ଶ୍ରୀନଗର,୨୦।୧୧: ଜାମ୍ମୁ କାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ଫାରୁକ ଅବଦୁଲ୍ଲା ଏକ ସାଧାରଣ ସଭାରେ ଭାଜପାକୁ ଟାର୍ଗେଟ୍ କରିଛନ୍ତି। ଜମ୍ମୁ କଶ୍ମୀରର ଅଖନୁର ଜିଲାରେ ଏକ ସାଧାରଣ ସଭାରେ ଉଦବୋଧନ ଦେଇ ଅବଦୁଲ୍ଲା କହିଛନ୍ତି, ନିର୍ବାଚନ ସମୟରେ ଭାଜପା ‘ହିନ୍ଦୁ ବିପଦରେ’ ବ୍ୟବହାର କରିବେ, କିନ୍ତୁ ଏହାର ଶିକାର ନ ହେବାକୁ ମୁଁ ସମସ୍ତଙ୍କୁ ଅନୁରୋଧ କରୁଛି। ପ୍ରଭୁ ରାମ କେବଳ ହିନ୍ଦୁ ଧର୍ମର ଲୋକଙ୍କ ନୁହେଁ, ସମସ୍ତଙ୍କର। କୌଣସି ଧର୍ମ ଖରାପ ନୁହେଁ। ଧର୍ମ ନାଁରେ ରାଜୀତି କରୁଥିବା ଲୋକଙ୍କ ମାନସିକତା ହିଁ ଖରାପ। କିଛି ନେତା ଧାର୍ମିକ ବିଭେଦ ସୃଷ୍ଟି କରି ଆମ ଦଳ ନ୍ୟାଶନାଲ କନଫରେନ୍ସକୁ ଦୁର୍ବଳ କରିବାକୁ ଚେଷ୍ଟା କରୁଛନ୍ତି। ଆମ ବିରୋଧରେ ଲଗାତାର ଅଭିଯୋଗ ଆସୁଛି କିନ୍ତୁ ଆମେ ପାକିସ୍ତାନ ସହିତ ହାତ ମିଳାଇଛୁ। କିନ୍ତୁ ଏହା ସମ୍ପୂର୍ଣ୍ଣ ମିଛ। ଆମେ କଦାପି ପାକିସ୍ତାନର ପକ୍ଷ ନେଇ ନାହୁଁ। ଜିନ୍ନା ମୋ ବାପାଙ୍କୁ ଭେଟିବାକୁ ଆସିଥିଲେ, କିନ୍ତୁ ଆମେ ତାଙ୍କ ସହ ହାତ ମିଳାଇବାକୁ ମନା କରିଥିଲୁ।
କେନ୍ଦ୍ର ସରକାରଙ୍କୁ ଆକ୍ରମଣ କରି ଫାରୁକ ଅବଦୁଲ୍ଲା କହିଛନ୍ତି. ସେମାନେ ଜମ୍ମୁ-କଶ୍ମୀରକୁ ଦେଇଥିବା ପ୍ରତିଶ୍ରୁତି ପାଳନ କରିନାହାଁନ୍ତି। ଏଠାରେ ୫୦,୦୦୦ ଚାକିରିର ପ୍ରତିଶୃତି ଦିଆଯାଇଥିଲା। କିନ୍ତୁ ଏପର୍ଯ୍ୟନ୍ତ ତାହା ପୂରଣ ହୋଇପାରି ନାହିଁ। ଏହା ଜଣେ ରାଜ୍ୟପାଳଙ୍କ ଦ୍ୱାରା ହୋଇପାରିବ ନାହିଁ, ସେଥିପାଇଁ ନିର୍ବାଚନ ଗୁରୁତ୍ୱପୂର୍ଣ୍ଣ।
ସୂଚନାଯୋଗ୍ୟ, ଜମ୍ମୁ କଶ୍ମୀରରେ ଧାରା ୩୭୦ ରଦ୍ଦ ହେବା ପରେ ପ୍ରଥମ ନିର୍ବାଚନ ପାଇଁ ପ୍ରସ୍ତୁତି ଚାଲିଛି। ଆସନ୍ତା ବର୍ଷ ଆରମ୍ଭରେ ଏହି ନିର୍ବାଚନ ହେବ ବୋଲି ଆଶା କରାଯାଉଛି।
