ନୂଆପଡ଼ା,୨୫।୬ (ମକାରୁ ବେମାଲ) : ନୂଆପଡ଼ା ଜିଲା କୋମନା ବ୍ଲକ ସିଲ୍ଭା ପଞ୍ଚାୟତ ପଟପରପାଲି ଗାଁର ମହୁଲପଡ଼ାବାସୀ ସ୍ବାଧୀନତାର ଦୀର୍ଘବର୍ଷ ପରେ ମଧ୍ୟ ମୌଳିକ ସୁବିଧାରୁ ବଞ୍ଚତ୍ତ ହୋଇ ଅଭିଶପ୍ତ ଜୀବନ ବିତାଉଛନ୍ତି। ସୂଚନା ଅନୁଯାୟୀ ମହୁଲପଡ଼ାରେ ୧୦ରୁ ଊର୍ଦ୍ଧ୍ୱ ପରିବାର ବସବାସ କରୁଛନ୍ତି। ପଡ଼ାରେ ଗୋଟିଏ ନଳକୂଅ ଥିଲେ ମଧ୍ୟ ସେଥିରୁ ଫ୍ଲୋରାଇଡ ଯୁକ୍ତ ପାଣି ବାହାରୁଥିବାରୁ ତାହାକୁ ନିଷିଦ୍ଧ ଘୋଷଣା କରାଯାଇଛି। ଫଳରେ ପଡାବାସୀ ଖୋଲା କୂଅ, ପୋଖରୀ, ନଈ, ନାଳ ପାଣି ବ୍ୟବହାର କରି ବିଭିନ୍ନ ରୋଗର ଶିକାର ହେଉଛନ୍ତି। ଗାଁକୁ ଭଲ ରାସ୍ତାଟିଏ ନାହିଁ। କଚ୍ଚା ରାସ୍ତାଟି ବର୍ଷାଦିନେ କାଦୁଅ ହେଉଥିବାରୁ ପଡାବାସୀ ଯାତାୟାତରେ ଅସୁବିଧାର ସମ୍ମୁଖୀନ ହେଉଛନ୍ତି। ପ୍ରାଥମିକ ବିଦ୍ୟାଳୟ ଦୂର କଥା ଅଙ୍ଗନୱାଡି କେନ୍ଦ୍ରଟିଏ ନ ଥିବାରୁ କୋମଳମତି ଶିଶୁ ପ୍ରାକ୍ ଶିକ୍ଷାରୁ ବଞ୍ଚତ୍ତ ହୋଇଛନ୍ତି। ବିଜୁଳି ପାଇଁ ଅନେକ ଥର ଜିଲା ପ୍ରଶାସନ ଓ ବିଦ୍ୟୁତ୍ ବିଭାଗଠାରେ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳିନାହିଁ। ବିଭିନ୍ନ ସରକାରୀ ଯୋଜନା ଓ ଆବାସ ଗୃହ ସାତସପନ ହୋଇଛି। ପଡ଼ାର ତୋଷନ ଶବରଙ୍କ ରାଶନ କାର୍ଡ ନୂଆପଡା ସଦର ବ୍ଲକ ଜାମପାଣି ପଞ୍ଚାୟତରେ ଥିବାରୁ ରାଶନ ସାମଗ୍ରୀ ପାଇଁ ସେ ପ୍ରତି ମାସରେ ୨୫ରୁ ୩୦ କିଲୋମିଟର ଯାଇ ହଇରାଣ ହେଉଛନ୍ତି। ଏହିସବୁ ସମସ୍ୟା ବିଷୟରେ ପଡାବାସୀ ନିର୍ବାଚିତ ଜନପ୍ରତିନିଧିଙ୍କଠାରୁ ଆରମ୍ଭ କରି ବିଡିଓ, ଜିଲା ପ୍ରଶାସନକୁ ଲିଖିତ ଭାବରେ ଜଣାଇଥିଲେ ମଧ୍ୟ ସମାଧାନ ହୋଇପାରି ନାହିଁ। ଏ ନେଇ ଏକ ବୈଠକ କରି ଆଗାମୀ ଦିନରେ ରାଜରାସ୍ତାକୁ ଓହ୍ଲାଇବା ପାଇଁ ପଡ଼ାର ପିଲାସିଂ ଶବର, ରୂପସିଂ ଶବର, ସୁନାତନ ଶବର, ତୋଷନ ଶବର, ଭୂରେଶ୍ୱର ଶବର, ଭୃଞ୍ଜରାଜ ଶବର, ଭିତେଶ୍ୱର ଶବର, ଲକ୍ଷ୍ମୀବନ୍ତ ଶବର, ସରବତି ଶବର, ଚଣ୍ଡବ ଶବର ପ୍ରମୁଖଙ୍କଠାରୁ ସୂଚନା ମିଳିଛି। ଏ ସଂକ୍ରାନ୍ତରେ କୋମନା ବିଡିଓ ବିନୟ କୁମାର ଭୋଇଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସମ୍ଭବ ହୋଇପାରି ନାହିଁ।
