ଚଣ୍ଡିଖୋଲ,୨।୩(ଡି.ଏନ.ଏ.): ଚଳିତ ପଞ୍ଚାୟତ ନିର୍ବାଚନରେ ବଡ଼ଚଣା ବ୍ଲକରେ ବହୁ ହେଭିୱେଟ୍ ନେତାଙ୍କୁ ପରାଜୟର ସ୍ବାଦ ଚାଖିବାକୁ ପଡ଼ିଛି। ସମସ୍ତ ୫ଟି ଜିଲାପରିଷଦ ଜୋନ୍ ବିଜେଡି ହାତେଇ ନେଇଛି। ମାତ୍ର ସରପଞ୍ଚ ଓ ସମିତିସଭ୍ୟ ପଦବୀରେ ଲଢ଼େଇ କରି ଦଳୀୟ ସମର୍ଥିତ ପ୍ରାର୍ଥୀ ପରାଜିତ ହୋଇଛନ୍ତି। ପୂର୍ବରୁ ବିଜେଡି ବ୍ଲକ ଅଧ୍ୟକ୍ଷା ଓ ୨ ଥର ଜିଲା ପରିଷଦ ସଭ୍ୟ ହୋଇଥିବା ଇତିଶ୍ରୀ ସାମଲ ଏଥର ପରାଜିତ ହୋଇଛନ୍ତି। ସେ ଗୋପାଳପୁର ପଞ୍ଚାୟତରୁ ସମିତିସଭ୍ୟ ପ୍ରାର୍ଥୀ ଭାବେ ନିର୍ବାଚନ ଲଢ଼ିଥିଲେ। ୨୦୦୭ ପଞ୍ଚାୟତ ନିର୍ବାଚନରେ ଗୋପାଳପୁର ସମିତିସଭ୍ୟ ଭାବେ ନିର୍ବାଚିତ ହୋଇ ବ୍ଲକ ଅଧ୍ୟକ୍ଷା ହୋଇଥିଲେ। ୨୦୧୨ ଓ ୨୦୧୭ ପଞ୍ଚାୟତ ନିର୍ବାଚନରେ ୧୯ ନଂ. ଜିଲା ପରିଷଦ ଜୋନରୁ ସେ ନିର୍ବାଚିତ ହୋଇଥିଲେ। ୨୦ ନଂ. ଜିଲା ପରିଷଦ ସଭ୍ୟ ଥିବା ବିପିନ ବିହାରୀ ଜେନା ଏବେ ବ୍ଲକ ବିଜେଡି ସାଧାରଣ ସମ୍ପାଦକ ଅଛନ୍ତି। ତାଙ୍କ ସ୍ତ୍ରୀ ପୂର୍ଣ୍ଣିମା ଜେନାଙ୍କୁ ଗୋପାଳପୁର ସରପଞ୍ଚ ପ୍ରାର୍ଥୀ କରିଥିଲେ ମଧ୍ୟ ସେ ପରାଜିତ ହୋଇଛନ୍ତି।
ସେହିଭଳି ଅରଖପୁର ସରପଞ୍ଚ ଥିବା ସ୍ନେହଲତା ସ୍ବାଇଁ ଚଳିତ ଥର ଉକ୍ତ ପଞ୍ଚାୟତରୁ ସମିତି ସଭ୍ୟା ପଦବୀରେ ଲଢ଼ି ପରାଜିତ ହୋଇଛନ୍ତି। ସେ ୨ଥର ଏହି ପଞ୍ଚାୟତର ସରପଞ୍ଚ ହୋଇଥିବାବେଳେ ତାଙ୍କ ସ୍ବାମୀ ମିହିର ସ୍ବାଇଁ ଏବେ ବ୍ଲକ ବିଜେଡି କୋଷାଧ୍ୟକ୍ଷ ଅଛନ୍ତି। ସ୍ନେହଲତା ପଞ୍ଚାୟତ ସମିତି ଅଧ୍ୟକ୍ଷା ପଦବୀ ଦୌଡ଼ରେ ଥିଲେ। ସେହିପରି ବ୍ଲକ ମହିଳା ସଭାନେତ୍ରୀ ସରସ୍ବତୀ ବେହେରା ଚଳିତ ପଞ୍ଚାୟତ ନିର୍ବାଚନରେ ଭରତପୁର ପଞ୍ଚାୟତର ସରପଞ୍ଚ ପଦବୀ ପାଇଁ ନିର୍ବାଚନ ଲଢ଼ି ପରାଜୟ ବରଣ କରିଛନ୍ତି। ସେ ଏହି ପଞ୍ଚାୟତରେ ୩ଥର ସରପଞ୍ଚ ହୋଇଛନ୍ତି। ସେହିଭଳି କଂଗ୍ରେସ ବ୍ଲକ ସଭାପତି ଉମେଶ ଚନ୍ଦ୍ର ଜେନା ଚଳିତ ଥର ୧୭ ନଂ. ଜିଲା ପରିଷଦ ଜୋନରୁ ଲଢି ପରାଜିତ ହୋଇଛନ୍ତି। ଭାଜପାରୁ ୧୮ ନଂ. ଜୋନ୍ରୁ ପ୍ରାର୍ଥୀ ହୋଇଥିବା ଦେବଯାନୀ ପ୍ରଧାନ ଏବେ ଯାଜପୁର ଜିଲା ଭାଜପାର ସାଧାରଣ ସମ୍ପାଦିକା ଅଛନ୍ତି। ସେ ମଧ୍ୟ ନିର୍ବାଚନରେ ପରାଜୟ ବରଣ କରିଛନ୍ତି। ସେହିଭଳି ଭାଜପା ଜିଲା ଯୁବମୋର୍ଚ୍ଚା ସାଧାରଣ ସମ୍ପାଦକ ଥିବା ପ୍ରୀତମ ନାୟକ ଚଳିତ ଥର ପଞ୍ଚାୟତ ନିର୍ବାଚନରେ ୧୭ ନଂ. ଜିଲା ପରିଷଦ ଜୋନରେ ପ୍ରାର୍ଥୀ ହୋଇ ପରାଜୟ ବରଣ କରିଛନ୍ତି। ଏହିଭଳି ହେଭିୱେଟ୍ ନେତାଙ୍କ ପରାଜୟକୁ ନେଇ ବଡ଼ଚଣାରେ ଚର୍ଚ୍ଚା ଜୋର ଧରିଛି।
