ଡେରାବିଶ, ୧ା୧୦(ସ୍ବ.ପ୍ର.): ଡେରାବିଶ ବ୍ଲକ ତିଲଙ୍ଗଠାରେ ଥିବା ମା’ ପିଙ୍ଗଳେଶ୍ୱରୀଙ୍କ ବହୁ ପ୍ରାଚୀନ। ଏହି ପୀଠ ଏଣ୍ଡର, ହଳଦିଆପାଟଣା, ଛଚିଣା, କୁଅଁରପୁର, ପଲେଇ ସାଥି ସମାଜ, ଜଗଦମ୍ବା ମଠ, ଖରିଦାସାହି, ଭୋଳହାଟ ଓ ତିଲଙ୍ଗ ପ୍ରସିଦ୍ଧି ଲାଭ କରିଛି। ମା’ ପିଙ୍ଗଳେଶ୍ୱରୀଙ୍କ ପୀଠରେ ହେବାକୁ ଥିବା ଶାରଦୀୟ ଦୁର୍ଗାପୂଜା ଅବସରରେ ଶନିବାରଠାରୁ ପୂଜା ଆରମ୍ଭ ହେବ। ଏଥିପାଇଁ ମୃଣ୍ମୟ ଦେବୀଙ୍କ ମୂର୍ତ୍ତିରେ ଶିଳ୍ପୀଙ୍କ ରଙ୍ଗ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚତ୍ଛି। ଶନିବାର ଷଷ୍ଠୀ ତିଥିରେ ମା’ଙ୍କ ପୀଠରେ ବିଲ୍ବବରଣ, ରବିବାର ମହାସପ୍ତମୀ ପୂଜା, ସୋମବାର ମହାଷ୍ଟମୀ ଓ ସନ୍ଧିପୂଜା, ମଙ୍ଗଳବାର ମହାନବମୀ ପୂଜା ସହ ବୁଧବାର ବିଜୟା ଦଶମୀରେ ଶେଷ ହେବ ବୋଲି କମିଟିର ସଭାପତି ଅନନ୍ତ ଚରଣ ରାଉତ ସୂଚନା ଦେଇଛନ୍ତି। ତେବେ ଦୀର୍ଘବର୍ଷ ହେବ ମା’ଙ୍କ ମୁକୁଟ ସମେତ ଅଳଙ୍କାର ଚାନ୍ଦି ରୁପାରେ ନିର୍ମିତ ହୋଇଥିବାରୁ ପ୍ରତ୍ୟେହ ସନ୍ଧ୍ୟାରେ ମା’ଙ୍କର ଏହି ବେଶ ଦେଖିବାକୁ ଶ୍ରଦ୍ଧାଳୁଙ୍କ ଭିଡ଼ ପରିଲକ୍ଷିତ ହୋଇଥାଏ। ମହାଷ୍ଟମୀରେ ମା’ଙ୍କ ନିକଟରେ ମାଟି ନିର୍ମିତ ନୂଆ ହାଣ୍ଡିରେ ମାନସିିକଧାରୀ ଶ୍ରଦ୍ଧାଳୁଙ୍କ ପଣା ଭୋଗ ଏହି ପୀଠର ବିଶେଷତ୍ୱ। ପ୍ରତ୍ୟେହ ସନ୍ଧ୍ୟାରେ ପ୍ରବଚନ ଓ ଭଜନ କୀର୍ତ୍ତନ ଅନୁଷ୍ଠିତ ହେବା ସହ ବିଜୟା ଦଶମୀରେ ଘଟ ବିସର୍ଜନ ପରେ ବିଳମ୍ବିତ ରାତିରେ ଭସାଣି ଶୋଭାଯାତ୍ରା ଆରମ୍ଭ ହେବ ବୋଲି କମିଟିର ସମ୍ପାଦକ ଖଗେଶ୍ୱର ନାୟକ ଓ ନରସିଂହପୁର ସରପଞ୍ଚ ସୁଧିର କୁମାର ଖଟୁଆ କହିଛନ୍ତି। ଗତ ଦୁଇବର୍ଷ ହେବ କରୋନା କଟକଣା ପାଇଁ ମା’ଙ୍କ ପୂଜା ଫିକା ପଡ଼ିଥିଲା। ଚଳିତ ବର୍ଷ ମା’ଙ୍କ ପୀଠରେ ଶ୍ରଦ୍ଧାଳୁଙ୍କ ଭିଡ଼କୁ ପରିଲକ୍ଷିତ କରି ଡେରାବିଶ ଥାନା ପକ୍ଷରୁ ଆଇନ ଶୃଙ୍ଖଳା ପରିସ୍ଥିତି ରକ୍ଷା ପାଇଁ ସମସ୍ତ ବ୍ୟବସ୍ଥା କରାଯାଇଛି।
