ବରଗଡ଼ ଅଫିସ୍,୯।୧୨: ଚିରାଚରିତ ଢଙ୍ଗରେ ଚାଲିଥିବା ଧାନ ସଂଗ୍ରହ ପ୍ରକ୍ରିୟାରେ ଚାଷୀ ପେଷି ହୋଇ ଗଲେଣି। ଧାନ କିଣାବିକା ସମୟରେ ଗୁଣବତ୍ତାକୁ ନେଇ କଟ୍ନୀଛଟ୍ନୀ ଆଳ ଅଭାବୀ ବିକ୍ରିର ମୁଖ୍ୟ କାରଣ ପାଲଟିଛି। ଧାନ କିଣାବିକାରେ ରହିଥିବା ଅବ୍ୟବସ୍ଥାକୁ ସୁଧାରିବା ବଦଳରେ ନୂଆ କୃଷି ଆଇନ ଚାଷୀଙ୍କ ପାଇଁ କଟା ଘା’ରେ ଚୂନ ଭଳି ହୋଇଛି। ନୂଆ କୃଷି ଆଇନ ଅଭାବୀ ବିକ୍ରିକୁ ରୋକିପାରିବ, ସେ ଆଶା ମଧ୍ୟ କ୍ଷୀଣ। ଫଳରେ ଧାନ ଭଳି କୃଷିଜାତ ଦ୍ରବ୍ୟର ସର୍ବନିମ୍ନ ସରକାରୀ ସହାୟକ ମୂଲ୍ୟ (ଏମ୍ଏସ୍ପି) ପାଇବା ପାଇଁ ଚାଷୀଙ୍କୁ ରାଜରାସ୍ତାକୁ ଓହ୍ଲାଇବାକୁ ପଡ଼ୁଛି। ଆଉ ନୂଆ କୃଷି ଆଇନ ଯୋଗୁ ଯେତେବେଳେ ଧାନ କିଣାବିକା ସରକାରୀ ସଂସ୍ଥା ହାତରୁ ପୁଞ୍ଜିପତିଙ୍କ ହାତକୁ ଚାଲିଯିବ, ସେତେବେଳେ କୃଷିଜାତ ଦ୍ରବ୍ୟର ଏମ୍ଏସ୍ପି ପାଇବା ନେଇ ଚାଷୀକୁଳ ଆଶଙ୍କା ପ୍ରକାଶ କରିଛନ୍ତି।
ଚାଷୀମାନେ ଅଭିଯୋଗ କରୁଛନ୍ତି ଯେ, ଗୁଣବତ୍ତାର ସମସ୍ତ ମାପଦଣ୍ଡ ପୂରଣ କରୁଥିବା ଧାନ ମଣ୍ଡିକୁ ଆସିଲେ ମଧ୍ୟ ବସ୍ତା (୭୫ କିଗ୍ରା) ପ୍ରତି ୧ରୁ ୨କିଗ୍ରା ଲେଖାଏ କଟ୍ନୀଛଟ୍ନୀ କରାଯାଉଛି। ସରକାରଙ୍କ ଗାଇଡ୍ ଲାଇନ୍ ଅନୁଯାୟୀ, ମଣ୍ଡିରେ ବିଭାଗୀୟ ଅଧିକାରୀ ଓ କର୍ମଚାରୀଙ୍କ ଉପସ୍ଥିତିରେ ଧାନର ଗୁଣମାନ ନିର୍ଦ୍ଧାରଣ ହେବା କଥା, କିନ୍ତୁ ତାହା କରାଯାଉ ନାହିଁ। ମଣ୍ଡିଗୁଡ଼ିକରେ ମିଲର୍ସ କିମ୍ବା ସେମାନଙ୍କ ଏଜେଣ୍ଟ ଗୁଣମାନ ପରୀକ୍ଷା କରୁଛନ୍ତି। ସେହିପରି ମଣ୍ଡିରେ ଧାନ ପହଞ୍ଚିବା ପରେ ସେଠାରେ ତାହା ଶୁଖାଇବା ବିଧି ଥିବାବେଳେ ତାହା ମଧ୍ୟ କରାଯାଉନାହିଁ। ଏଥିପାଇଁ ଚାଷୀ ଶୋଷଣର ଶିକାର ହେଉଛି। ବରଗଡ଼ ଜିଲା ଗାଇସୀମାର ଚାଷୀ ନିରଞ୍ଜନ ପ୍ରଧାନ କୁହନ୍ତି, ୧୭ ପ୍ରତିଶତ ପର୍ଯ୍ୟନ୍ତ ଆର୍ଦ୍ରତା ରହିଲେ କଟ୍ନୀଛଟ୍ନୀ ହେବ ନାହିଁ ବୋଲି ସରକାର ନିର୍ଦ୍ଧାରଣ କରିଛନ୍ତି। ଆଦର୍ରତା ପରିମାଣ ୧୭ ପ୍ରତିଶତରୁ ଅଧିକ ହେଲେ କୁଇଣ୍ଟାଲ ପ୍ରତି ୧ କିଗ୍ରା ଧାନ କାଟିବାକୁ ସରକାର ନିୟମ କରିଛନ୍ତି। କିନ୍ତୁ ଚାଷୀଙ୍କୁ ଭୁଆଁ ବୁଲାଇ ୧ କୁଇଣ୍ଟାଲ ବଦଳରେ ୧ବସ୍ତା (୭୫କିଗ୍ରା) ପ୍ରତି ୧କିଗ୍ରା ଧାନ କାଟଛାଣ୍ଟ କରାଯାଉଛି ଏବଂ ଏଥିପାଇଁ ଚାଷୀଙ୍କୁ କ୍ଷତି ସହିବାକୁ ପଡ଼ୁଛି। ଉଭୟ ମଣ୍ଡି ଓ ମିଲ୍ରେ କଟ୍ନୀଛଟ୍ନୀ ଚାଲିଛି। ମିଲର୍ସମାନେ ଆର୍ଦ୍ରତା ଆଳ ଦେଖାଇ ଧାନ ଉଠାଉ ନାହାନ୍ତି। ଫଳରେ ଚାଷୀ ଶେଷ ମୁହୂର୍ତ୍ତରେ କମ୍ ଦରରେ ମିଲର୍ସ, ଧାନକ୍ରୟ ସଂସ୍ଥା ପାଖରେ ନିଜ ଧାନକୁ ବିକ୍ରି କରୁଛନ୍ତି। ବରଗଡ଼ ଜିଲା ସରକଣ୍ଡାର ଚାଷୀ ହର ବଣିଆ କୁହନ୍ତି, ଧାନ ଉଠାଣ ଏବଂ କଷ୍ଟମ ମିଲିଂ ଆଧାରରେ ଚାଉଳ ଦେବା ବ୍ୟତୀତ ଧାନ କିଣାବିକାରେ ମିଲର୍ସଙ୍କ ଅନ୍ୟ କୌଣସି ଭୂମିକା ନାହିଁ। କିନ୍ତୁ ମିଲର୍ସଙ୍କ ଏଜେଣ୍ଟମାନେ ମଣ୍ଡିରେ ପହଞ୍ଚି ଧାନ ଓଜନଠାରୁ ଆରମ୍ଭ କରି ମାନ ନିର୍ଦ୍ଧାରଣ ଏବଂ କଟ୍ନୀଛଟ୍ନୀ କରୁଛନ୍ତି। ଆମ ସରକଣ୍ଡା ମଣ୍ଡିରେ ଏଭଳି ୫/୬ଜଣ ଚାଷୀଙ୍କ ଧାନରୁ ବସ୍ତା ପ୍ରତି ୨କିଗ୍ରା ଲେଖାଏଁ କଟାଯାଇଛି। ସେହିପରି ମଣ୍ଡିକୁ ଧାନ ନ ଆସି ସିଧାସଳଖ ରାଇସ୍ ମିଲ୍କୁ ଯାଉଛି ଏବଂ ମନଇଚ୍ଛା ମିଲର୍ସମାନେ ଧାନ କଟ୍ନୀଛଟ୍ନୀ କରୁଛନ୍ତି। ଏହା ସମ୍ପୂର୍ଣ୍ଣ ବେଆଇନ। ଚାଷୀଙ୍କୁ ଏଭଳି ଲୁଟ୍ କରାଯାଉଥିଲେ ମଧ୍ୟ ସରକାରୀ କଳ ଚୁପ୍ ରହିଛନ୍ତି।
ପଶ୍ଚିମ ଓଡ଼ିଶା କୃଷକ ସଙ୍ଗଠନ ସମନ୍ବୟ ସମିତି ଆବାହକ ଲିଙ୍ଗରାଜ କୁହନ୍ତି ଯେ, ପ୍ରାଥମିକ କୃଷି ସମବାୟ ସମିତି (ପ୍ୟାକ୍ସ) ଜରିଆରେ ରାଜ୍ୟ ସରକାରଙ୍କ ଯୋଗାଣ ବିଭାଗ ଧାନ କିଣୁଛି। ଫଳରେ ଧାନର ଗୁଣମାନ ତଥା ଏଫ୍ଏକ୍ୟୁ ନିର୍ଦ୍ଧାରଣ ସମ୍ପୃକ୍ତ ବିଭାଗର ଉପସ୍ଥିତିରେ ହେବା ଦରକାର। ମାତ୍ର ସେଥିରେ ବାସ୍ତବତା ରହୁ ନ ଥିବା ପରିଲକ୍ଷିତ ହେଉଛି। ମଣ୍ଡି ବଦଳରେ ଯେଉଁ ଧାନ ସିଧାସଳଖ ମିଲର୍ସଙ୍କ ପାଖରେ ପହଞ୍ଚୁଛି, ସେଭଳି ସ୍ଥଳେ ମିଲର୍ସଙ୍କ ମର୍ଜିରେ କଟ୍ନୀଛଟ୍ନୀ ହେଉଛି ଏବଂ ଚାଷୀ ଶୋଷଣର ଶିକାର ହେଉଛନ୍ତି। ବରଗଡ଼ ଜିଲାର ମିଲ୍ ମାଲିକ ରାଜୁ ଶର୍ମା କୁହନ୍ତି, ଚାଉଳର ଗୁଣବତ୍ତା ଠିକ୍ ନ ରହିଲେ ଏଫ୍ସିଆଇ ମିଲର୍ସଙ୍କ ପାଖରୁ ତାହା ନେବ ନାହିଁ। ଭଲ ଗୁଣବତ୍ତାର ଚାଉଳ ପାଇଁ ଠିକ୍ ଗୁଣମାନର ଧାନ ମଧ୍ୟ ଦରକାର। ଫଳରେ ଧାନର ଗୁଣମାନ ପରୀକ୍ଷା କରାଯିବା ଜରୁରୀ।
ଜିଲା ମୁଖ୍ୟ ଯୋଗାଣ ଅଧିକାରୀ ରଜନୀକାନ୍ତ ଦାଶଙ୍କୁ ପଚାରିବାରୁ ସେ କୁହନ୍ତି, କଟ୍ନୀଛଟ୍ନୀ କରି ଚାଷୀଙ୍କୁ ଶୋଷଣ କରାଯାଉଥିବା ନେଇ ତାଙ୍କ ପାଖକୁ ଅଭିଯୋଗ ଆସିନାହିଁ। ଅଭିଯୋଗ ମିଳିଲେ ସେ ଦିଗରେ ତଦନ୍ତ କରାଯାଇ ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
-ପ୍ରେମାନନ୍ଦ ଖମାରୀ
