ଢେଙ୍କାନାଳ ଅଫିସ, ୬।୪ – ମହିମା ଧର୍ମର ପ୍ରଚାର ପ୍ରସାର ଲାଗି ନବମ ବ୍ରହ୍ମଜ୍ୟୋତି ଯାତ୍ରା ଆସନ୍ତା ଏପ୍ରିଲ ୨୨ ଓ ୨୩ ତାରିଖରେ ଅନୁଷ୍ଠିତ ହେବ। କୌପିନଧାରୀ ମହିମା ସମାଜ ଧର୍ମାଧ୍ୟକ୍ଷ ଶ୍ରୀମଦ୍ ରଘୁନାଥ ବାବାଙ୍କ ପୌରୋହିତ୍ୟରେ ଏ ନେଇ ଏକ ବୈଠକ ଅନୁଷ୍ଠିତ ହୋଇଯାଇଛି। ଜ୍ୟୋତିଯାତ୍ରା ମୁଖ୍ୟ ସଂଯୋଜକ ପ୍ରଦ୍ୟୁମ୍ନ ରଥ, ଆବାହକ ପ୍ରଶାନ୍ତ ମହାପାତ୍ର, କୌପିନଧାରୀ ମହିମା ସମାଜ ସମ୍ପାଦକ ସୁଶାନ୍ତ ବାବା, ସହସମ୍ପାଦକ କରୁଣାକର ବାବା, ଯୁଗ୍ମ ଆବାହକ ଭକ୍ତ ବିଜ୍ଞାନ ବେହେରା ପ୍ରମୁଖଙ୍କ ଉପସ୍ଥିତିରେ ଜ୍ୟୋତିଯାତ୍ରା ପଥ ଚୂଡ଼ାନ୍ତ କରାଯାଇଛି।
ଏପ୍ରିଲ ୨୧ ସନ୍ଧ୍ୟାରେ କପିଳାସ ତପୋବନ ପୀଠ ଅଖଣ୍ଡ ଜ୍ୟୋତି ମନ୍ଦିରରୁ ବ୍ରହ୍ମଜ୍ୟୋତି ଜାଗ୍ରତ କରାଯାଇ ଏକ କାଚ ବିମାନରେ ଗାଦିପୀଠ ଯୋରନ୍ଦାକୁ ଅଣାଯିବ। ୨୨ ତାରିଖ ପୂର୍ବାହ୍ନ ୮ଟାରେ ବ୍ରହ୍ମଜ୍ୟୋତିକୁ ଗଁଦିଆ ବ୍ଲକ୍ କାଲୁରିଆସ୍ଥିତ ମହିମା ଟୁଙ୍ଗୀରେ ରଖାଯିବ। ସେଠାର ଶ୍ରଦ୍ଧାଳୁମାନେ ଦର୍ଶନ କରିବେ। ଏକ ଧର୍ମସଭା ଆୟୋଜିତ ହେବ। ଏହାପରେ ବଣସିଂହ-ସିମିଳିଆ-ରାମେଶ୍ୱରପୁର ଦେଇ ଜ୍ୟୋତିଯାତ୍ରା ଢେଙ୍କାନାଳ ବାଜିଚୌକରେ ପହଞ୍ଚତ୍ବ। ସେଠାରୁ କଣ୍ଟାନାଳୀ ବାଇପାସ୍ ଦେଇ ଭାପୁର ନିକଟ ପୁରୁଣା କଟକ-ସମ୍ବଲପୁର ରାସ୍ତାରେ ଅନୁଗୋଳ ବ୍ଲକ ବେଡ଼ାଶାସନ ପଞ୍ଚାୟତ ଅନ୍ତର୍ଗତ ହମାମିରା ମହିମା ଟୁଙ୍ଗୀ ପରିକ୍ରମା କରିବ। ଏହାପରେ ଅନୁଗୋଳ ବ୍ଲକ୍ ଇଙ୍କରବନ୍ଧ ପଞ୍ଚାୟତର ସାରଙ୍ଗପୁର, ସାନ କଞ୍ଜନି, ବଡ଼ କଞ୍ଜନୀ ଗ୍ରାମରେ ବ୍ରହ୍ମଜ୍ୟୋତି ପରିକ୍ରମା କରିବ। ସେଠାରୁ ଛେଳିଆପଡା ଛକ-ଅନୁଗୁଳ-ସମ୍ବଲପୁର ରେଳପଥ ଅତିକ୍ରମ କରି ବଅଁରପାଳ ବ୍ଲକ ସାକସିଂହା ମହିମା ଟୁଙ୍ଗୀରେ ପହଞ୍ଚତ୍ବ। ସେଠାରେ ରାତ୍ରରହଣି ସାଙ୍ଗକୁ ଧର୍ମସଭା ଆୟୋଜିତ ହେବ। ଏପ୍ରିଲ୍ ୨୩ରେ ସାକସିଂହା, ଅନୁଗୋଳ ବ୍ଲକ ଖଲାରୀ ଗ୍ରାମ ପରିକ୍ରମା ପରେ ନାଲ୍କୋନଗରସ୍ଥିତ ଭୀମଭୋଇ ପାର୍କରେ ଅପରାହ୍ନରେ ପହଞ୍ଚତ୍ବ। ସର୍ବସାଧାରଣ ଦର୍ଶନ ପରେ ତପୋବନ ପୀଠକୁ ବ୍ରହ୍ମଜ୍ୟୋତି ପ୍ରତ୍ୟାବର୍ତ୍ତନ କରିବ ବୋଲି ପରିଚାଳନା ପରିଷଦ ପକ୍ଷରୁ ସୂଚନା ଦିଆଯାଇଛି।
