ବୈପାରିଗୁଡ଼ା,୧୯।୧୦(ଡି.ଏନ୍.ଏ.): କୋରାପୁଟ ଜିଲାର ବୈପାରିଗୁଡ଼ା-ଜୟପୁର ବାଇପାସ୍ ରାସ୍ତା ଏବେ ଲୁଟେରାଙ୍କ କବଳରେ ରହିଛି। ସନ୍ଧ୍ୟା ହେଲେ ରାସ୍ତାକଡ଼ରେ ବିଭିନ୍ନ ମାରଣାସ୍ତ୍ର ଧରି ଲୁଚି ରହୁଛନ୍ତି ଲୁଟେରା ଗ୍ୟାଙ୍ଗ୍ ା ସୁଯୋଗ ପାଇଲେ ବାଇକ୍ ଆରୋହୀମାନଙ୍କୁ ଆକ୍ରମଣ କରି ଲୁଟୁଛନ୍ତି ଟଙ୍କା। ଏପରି ଘଟଣା ବାରମ୍ବାର ହେଉଥିଲେ ମଧ୍ୟ ପୋଲିସ ପ୍ରଶାସନ ଗୁରୁତ୍ୱ ଦେଉ ନ ଥିବାରୁ ଏହାର ଫାଇଦା ଲୁଟେରାମାନେ ଉଠାଉଥିବା ଅଭିଯୋଗ ହେଉଛି।
ଖବରରୁ ଜଣାପଡ଼ିଛି, ଜୟପୁର ବାଇପାସ୍ ରାସ୍ତା ବୈପାରିଗୁଡ଼ାଠାରୁ ବାଲିଆ ଦେଇ ଜୟପୁରକୁ ସଂଲଗ୍ନ କରୁଛି। ଜାତୀୟ ରାଜପଥରେ ବୈପାରିଗୁଡ଼ାଠାରୁ ଜୟପୁର ୨୨ କି.ମି. ଦୂର ହେଉଥିବା ଏହି ବାଇପାସ୍ ରାସ୍ତାରେ ଦୂରତା ୧୮ କି.ମି. ପଡ଼େ। ବୈପାରିଗୁଡ଼ାଠାରୁ ୮ କି.ମି. ଦିଗାପୁର ବ୍ରିଜ୍ ପର୍ଯ୍ୟନ୍ତ ବୈପାରିଗୁଡ଼ା ଥାନା ନିୟନ୍ତ୍ରଣରେ ଥିବାବେଳେ ଅବଶିଷ୍ଟ ରାସ୍ତା ଜୟପୁର ସଦର ପୋଲିସ ନିୟନ୍ତ୍ରଣରେ ରହିଛି ା ତେବେ ରାସ୍ତାକଡ଼ରେ କେତେକ ଢାବା ରହିଛି। ସନ୍ଧ୍ୟା ସମୟରେ ରାସ୍ତାର ବିଭିନ୍ନ ସ୍ଥାନରେ ବସି କେତେଜଣ ଅସାମାଜିକ ବ୍ୟକ୍ତି ମଦ୍ୟପାନ କରୁଥିବା ଦେଖିବାକୁ ମିଳିଥାଏ। ଏହି ରାସ୍ତାରେ ରାତିରେ ଫେରୁଥିବା ଯାତ୍ରୀଙ୍କୁ ଆକ୍ରମଣ କରି ଲୁଟେରାମାନେ ଲୁଟିଥାନ୍ତି। ଗତ ୧୩ରେ ରାମଗିରି ଅଞ୍ଚଳର ଜଣେ ଯୁବ ବ୍ୟବସାୟୀ ବିଶ୍ୱଜିତ ବରେଇ ତାଙ୍କ ସହ ଅନ୍ୟ ଜଣେ ସହଯୋଗୀଙ୍କ ସହିତ ବାଇକ୍ରେ ଜୟପୁରରୁ ଫେରୁଥିବା ବେଳେ ଏଠାରୁ ୨ କି.ମି. ଚନ୍ଦନପୁର ନିକଟରେ ୬ ଜଣ ଲୁଟେରା ସେମାନଙ୍କ ଉପରେ ଆକ୍ରମଣ କରି ୫୦ ହଜାର ଟଙ୍କା ଲୁଟିନେଇଥିଲେ। ୨ଟି ନମ୍ବରବିହୀନ ବାଇକ୍ରେ ସେମାନେ ଚାଲିଯାଇଥିଲେ। ଏ ନେଇ ସେ ବୈପାରିଗୁଡ଼ା ଥାନାରେ ଏତଲା ଦେଇଥିବା ବେଳେ ଏପର୍ଯ୍ୟନ୍ତ ଅପରାଧୀମାନେ ଧରାପଡ଼ିନାହାନ୍ତି। ଏଠାରେ ସୂଚନାଯୋଗ୍ୟ, ଗତବର୍ଷ ମେ ୨୪ରେ ବୈପାରିଗୁଡ଼ା ଅଞ୍ଚଳର ଜଣେ ଶିକ୍ଷକ ଜୟପୁରଠାରୁ ବୈପାରିଗୁଡ଼ା ଫେରୁଥିବା ବେଳେ ସେହି ରାସ୍ତାର ଗୌଡ଼ଗୁଡ଼ା ଛକ ନିକଟରେ ଲୁଟେରାମାନେ ତାଙ୍କୁ ଆକ୍ରମଣ କରି ମୋବାଇଲ ଫୋନ୍ ସହ ୩୦ ହଜାର ଟଙ୍କା ଲୁଟି ନେଇଥିଲେ। ସେତେବେଳେ ଏ ନେଇ ଶିକ୍ଷକ ଜଣକ ଥାନାରେ ଅଭିଯୋଗ କରିଥିଲେ ମଧ୍ୟ ପୋଲିସ ଏତଲା ରଖି ନ ଥିଲା। ଧରିତ୍ରୀରେ ଖବର ପ୍ରକାଶ ପରେ ଏତଲା ରଖି ମାମଲା ରୁଜୁ କରିଥିଲା। ଘଟଣାର ତଦନ୍ତକରି ଜୟପୁର ସଦର ଥାନା ଅନ୍ତର୍ଗତ କଳାଗୁଡ଼ା ଗ୍ରାମରୁ ଅଭିଯୁକ୍ତଙ୍କୁ ପୋଲିସ ଗିରଫ କରିଥିଲା। ତାଙ୍କଠାରୁ ଚୋରି ମୋବାଇଲ ଫୋନ ଜବତ ହୋଇଥିଲା। ଉକ୍ତ ଘଟଣା ପରେ ତତ୍କାଳୀନ ଥାନା ଅଧିକାରୀ ବଦଳିଥିଲେ।
