କୁଜଙ୍ଗ,୨୦।୮(ଡି.ଏନ୍.ଏ.): କୁଜଙ୍ଗ ବ୍ଲକରେ ୫ ଦିନ ହେବ ଜଳବନ୍ଦୀ ଥିବା ବନ୍ୟାବିପନ୍ନଙ୍କ ଦୁର୍ଦ୍ଦଶା ବଢ଼ିଯାଇଛି। ଗୁରୁବାର ରାତିରୁ ପୁନର୍ବାର ଲଘୁଚାପଜନିତ ବର୍ଷା ଆରମ୍ଭ ହୋଇଛି। ଏନେଇ ସେମାନଙ୍କ ଚିନ୍ତା ବଢ଼ିଯାଇଛି। କୁଜଙ୍ଗ ବ୍ଲକର ୧୦ ପଞ୍ଚାୟତର ପ୍ରାୟ ୧୩ ହଜାର ଲୋକ ଏବେ ସୁଦ୍ଧା ପାଣି ଘେରରେ ରହିଛନ୍ତି। ବନ୍ୟା ସାମାନ୍ୟ ହ୍ରାସ ପାଇଥିଲେ ମଧ୍ୟ ଏବେବି ଘରଦ୍ୱାର, ଗା ଁଗଣ୍ଡା, ରାସ୍ତାଘାଟରେ ୫ ଫୁଟ୍ ଉଚ୍ଚର ପାଣି ଲହଡ଼ି ଭାଙ୍ଗୁଛି। ଲୋକମାନେ ଗାଁ ଦାଣ୍ଡରେ ଯାତାୟାତପାଇଁ ଭେଳାର ଆଶ୍ରୟ ନେଉଛନ୍ତି। ବହୁ ସ୍ଥାନରେ ଘରଦ୍ୱାର ଭାଙ୍ଗିଯାଇଛି। ଛାତ ଉପରେ ଜରିପାଲ ଟାଣି ରହିଥିଲାବେଳେ ତୁହାକୁ ତୁହା ଲଘୁଚାପଜନିତ ବର୍ଷା ଜନଜୀବନକୁ ଅସ୍ତବ୍ୟସ୍ତ କରିପକାଇଛି ା ଅନେକ ସ୍ଥାନରେ ଗୋରୁ ଖୋଲା ଆକାଶ ତଳେ ବନ୍ଧା ହୋଇ ରହିଛନ୍ତି ା ବହୁ ସ୍ଥାନରେ ବନ୍ୟା ଦୁର୍ଗତଙ୍କ ନିକଟରେ ପ୍ରଶାସନ ପହଞ୍ଚତ୍ ପାରି ନ ଥିବା ଅଭିଯୋଗ ହେଉଥିବା ବେଳେ ଏପର୍ଯ୍ୟନ୍ତ କୌଣସି ସରକାରୀ ରିଲିଫ୍ ନ ପାଇ ସେମାନେ ହନ୍ତସନ୍ତ ହେଉଛନ୍ତି।
ଅପରପକ୍ଷେ ୫ମ ଦିନରେ ସମୁଦ୍ରକୁ ଶଙ୍ଖେଭଳି କିଛି ସ୍ଥାନରେ ଚୁଡା, ଗୁଡ଼, ଗୋଖାଦ୍ୟ ଓ ଜରିପାଲ ଦିଆଯାଇଥିବା କୁହାଯାଇଛି। କୁଜଙ୍ଗ ବ୍ଲକ ଜିଲାନାସି ପଞ୍ଚାୟତର ଜୟଶଙ୍ଖପୁର ଗ୍ରାମର ସର୍ବେଶ୍ୱର ବେହେରାଙ୍କ ଚାଳଘର ଭୁଶୁଡିଯାଇଛି। ଘରର କାନ୍ଥ ବେହେରାଙ୍କ ଉପରେ ପଡ଼ିବାରୁ ସେ ଆହତ ହୋଇଛନ୍ତି। ୨ ଦିନ କାଳ ପାଣି ଘେରରେ ରହି ଯନ୍ତ୍ରଣା ପାଇବା ପରେ ଗୁରୁବାର ତାଙ୍କୁ ଏକ ହୁଲି ଡଙ୍ଗା ସାହାଯ୍ୟରେ ମୁଖ୍ୟ ରାସ୍ତାକୁ ଅଣାଯାଇ ଜଗତ୍ସିଂହପୁର ଚିକିତ୍ସାଳୟରେ ଚିକିତ୍ସା କରାଯାଇଛି। ମାତ୍ର ଏପର୍ଯ୍ୟନ୍ତ ତାଙ୍କ ପାଖରେ କୌଣସି ରିଲିଫ ସାମଗ୍ରୀ ପହଞ୍ଚତ୍ ନାହିଁ ବୋଲି ସେ ଅଭିଯୋଗ କରିଛନ୍ତି। ଜୟଶଙ୍ଖପୁରର ପ୍ରଶାନ୍ତ ବେହେରା, ମହେଶ୍ୱର ବେହେରା, ଲକ୍ଷ୍ମୀପ୍ରିୟା ବେହେରାଙ୍କ କହିବାନୁଯାୟୀ, ୫ ଦିନପରେ ସେମାନଙ୍କୁ ଗଣ୍ଡେ ଚୁଡା, କିଛି ଗୁଡ ଓ ଗୋଟିଏ ଲେଖାଏ ଜରିପାଲ ଯୋଗାଇ ଦିଆଯାଇଛି। ଜିଲାନାସୀର ତପନ ସାମନ୍ତରାୟ କହିଛନ୍ତି, ଯେତିକି ଗୋଖାଦ୍ୟ ଆସିଛି ତାହା ସମୁଦ୍ରକୁ ଶଙ୍ଖେ। ଏ ସମ୍ପର୍କରେ ପ୍ରଶାସନ ତରଫରୁ କୁଜଙ୍ଗ ବିଡିଓ କହିଛନ୍ତି, ଏପର୍ଯ୍ୟନ୍ତ ୧୦ ପଞ୍ଚାୟତର ବନ୍ୟାବିପନ୍ନଙ୍କ ପାଇଁ ୯୧କୁଇଣ୍ଟାଲ ଚୁଡା, ୨୮ କୁଇଣ୍ଟାଲ ଗୁଡ, ୫୫ ପେଟି ବିସ୍କୁଟ ଯୋଗାଇ ଦିଆଯାଇଛି। ଜନସାଧାରଣଙ୍କ ନିକଟରେ ରିଲିଫ ପହଞ୍ଚତ୍ ନ ଥିବା ଅଭିଯୋଗ ସଂକ୍ରାନ୍ତରେ ବିଡିଓ ସୌମଶ୍ରୀ ପାଣିଗ୍ରାହୀ କହିଛନ୍ତି, ଆମ୍ଭେ ଜନ ପ୍ରତିନିଧିଙ୍କ ହାତରେ ରିଲିଫ୍ ଦେଇଛୁ ା ଯଦି ସେମାନେ ନ ବାଣ୍ଟିବେ ସେଥିପାଇଁ ମୁଁ ଦୁଃଖିତ। ବନ୍ୟାବିପନ୍ନଙ୍କ ପାଇଁ ଯୋଗାଇଦିଆଯାଇଥିବା ବୋଟ୍ ପର୍ଯ୍ୟାପ୍ତ ହେଉ ନ ଥିବା ଅଭିଯୋଗ ସମ୍ପର୍କରେ ବିଡିଓ ପାଣିଗ୍ରାହୀ କହିଛନ୍ତି, ପ୍ରଶାସନ ପକ୍ଷରୁ ସରକାରୀ ବୋଟ ୫ଟା ଓ ଘରୋଇ ବୋଟ ୧୯ଟା ଯୋଗାଇ ଦିଆଯାଇଛି। ବିଭିନ୍ନ ଶିଳ୍ପ ସଂସ୍ଥା ମହମବତୀ ଓ ଦିଆସିଲି ଯୋଗାଇ ଦେଇଥିଲେ ବି ଏହା ଜନସାଧାରଣଙ୍କ ନିକଟରେ ପହଞ୍ଚତ୍ ପାରିନାହିଁ ବୋଲି ଜିଲାନାସୀ ସରପଞ୍ଚଙ୍କ ପ୍ରତିନିଧି ଅଭୟ ପରିଡା କହିଛନ୍ତି। ଏନେଇ ତୁରନ୍ତ ପଦକ୍ଷେପ ନେବାକୁ ସେ ଦାବି କରିଛନ୍ତି।
