ପୁରୁଷୋତ୍ତମପୁର,୧୬।୧୦(ସବିତା ମିଶ୍ର): ଗଞ୍ଜାମ ଜିଲା ପୁରୁଷୋତ୍ତମପୁରରେ ଗଜଲକ୍ଷ୍ମୀଙ୍କ ଭସାଣି ଉତ୍ସବ ଆନନ୍ଦଉଲ୍ଲାସର ସହ ଅନୁଷ୍ଟିତ ହୋଇଯାଇଛି। ଶଙ୍ଖ ହୁଳହୁଳିର ନାଦ ସହ ବାଜବାଜଣାର ବିରାଟ ପଟୁଆରରେ ସହରବାସୀ ଭକ୍ତିର ପୂର୍ବକ ମା’ଙ୍କୁ ମେଲାଣି ଦେଇଛନ୍ତି। ହରିବୋଲ ହୁଳହୁଳି ଶବ୍ଦରେ ସମଗ୍ର ସହର ପ୍ରକମ୍ପିତ ହୋଇପଡିଥିବାବେଳେ ସହର ସାରା ଲୋକାରଣ୍ୟ ହୋଇପଡିଥିଲା। ରଥସାହିର ପୂଜା ମଣ୍ଡପରେ ପବିତ୍ର କୁମାର ପୂର୍ଣ୍ଣିମାଠାରୁ ଦୀର୍ଘ ଦଶ ଦିନ ଧରି ପୂଜା ପାଉଥିଲେ ମା’ ଗଜଲକ୍ଷ୍ମୀ ।
ଦୀର୍ଘ ୫୦ ବର୍ଷ ଧରି ଏହି ମଣ୍ଡପରେ ପ୍ରତିବର୍ଷ ଏପରି ମା’ ପୂଜା ପାଇ ଆସୁଛନ୍ତି। ଏଠାରେ ଭଷାଣୀବେଳେ ଏକ ନିଆରା ପରମ୍ପରା ରହିଛି। ଯାହାକି ମା’ ଗଜଲକ୍ଷ୍ମୀ ପୂଜା ମଣ୍ଡପରୁ ଉଠିବା ପରେ ପ୍ରଥମେ ସାହି ଆରମ୍ଭରେ ଏବଂ ଥାନା ପରିସରରେ ଥିବା ଜଗନ୍ନାଥ ମନ୍ଦିରକୁ ଯାଇ କାଳିଆ ସାଆନ୍ତଙ୍କୁ ଦର୍ଶନ କରିବା ସହ ଲକ୍ଷ୍ମୀ ନାରାୟଣଙ୍କ ଭେଟହେବା ପରେ ହିଁ ଭଷାଣୀ ଉସବକୁ ବାହାରିଥାନ୍ତି। ଲକ୍ଷ୍ମୀ ନାରାୟଣଙ୍କ ଏହି ଭେଟ ସମୟରେ ହେଉଥିବା ମହାଆଳତିକୁ ଦେଖିବା ସହ ଆର୍ଶୀବାଦ ଭିକ୍ଷା ଲାଗି ଶହ ଶହ ସଂଖ୍ୟାରେ ମହିଳା ଓ ପୁରୁଷଙ୍କ ଭିଡ଼ କମିଥିଲା। ଏହା ସହ ଭକ୍ତଙ୍କ ହରିବୋଲ ଓ ହୁଳହୁଳି ଶବ୍ଦରେ ଅଞ୍ଚଳ ପ୍ରକମ୍ପିତ ହୋଇଉଠି ସମ୍ପୂର୍ଣ୍ଣ ଆଧାତ୍ମିକ ପରିବେଶ ସୃଷ୍ଟି ହୋଇପଡିଥିଲା। ଶହଶହ ଭକ୍ତଙ୍କ ଗହଣରେ ମା’ ବିଦାୟ ନେଇଥିବାବେଳେ ପୁଣି ଆରବର୍ଷକୁ ମା’ଙ୍କ ଆସିବା ବାଟକୁ ଭକ୍ତ ମାନେ ଚାହିଁ ବସିଛନ୍ତି । ମା’ଙ୍କୁ ବିଦାୟ ଦେବାବେଳେ ସମସ୍ତଙ୍କ ଆଖି ଛଳଛଳ ହୋଇପଡିଥିଲା।
Dharitri – Odisha’s No.1 Odia Daily
