ଦାରିଙ୍ଗବାଡି, ୨୮।୫ (ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ଥାନା ସିମନବାଡି ଅଞ୍ଚଳରେ ସୁନା ସଫେଇ କରିଦେବି-ମଙ୍ଗଳସୂତ୍ର ଗୁନ୍ଥିଦେବା ବାହାନା କରି ସୁନା ଲୁଟ କରୁଥିଲେ ୪ ମହିଳା। ତେବେ ଗ୍ରାମବାସୀ ସେମାନଙ୍କୁ କାବୁ କରି ପୋଲିସା ଜିମା ଦେଇଛନ୍ତି। କିନ୍ତୁ ଉକ୍ତ ୪ ଜଣ ମହିଳା ଛୋଟ ଛୋଟ ପିଲା ଧରିଥିବାବେକେ ସେମାନଙ୍କୁ ଦୟା କରି ଲିଖିତ ଚୁକ୍ତି କରି ଛାଡିଦେଇଥିବା ଜଣାପଡିଛି ।
ପ୍ରକାଶ ଯେ, ସିମନବାଡି ଗ୍ରାମର ସାରୁମାହା ସାହିର ସୀମାଦ୍ରୀ ନାୟକଙ୍କ ଘରକୁ କିଛିଦିନ ତଳେ କିଛି ମହିଳା ଚୁଡି ବିକ୍ରିପାଇଁ ଆସିଥିଲେ। ଚୁଡି ବିକ୍ରିବେଳେ ସୀମାଦ୍ରୀଙ୍କ ପରିବାର ସହ ପରିଚୟ ସୃଷ୍ଟି କରିବା ସହ ବିଶ୍ୱାସ ବଢ଼ାଇଥିଲେ। ମାଳି, ମଙ୍ଗଳସୂତ୍ରକୁ ସୁନ୍ଦର ଭାବେ ଗୁନ୍ଥି ଦେବୁ କହି ଭରସା ଦେଇଥିଲେ। ଏଥିରେ ସୀମାଦ୍ରୀଙ୍କ ପରିବାର ରାଜି ହେବାରୁ ପୂର୍ବ ପ୍ରସ୍ତୁତି ଓ ଅବିକଳ ପିତଳର ମଙ୍ଗଳସୂତ୍ର ନେଇ ସୀମାଦ୍ରୀଙ୍କ ଘରେ ମହିଳା ମାନେ ପହଞ୍ଚିଥିଲେ। ସମସ୍ତ ମହିଳା ହିନ୍ଦୀଭାଷୀ ଥିଲେ। ସେମାନେ ମଙ୍ଗଳସୂତ୍ର ଗୁନ୍ଥିବା ସମୟରେ ସୁନା ମଙ୍ଗଳସୂତ୍ରକୁ ଚଞ୍ଚକତା କରି ନେଇ ପିତଳର ଅବିକଳ ମଙ୍ଗଳସୂତ୍ର ଦେଇ ସେଠାରୁ ଚାଲିଯାଇଥିଲେ। ତେବେ ସେମାନେ ଯିବା ପରେ ସୀମାଦ୍ରୀଙ୍କୁ ମଙ୍ଗଳସୂତ୍ରଟି ନକଲି ବୋଲି ଜାଣି ସେମାନଙ୍କୁ ଧରିବାକୁ ଦୌଡ଼ି ଯାଇ ବାଟରେ ଗ୍ରାମବାସୀଙ୍କ ସହାୟତାରେ ଧରିଥିଲେ। ପୋଲିସ ଘଟଣା ସ୍ଥଳରେ ପହଞ୍ଚିଥିଲେ ସୁଦ୍ଧା ସୀମାଦ୍ରୀ ଉକ୍ତ ମହିଳାମାନଙ୍କୁ ଦୟା କରି ଛାଡିଦେଇଥିବା ନେଇ ଚର୍ଚ୍ଚା ଜୋର ଧରିଛି । ଗତ କିଛି ଦିନ ହେଲା ମହିଳାମାନେ ସିମନବାଡି ପଞ୍ଚାୟତ ସଲାବାଡି ଛକରେ ରହି ଗାଁ ଗାଁ ବୁଲି ଏଭଳି ବୁଲା ବିକାଳୀ କାର୍ଯ୍ୟ କରୁଥିଲେ।
