ନୂଆଦିଲ୍ଲୀ,୯ ।୩: ମୁମ୍ବାଇ ସମୁଦ୍ର କୂଳରେ ଥିବା ଐତିହାସିକ ଗେଟ ୱେ ଅଫ ଇଣ୍ଡିଆ ଏବେ ବିପଦରେ । ଏହାର ନିର୍ମାଣ ପାଖାପାଖି ୧୦୦ ବର୍ଷ ପୁରୁଣା ହେବ । ୨୦୨୪ରେ ଏହା ୧୦୦ ବର୍ଷ ପୂରଣ କରିନେବ । ଏହା ପ୍ରତି ଆସିଥିବା ବିପଦକୁ ନେଇ ମହାରାଷ୍ଟ୍ରର ପ୍ରତ୍ନତତ୍ତ୍ୱ ବିଭାଗ ଏକ ଷ୍ଟ୍ରକ୍ଚରାଲ ଅଡିଟ ରିପୋର୍ଟ ପ୍ରସ୍ତୁତ କରିଛି । ଏହି ରିପୋର୍ଟରେ ଚମକାଇବା ଭଳି ତଥ୍ୟ ଦିଆଯାଇଛି ।
ରାଜ୍ୟ ପତ୍ନତତ୍ତ୍ୱ ବିଭାରର ରିପୋର୍ଟ ଅନୁଯାୟୀ, ଗେଟ ୱେ ଅଫ ଇଣ୍ଡିଆର ମୂଳଦୁଆ ଓ ପାଚେରିରେ ଫାଟ ସୃଷ୍ଟି ହେଉଛି । ଫଳରେ ଏହା ଦୁର୍ବଳ ହେବାରେ ଲାଗିଛି । ଏବେ ଏହାକୁ ମରାମତି କରିବା ଜରୁରୀ ହୋଇପଡିଛି । ରାଜ୍ୟ ପ୍ରତ୍ନତତ୍ତ୍ୱ ବିଭାଗ ମହାରାଷ୍ଟ୍ର ସରକାରଙ୍କୁ ଗେଟ ୱେ ଅଫ ଇଣ୍ଡିଆକୁ ମରାମତି କରିବାକୁ ସୂଚନା ଦେଇଛନ୍ତି ।
ସୂଚନାଯୋଗ୍ୟ, ୧୯୨୪ରେ ଗେଟ ୱେ ଅଫ ଇଣ୍ଡିଆ ମୁମ୍ବାଇର ସମୁଦ୍ର କୂଳରେ ନିର୍ମାଣ କରାଯାଇଥିଲା । କୁହାଯାଏ କି ସେ ସମୟରେ କିଙ୍ଗ ଜର୍ଜ ପଞ୍ଚମଙ୍କ ସ୍ୱାଗତ ପାଇଁ ଏହାକୁ ନିର୍ମାଣ କରାଯାଇଥିଲା । କିଙ୍ଗ ଜର୍ଜ ପଞ୍ଚମ ତାଙ୍କ ଭାରତ ଗସ୍ତ ସମୟରେ ପ୍ରଥମେ ଏହି ଗେଟ ଦେଇ ପ୍ରବେଶ କରିଥିଲେ । ଇଂରେଜଙ୍କ ଶେଷ ଦଳ ବି ଏହି ଗେଟ ୱେ ଅଫ ଇଣ୍ଡିଆ ବାଟ ଦେଶ ଭାରତ ଛାଡି ଚାଲି ଯାଇଥିଲେ ବୋଲି କୁହାଯାଏ । ଆଉ ଭାରତ ବ୍ରିଟିଶ ମୁକ୍ତ ହୋଇ ସ୍ୱାଧିନତା ପାଇଥିଲା ।
