ନୂଆଦିଲ୍ଲୀ,୯।୫: ଭାରତ ସରକାର ସଶସ୍ତ୍ର ବାହିନୀରେ ଗୁରୁତ୍ୱପୂର୍ଣ୍ଣ ନିଯୁକ୍ତି ଘୋଷଣା କରିଛନ୍ତି। କେନ୍ଦ୍ର ସରକାର ଲେଫ୍ଟନାଣ୍ଟ ଜେନେରାଲ ଏନ.ଏସ. ରାଜା ସୁବ୍ରମଣିଙ୍କୁ ନୂତନ ପ୍ରତିରକ୍ଷା ମୁଖ୍ୟ(CDS) ଭାବେ ନିଯୁକ୍ତ କରିଛନ୍ତି। ସେହିପରି କୃଷ୍ଣ ସ୍ବାମୀନାଥନଙ୍କୁ ନୂତନ ନୌସେନା ମୁଖ୍ୟ ଭାବ ନିଯୁକ୍ତ କରାଯାଇଛି।
ପ୍ରତିରକ୍ଷା ମନ୍ତ୍ରଣାଳୟ ସୂଚନା ଅନୁଯାୟୀ , ଲେଫ୍ଟନାଣ୍ଟ ଜେନେରାଲ ରାଜା ସୁବ୍ରମଣି(ଅବସରପ୍ରାପ୍ତ) ଅନିଲ ଚୌହାନଙ୍କ ସ୍ଥାନ ନେବେ, ଯାହାଙ୍କ କାର୍ଯ୍ୟକାଳ ମେ ୩୦ରେ ଶେଷ ହେଉଛି। ଭାଇସ ଆଡମିରାଲ ସ୍ବାମୀନାଥନ ଦିନେଶ କେ. ତ୍ରିପାଠିଙ୍କ ଠାରୁ ଦାୟିତ୍ୱ ଗ୍ରହଣ କରିବେ। ଯିଏ ମେ ୩୧ରେ ଅବସର ନେବାକୁ ଯାଉଛନ୍ତି।
ଏପରିକି ଲେଫ୍ଟନାଣ୍ଟ ଜେନେରାଲ ସୁବ୍ରମଣି ସାମରିକ ବ୍ୟାପାର ବିଭାଗର ସଚିବ ଭାବେ ମଧ୍ୟ କାର୍ଯ୍ୟ କରିବେ। ତାଙ୍କର ନିଯୁକ୍ତି ଦାୟିତ୍ୱ ଗ୍ରହଣ କରିବା ତାରିଖରୁ କାର୍ଯ୍ୟକାରୀ ହେବ ଏବଂ ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ କାର୍ଯ୍ୟ କରିବେ।
ସେ ୨୦୨୫ ସେପ୍ଟେମ୍ବର ୧ତାରିଖରୁ ଜାତୀୟ ସୁରକ୍ଷା ପରିଷଦ ସଚିବାଳୟରେ ସାମରିକ ପରାମର୍ଶଦାତା ଭାବରେ କାର୍ଯ୍ୟ କରୁଛନ୍ତି। ପୂର୍ବରୁ, ସେ ୨୦୨୪ ଜୁଲାଇରୁ ୨୦୨୫ ଜୁଲାଇ ପର୍ଯ୍ୟନ୍ତ ସେନାର ଉପାଧ୍ୟକ୍ଷ ପଦବୀରେ ରହିଥିଲେ। ୨୦୨୩ ମାର୍ଚ୍ଚରୁ ୨୦୨୪ ଜୁନ ପର୍ଯ୍ୟନ୍ତ କେନ୍ଦ୍ରୀୟ କମାଣ୍ଡର ଜେନେରାଲ ଅଫିସର କମାଣ୍ଡିଂ-ଇନ-ଚିଫ ଭାବରେ କାର୍ଯ୍ୟ କରିଥିଲେ।
ଭାଇସ ଆଡମିରାଲ ସ୍ବାମୀନାଥନ ଜୁଲାଇ ୩୧, ୨୦୨୫ରେ ପଶ୍ଚିମ ନୌସେନା କମାଣ୍ଡର ୩୪ତମ ଫ୍ଲାଗ ଅଫିସର କମାଣ୍ଡିଂ ଇନ ଚିଫ ଭାବରେ ଦାୟିତ୍ୱ ଗ୍ରହଣ କରିଥିଲେ।