ବାରିପଦା/ ଝାରପୋଖରିଆ,୧୯ା୯ (ନୀଳାଦ୍ରି ବିହାରୀ ଦଣ୍ଡପାଟ/ସୁଧୀର କୁମାର ମହାନ୍ତ):ମୟୂରଭଞ୍ଜ ଜିଲା ଝାରପୋଖରିଆ ଥାନା ଅଞ୍ଚଳରେ ପ୍ରେମ ସମ୍ପର୍କରୁ ନେଇ ଏକ ଅଶୋଭନୀୟ ଘଟଣା ଘଟିଛି। ଜଣେ ବିବାହିତା ମହିଳାଙ୍କ ଘରକୁ ଆସିଥିବା ଯୁବକଙ୍କୁ ସ୍ଥାନୀୟ ଲୋକେ ଗଛରେ ବାନ୍ଧି ମାଡ଼ ମାରିବା ସହ ଦିନକ ପରେ ପୋଲିସ ଜିମା ଦେଇଛନ୍ତି। ଏହି ଘଟଣାର ଭିଡିଓ ଭାଇରାଲ ପରେ ଚର୍ଚ୍ଚାର ବିଷୟ ପାଲଟିଛି।
ଅନୁଯାୟୀ, ସାରସକଣା ବ୍ଲକ ଅନ୍ତର୍ଗତ ଯୋକା ପଞ୍ଚାୟତର ଜଣେ ବିବାହିତା ମହିଳାଙ୍କ ସହ ଝାରପୋଖରିଆ ଥାନା ଅଧୀନ ମୁରୁଣିଆଁ ପଞ୍ଚାୟତ ଗତିଲା ଗ୍ରାମର ଜଣେ ଯୁବକଙ୍କର ଇନଷ୍ଟାଗ୍ରାମ ମାଧ୍ୟମରେ ପରିଚୟ ହୋଇଥିଲା। ପରବର୍ତ୍ତୀ ସମୟରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ିଉଠିଥିଲା। ଯୁବକ ଜଣକ ମହିଳାଙ୍କ ଘରକୁ ଆସିଥିବା ବେଳେ ସ୍ଥାନୀୟ ଲୋକେ ଉଭୟଙ୍କୁ ଧରି ଏକ ଗଛରେ ବାନ୍ଧି ଅଟକ ରଖିବା ସହ ମାଡ଼ ମାରିଥିଲେ। ଦୁଇ ଦିନ ଧରି ଉଭୟଙ୍କୁ ଅଟକ ରଖାଯିବାର ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ୍ ହେବାପରେ ଲୋକେ ସେମାନଙ୍କୁ ଝାରପୋଖରିଆ ପୋଲିସ ଜିମା ଦେଇଥିଲେ। ପୋଲିସ ଦୁହିଁଙ୍କ ପରିବାରକୁ ଥାନାକୁ ଡକାଇ ଆପୋଷ ମିଳାମିଶା କରିବା ପରେ ଉଭୟଙ୍କୁ ସେମାନଙ୍କ ପରିବାର ଲୋକଙ୍କୁ ହସ୍ତାନ୍ତର କରିଥିବା ଝାରପୋଖରିଆ ଥାନା ଅଧିକାରୀ ସତ୍ୟବ୍ରତ ଗ୍ରହାଚାର୍ଯ୍ୟ ସୂଚନା ଦେଇଛନ୍ତି।