ମୁମ୍ବାଇ,୨୯ ।୧୦: କିଛି ଦିନର ନିରବତା ପରେ ମହାରାଷ୍ଟ୍ର ରାଜନୀତିରେ ପୁଣିଥରେ ହାଇ ଡ୍ରାମା ହେବାର ଅନୁମାନ କରାଯାଉଛି । ମହାରାଷ୍ଟ୍ର ସରକାର ଉଦ୍ଧବ ଠାକରେଙ୍କ ନେତୃତ୍ୱରେ ଥିବା ଶିବସେନା, ରାଷ୍ଟ୍ରବାଦୀ କଂଗ୍ରେସ ପାର୍ଟି(ଏନସିପି) ଓ କଂଗ୍ରେସର ମହାବିକାଶ ଅଘାଡି(ଏନବିଏ) ମେଣ୍ଟର ୨୫ ନେତାଙ୍କ ସୁରକ୍ଷାକୁ ହଟାଇ ଦେଇଛନ୍ତି । ମହାରାଷ୍ଟ୍ର ସରକାରଙ୍କ ଜଣେ ଅଧିକାରୀ ଶୁକ୍ରବାର ଏହି ସୂଚନା ଦେଇଛନ୍ତି । ସରକାରଙ୍କ ଏହି ପଦକ୍ଷେପ ପରେ ଉକ୍ତ ୨୫ ନେତାଙ୍କୁ ସେମାନଙ୍କ ଘରେ ଅବା ଏସକର୍ଟ ବାହାରେ ସ୍ଥାୟୀ ପୋଲିସ ସୁରକ୍ଷା ମିଳିବ ନାହିଁ ।
ଉକ୍ତ ଅଧିକାରୀଙ୍କ ସୂଚନା ଅନୁଯାୟୀ, ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଓ ତାଙ୍କ ପରିବାରର ସୁରକ୍ଷା ପୂର୍ବଭଳି ବଳବତ୍ତର ରହିଛି । ଏଥିରେ କୌଣସି ପରିବର୍ତ୍ତନ କରାଯାଇ ନାହିଁ । ସେହିପରି ଏନସିପି ଅଧ୍ୟକ୍ଷ ଶରଦ ପାୱାର ଓ ତାଙ୍କ ଝିଅ ଲୋକ ସଭା ଏମପି ସୁପ୍ରିୟା ସୁଲେଙ୍କ ସମେତ ତାଙ୍କ ପରିବାରର ସୁରକ୍ଷା ବ୍ୟବସ୍ଥା ପୂର୍ବପରି ରହିଛି । ହେଲେ ଜୟନ୍ତ ପାଟିଲ, ଛଗନ ଭୁଜବଳ ଓ ଜେଲରେ ଥିବା ଅନିଲ ଦେଶମୁଖଙ୍କ ଭଳି ନେତାଙ୍କର ସୁରକ୍ଷାକୁ ହଟାଇ ଦିଆଯାଇଛି ।
