ଭବାନୀପାଟଣା ୧।୬(ଉତ୍ତମ କୁମାର ଦାଶ): କଳାହାଣ୍ଡି ଜିଲା ଭବାନୀପାଟଣା ସ୍ଥିତ ମା’ ମାଣିକେଶ୍ୱରୀ ବିଶ୍ୱବିଦ୍ୟାଳୟର ଶେଷ ବର୍ଷ ସ୍ନାତକ ପରୀକ୍ଷାର ଫଳାଫଳ ପ୍ରକାଶ ପାଇଛି। ଏହି ଫଳାଫଳରେ ଭବାନୀପାଟଣା ସହର ନିକଟସ୍ଥ ପ୍ରଗତି ମହାବିଦ୍ୟାଳୟ ସଫଳତା ହାସଲ କରିଛି। ଚଳିତ ବର୍ଷ ସ୍ନାତକ ପରୀକ୍ଷାରେ ପ୍ରଗତି ମହାବିଦ୍ୟାଳୟର ତିନି ଜଣ ମେଧାବୀ ଛାତ୍ରୀ ଭିନ୍ନ ଭିନ୍ନ ବିଷୟରେ ବିଶ୍ୱବିଦ୍ୟାଳୟ ସ୍ତରରେ ଶୀର୍ଷ ସ୍ଥାନ ଅଧିକାର କରିଛନ୍ତି।ଅର୍ଚ୍ଚନା ମିଶ୍ର ପଦାର୍ଥ ବିଜ୍ଞାନ ବିଭାଗରେ, ରୋଜି ସାହୁ ରସାୟନ ବିଜ୍ଞାନ ବିଭାଗରେ, ରିନୁ ଭୋଇ ଗଣିତ ବିଭାଗରେ ବିଶ୍ୱବିଦ୍ୟାଳୟ ଟପ୍ପର ହୋଇ ଜିଲା ପାଇଁ ଗୌରବ ଆଣିଛନ୍ତି। ପଦାର୍ଥ ବିଜ୍ଞାନ ବିଭାଗର ଅର୍ଚ୍ଚନା ମିଶ୍ର ୯.୧୨ ସିଜିପିଏ, ରସାୟନ ବିଜ୍ଞାନ ବିଭାଗର ରୋଜି ସାହୁ ୯.୨୭ ସିଜିପିଏ ଏବଂ ଗଣିତ ବିଭାଗର ରିନୁ ଭୋଇ ୯.୦୫ ସିଜିପିଏ ମାର୍କ ହାସଲ କରିଛନ୍ତି। ଏହି ସଫଳତା ପଛରେ ମହାବିଦ୍ୟାଳୟର ଅଧ୍ୟାପକ-ଅଧ୍ୟାପିକା, ଅଭିଭାବକ ଏବଂ ଛାତ୍ରୀଛାତ୍ରଙ୍କ ନିରନ୍ତର ପରିଶ୍ରମ ଓ ସହଯୋଗ ରହିଛି।ଏହି କୃତିତ୍ୱ ପ୍ରଗତି ମହାବିଦ୍ୟାଳୟର ଶିକ୍ଷାଗତ ମାନ ଓ ଗୁଣବତ୍ତାକୁ ଆହୁରି ସୁଦୃଢ଼ କରିଛି। ପ୍ରଗତି ଅନୁଷ୍ଠାନର ମୁଖ୍ୟ ଇଂ ଅଜୟ କୁମାର ପଣ୍ଡା, ଚେୟାରପର୍ସନ ସୁଶ୍ରୀ ସଙ୍ଗୀତ ପଣ୍ଡା, ପରିଚାଳନା ସମିତି ସଭାପତି ଲକ୍ଷ୍ମୀକାନ୍ତ ବେହେରା ଓ ଅଧ୍ୟକ୍ଷ ତାପସ ପରମାଣିକ ଟପର ଛାତ୍ରୀମାନଙ୍କୁ ଅଭିନନ୍ଦନ ଜଣାଇବା ସହ ତାଙ୍କର ଉଜ୍ଜ୍ୱଳ ଭବିଷ୍ୟତ କାମନା କରିଛନ୍ତି।