ।