ପାଟନା,୨୮।୮: ବିହାରର ମଧେପୁରା ଜିଲାରୁ ରକ୍ଷାବନ୍ଧନ ଦିନ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ପତ୍ନୀଙ୍କୁ ତାଙ୍କ ବାପଘରେ ଛାଡ଼ିବା ପାଇଁ ବାଇକରେ ନେଇ ଯାଉଥିବା ଜଣେ ଯୁବକ ମିଠା କିଣିବାକୁ ଯାଇ ଫେରାବା ବେଳକୁ ସ୍ତ୍ରୀ ସେଠାରେ ଆଉ ନଥିଲେ। ବହୁ ଖୋଜାଖୋଜି ପରେ ମଧ୍ୟ ତାଙ୍କର କୌଣସି ପତ୍ତା ନମିଳିବାରୁ ପରିବାର ଲୋକେ ପୋଲିସକୁ ଖବର ଦେଇଥିଲେ। ତଦନ୍ତ ପରେ ଘଟଣା ପଛରେ ପ୍ରେମ ସମ୍ପର୍କ ଥିବା ଜଣାପଡ଼ିଥିଲା। ପୋଲିସ ପ୍ରାୟ ଦୁଇ ଘଣ୍ଟା ମଧ୍ୟରେ ନବବିବାହିତାଙ୍କୁ ଉଦ୍ଧାର କରିବା ସହ ତାଙ୍କ କଥିତ ପ୍ରେମିକଙ୍କୁ ମଧ୍ୟ ଧରିଛି।
ଘଟଣାଟି ମଧେପୁରା ଜିଲାର ଚୌସା ଥାନା ଅଞ୍ଚଳର ଚୌସା ବସ୍ଷ୍ଟାଣ୍ଡରେ ଘଟିଛି। ପୋଲିସ ସୂଚନା ଅନୁସାରେ, ଭାଗଲପୁର ଜିଲାର ନାରାୟଣପୁର ଥାନା ଜିଲାର ଜିଲ୍ଲାର ବଡ଼ହରା କୋଠି ଥାନା ଅଞ୍ଚଳର ସୁଖସେନା ନିବାସୀ ତାରାବତୀ କୁମାରୀଙ୍କ ସହ ହୋଇଥିଲା।
ବିବାହର ପ୍ରାୟ ୧୯ ଦିନ ପରେ ରକ୍ଷାବନ୍ଧନ ଅବସରରେ ପିଣ୍ଟୁ ପତ୍ନୀଙ୍କୁ ବାପଘରେ ଛାଡ଼ିବା ପାଇଁ ବାଇକରେ ନେଇ ବାହାରିଥିଲେ। ଉଭୟ ପୂର୍ଣ୍ଣିଆ-ମଧେପୁରା ସୀମା ନିକଟ ଚୌସା ବସ୍ଷ୍ଟାଣ୍ଡରେ କିଛି ସମୟ ପାଇଁ ଅଟକିଥିଲେ। ଏହି ସମୟରେ ତାରାବତୀ ରକ୍ଷାବନ୍ଧନ ପାଇଁ ମିଠା କିଣି ଆଣିବାକୁ ସ୍ବାମୀଙ୍କୁ କହିଥିଲେ।
ପିଣ୍ଟୁ ପତ୍ନୀଙ୍କୁ ସେଠାରେ ଛାଡ଼ି ନିକଟସ୍ଥ ଦୋକାନକୁ ମିଠା କିଣିବାକୁ ଯାଇଥିଲେ। ହେଲେ ମିଠା ନେଇ ଫେରିବା ପରେ ବାଇକ ପାଖରେ ପତ୍ନୀଙ୍କୁ ଦେଖିବାକୁ ପାଇନଥିଲେ। ଆଖପାଖରେ ଖୋଜାଖୋଜି କରିଥିଲେ ମଧ୍ୟ କୌଣସି ସୂଚନା ମିଳିନଥିଲା। ଏହାପରେ ସେ ଶ୍ୱଶୁରଘର ଲୋକଙ୍କୁ ଜଣାଇଥିଲେ। ପରିବାର ସଦସ୍ୟମାନେ ମଧ୍ୟ ଘଟଣାସ୍ଥଳରେ ପହଞ୍ଚି ଖୋଜାଖୋଜି ଆରମ୍ଭ କରିଥିଲେ।
ବହୁ ଖୋଜାଖୋଜି ପରେ ମଧ୍ୟ ତାରାବତୀଙ୍କ ପତ୍ତା ନମିଳିବାରୁ ରାତି ପ୍ରାୟ ୧୨ଟାରେ ଡାଏଲ-୧୧୨କୁ ଖବର ଦିଆଯାଇଥିଲା। ପୋଲିସ ଟିମରେ ଥିବା ରାହୁଲ ରାଜ ଓ ଡ୍ରାଇଭର ଚନ୍ଦ୍ରଶେଖର ଯାଦବ ଘଟଣାର ତଦନ୍ତ ଆରମ୍ଭ କରିଥିଲେ।
ପୋଲିସ ପରିବାର ଲୋକଙ୍କଠାରୁ ସୂଚନା ନେବା ସହ ମୋବାଇଲ ଟାୱାର ଲୋକେସନ ଓ ଅନ୍ୟାନ୍ୟ ସୁରାକ ଆଧାରରେ ଯୁବତୀଙ୍କୁ ଖୋଜିଥିଲା। ତଦନ୍ତ ସମୟରେ ପୋଲିସ କଥିତ ପ୍ରେମିକ ଉତ୍କର୍ଷ କୁମାରଙ୍କ ପରବତ୍ତା ଥାନା ଅଞ୍ଚଳର ବୋରୱାସ୍ଥିତ ଘରେ ପହଞ୍ଚିଥିଲା। ପୋଲିସ ଉତ୍କର୍ଷଙ୍କୁ ହେପାଜତକୁ ନେଇ ପଚରାଉଚରା କରିଥିଲା। ପୋଲିସର ଦାବି ଅନୁସାରେ, ପଚରାଉଚରା ବେଳେ ସେ ତାରାବତୀଙ୍କୁ ରାଘୋପୁର ବହତରାସ୍ଥିତ ତାଙ୍କ ମାଆଙ୍କ ଘରେ ରଖାଯାଇଥିବା କହିଥିଲେ।