କୁଜଙ୍ଗ,୧୫ା୬ (ଡି.ଏନ୍.ଏ.): ଗ୍ରାମାଞ୍ଚଳରେ କାମ ଧନ୍ଦା ଯୋଗାଇଦେବା ଲକ୍ଷ୍ୟରେ ଏମ୍ଜିଏନ୍ଆର୍ଇଜିଏସ୍ (ମହାତ୍ମାଗାନ୍ଧୀ ଜାତୀୟ ନିଶ୍ଚିନ୍ତ କର୍ମନିଯୁକ୍ତି ଯୋଜନା) ପ୍ରଣୟନ କରାଯାଇଥିଲା। ମାତ୍ର କୁଜଙ୍ଗ ବ୍ଲକରେ ଏହି ଯୋଜନା ପ୍ରହସନ ପାଲଟିଛି। ଏହି ବ୍ଲକର ୨୮ ପଞ୍ଚାୟତରେ ଏମ୍ଜିଏନ୍ଆରଇଜିଏସ୍ କାମ ଚାଲିଛି। କିନ୍ତୁ ବର୍ଷା ଦିନ ପୂର୍ବରୁ ଏହି କାର୍ଯ୍ୟକୁ କୌଣସି ପ୍ରକାରେ ସାରିବା ନିମନ୍ତେ ଜବ୍କାର୍ଡଧାରୀଙ୍କ ବଦଳରେ ଜେସିବି ମେଶିନ ବ୍ୟବହାର କରାଯାଉଛି। ଏମ୍ଜିଏନ୍ଆରଇଜିଏସ୍ରେ ଅନୁମୋଦନ ହୋଇଥିବା ଏହି କାମରେ ଜବକାର୍ଡଧାରୀ କାମ କରୁ ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ଫଳରେ କାମ ନ ପାଇ ଜବ୍କାର୍ଡଧାରୀଙ୍କୁ ହତାଶ ହେବାକୁ ପଡ଼ୁଛି। ଏନେଇ କୁଜଙ୍ଗ ଜନଶୁଣାଣିରେ ଲିଖିତ ଅଭିଯୋଗ କରାଯାଇଥିଲା। ଏହାସତ୍ତ୍ୱେ କୌଣସି ସୁଫଳତା ମିଳୁନାହିଁ। ସେହିପରି ପ୍ରକଳ୍ପ ସ୍ଥଳରେ ସୂଚନା ଫଳକ ଓ ଜିଇଓ ଟ୍ୟାଗିଂ କରିବାର ନିୟମ ଥିଲେ ସୁଦ୍ଧା ଏହାକୁ ଉଲ୍ଲଂଘନ କରଯାଉଛି। ଆଉ କିଛି ବ୍ୟକ୍ତି ଜେସିବି, ଟ୍ରାକ୍ଟର ସହାୟତାରେ ଟ୍ରିପ୍ ଟ୍ରିପ୍ ମାଟି ଉତ୍ତୋଳନ କରି ଉକ୍ତ କାର୍ଯ୍ୟ କରୁଥିଲେ ମଧ୍ୟ ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନିଆଯାଉନାହିଁ। ଏନେଇ ୫-ଟି ସଚିବ, ଜିଲାପାଳ, ଦୁର୍ନୀତି ନିବାରଣ ବିଭାଗ, ପ୍ରକଳ୍ପ ନିର୍ଦ୍ଦେଶକଙ୍କ ଦୃଷ୍ଟି ଆକର୍ଷଣ କରିବାକୁ ଦାବି ହୋଇଛି। ଏ ସମ୍ପର୍କରେ ବିଡିଓ ସୌମ୍ୟଶ୍ରୀ ପାଣିଗ୍ରାହୀ କହିଛନ୍ତି, ୨ ଶହ ୨୦ ଟଙ୍କାରେ କେହି କାମ କରିବାକୁ ରାଜି ହେଉନାହାନ୍ତି। ଏଥିଯୋଗୁ ବହୁ ପରିମାଣର ମାଟି ଉଠା କାର୍ଯ୍ୟରେ ମେଶିନ ବ୍ୟବହାର କରାଯାଉଛି।
