ଭୋପାଳ,୧୮।୫: କରୋନା ସମୟରେ ହସ୍ପିଟାଲରେ ରୋଗୀଙ୍କୁ ଭଲ ସ୍ବାସ୍ଥ୍ୟସେବା ଯୋଗାଇଦିଆଯାଉଛି ବୋଲି ସରକାର ଡିଣ୍ଡିମ ପିଟୁଛନ୍ତି। ହେଲେ ମଧ୍ୟପ୍ରଦେଶ ରାଜଗଡ଼ ଜିଲାରୁ ଆସିଥିବା ଏକ ଭିଡିଓ ଏହାର ବାସ୍ତବିକ ଚିତ୍ର ସାମ୍ନାକୁ ଆଣିଛି। ସୂଚନାଯୋଗ୍ୟ, ଗତବର୍ଷ ରାଜଗଡ଼ ଜିଲାର ଏକ ସରକାରୀ ହସ୍ପିଟାଲରେ ଥିବା ପୁରୁଣା ବିଲ୍ଡିଂରେ କୋଭିଡ ଆଇସିୟୁ ଓ୍ବାର୍ଡ ଖୋଲାଯାଇଥିଲା। କରୋନା ରୋଗୀଙ୍କୁ ଚିକିତ୍ସା ଯୋଗାଇଦେବା ଲାଗି ଲକ୍ଷାଧିକ ଟଙ୍କା ଖର୍ଚ୍ଚ କରି ଏହି ଓ୍ବାର୍ଡ ତିଆରି କରାଯାଇଥିଲା। ହେଲେ ଚଳିତ ବର୍ଷର ପ୍ରଥମ ବର୍ଷା ଯୋଗୁ ଆଇସିୟୁ ଛାତରୁ ବର୍ଷା ପାଣି ପଡ଼ୁଥିବାର ଦେଖିବାକୁ ମିଳିଛି। ଛାତରୁ ପାଣି ପଡ଼ିବାରୁ ରୋଗୀଙ୍କୁ ବହୁ ଅସୁବିଧାର ସମ୍ମୁଖୀନ ହେବାକୁ ପଡ଼ିଛି। ସହରରେ ଯେତିକି ସମୟ ପର୍ଯ୍ୟନ୍ତ ବର୍ଷା ହୋଇଥିଲା ସେତିକି ସମୟ ପର୍ଯ୍ୟନ୍ତ ରୋଗୀଙ୍କୁ ହନ୍ତସନ୍ତ ହେବାକୁ ପଡ଼ିଥିଲା। ବର୍ଷା ପାଣିରୁ ବର୍ତ୍ତିବା ପାଇଁ ରୋଗୀମାନେ ଏପଟ ସେପଟ ଯିବାକୁ ଲାଗିଥିଲେ। ହେଲେ ଏଥିରୁ ତ୍ରାହି ମିଳି ନ ଥିଲା। ସେଠାରେ କରୋନା ରୋଗୀଙ୍କ ମଧ୍ୟରୁ ଜଣେ ବ୍ୟକ୍ତି ଏହାର ଭିଡିଓ ଉତ୍ତୋଳନ କରି ଟୁଇଟରରେ ଶେୟାର କରିଥିଲେ। ଅନ୍ୟପଟେ ଏହି ଭିଡିଓକୁ କଂଗ୍ରେସ ବିଧାୟକ ବାପୁ ସିଂହ ତନ୍ଓ୍ବାର ଟୁଇଟରରେ ଶେୟାର କରି ମୁଖ୍ୟମନ୍ତ୍ରୀ ଶିବାରାଜ ଚୌହାନଙ୍କୁ ଟାର୍ଗେଟ କରିବା ସହ ଏହି ଘଟଣାକୁ ନିନ୍ଦା କରିଛନ୍ତି।
