ପୁରୀ ଅଫିସ, ୬ା୨:ଶ୍ରୀମନ୍ଦିରରେ ରବିବାର ବଡ଼ ମହାସ୍ନାନ ନୀତି ଅନୁଷ୍ଠିତ ହୋଇଛି। ସକାଳେ ମଙ୍ଗଳ ଆଳତି ପରେ ଭକ୍ତମାନେ ଶ୍ରୀମନ୍ଦିର ଭିତରକାଠ ନିକଟରେ ଚତୁର୍ଦ୍ଧାମୂର୍ତ୍ତିଙ୍କୁ ଦର୍ଶନ କରୁଥିଲେ। ଏହି ସମୟରେ ଜଣେ ବୃଦ୍ଧା ଭିତରକାଠ ନିକଟରେ ଛେପ ପକାଇ ଦେଇଥିଲେ। ଏହା ଦୃଷ୍ଟିକୁ ଆସିବା ପରେ ତୁରନ୍ତ ଦର୍ଶନ ଓ ନୀତି ବନ୍ଦ ରଖାଯାଇଥିଲା। କବାଟ ବନ୍ଦ କରାଯାଇ ବଡ଼ ମହାସ୍ନାନ ପାଇଁ ନୀତି ଆରମ୍ଭ ହୋଇଥିଲା। ଚୂନପାଣି ପଡ଼ି ମଇଲମ ପରେ ସିଂହାସନ, ଭିତରକାଠ ଧୁଆଯାଇଥିଲା। ଏହାପରେ ସକାଳ ୭ଟା ୫୦ରେ ମହାସ୍ନାନ ନୀତି ଆରମ୍ଭ ହୋଇ ୮ଟା ୫ରେ ସରିଥିଲା। ଏଥିପାଇଁ ଅନ୍ୟ ନୀତି ପ୍ରାୟ ୧ଘଣ୍ଟା ବିଳମ୍ବ ହୋଇଥିଲା। ମହାସ୍ନାନ ନୀତି ସରିବା ପରେ ପୁଣି ନୀତିକାନ୍ତି ଆଗେଇଥିଲା। ସୂଚନାଯୋଗ୍ୟ, ଶୁକ୍ରବାର ଭିତରକାଠ ନିକଟରେ କେହି ଭକ୍ତ ବାନ୍ତି କରିଦେବାରୁ ବଡ଼ ମହାସ୍ନାନ ନୀତି ହୋଇଥିଲା।
