ନୂଆଦିଲ୍ଲୀ, ୨୨।୧୨: ସଂସଦର ଶୀତକାଳୀନ ଅଧିବେଶନକୁ ଅନିର୍ଦ୍ଦିଷ୍ଟ କାଳ ଲାଗି ବୁଧବାର ସ୍ଥଗିତ ରଖାଯାଇଛି। ତେଣୁ ଝିଅଙ୍କ ବିବାହ ବୟସ ୧୮ରୁ ୨୧କୁ ବୃଦ୍ଧି ବିଲ୍ ନେଇ ଆଗାମୀ ବଜେଟ ଅଧିବେଶନରେ ନିଷ୍ପତ୍ତି ଗ୍ରହଣ କରାଯିବ। ଲୋକ ସଭାରେ ଏହି ବିଲ୍ ଉପସ୍ଥାପିତ ହେବା ପରେ ଏହାକୁ ସଂସଦୀୟ କମିଟିକୁ ପଠାଯାଇଛି। ଲୋକସଭାରେ ବାଲ୍ୟ ବିବାହ ନିଷେଧ ସଂଶୋଧନ ବିଲ ଆଗତ କରିବା ପରେ ସରକାର ଏହାକୁ ସଂସଦର ସ୍ଥାୟୀ କମିଟି ନିକଟକୁ ପଠାଇବାକୁ ପରାମର୍ଶ ଦେଇଛନ୍ତି। ଏହି ବିଲ ଆଗତ ସମୟରେ ଗୃହରେ ସରକାର ଏବଂ ବିରୋଧୀଙ୍କ ମଧ୍ୟରେ ତୀବ୍ର ଯୁକ୍ତିତର୍କ ହୋଇଥିଲା।
ବିରୋଧୀ ଦଳଙ୍କ ପକ୍ଷରୁ ଏହି ବିଲକୁ ଅସାମ୍ବିଧାନିକ ବୋଲି କହିଛନ୍ତି ଏବଂ ଏହା ବିଭିନ୍ନ ଧର୍ମର ପରମ୍ପରାରେ ହସ୍ତକ୍ଷେପ ବୋଲି କୁହାଯାଇଛି। ଏହି ବିଲ ଆଗତ କରିବା ପୂର୍ବରୁ ହିତାଧିକାରୀଙ୍କ ସହ ପରାମର୍ଶ ନ କରିଥିବାରୁ ବିରୋଧୀ ମଧ୍ୟ ସରକାରଙ୍କୁ ସମାଲୋଚନା କରିଛନ୍ତି।
ଅଧୀର ରଞ୍ଜନ ଚୌଧୁରୀ, ସୌଗତ ରାୟ, ଆସାଦୁଦ୍ଦିନ ଓୱାଇସି, ଏନ.କେ ପ୍ରେମଚନ୍ଦ୍ରନ, ଇ ଅହମ୍ମଦ ବଶୀର, ସୁପ୍ରିୟା ସୁଲେ, କାନି ମୋଜି ଏହାକୁ ଆଲୋଚନା ପାଇଁ ସଂସଦୀୟ କମିଟି ନିକଟକୁ ପଠାଇବାକୁ ଦାବି କରିଥିଲେ। ଏହି ବିଲ୍ ନେଇ ଏବେ ଆଗାମୀ ବଜେଟ ଅଧିବେଶନରେ ନିଷ୍ପତ୍ତି ଗ୍ରହଣ କରାଯିବ।
ଶୀତ ଅଧିବେଶନରେ ସରକାର ଅଧ୍ୟାଦେଶ ସହ ଜଡିତ ସମସ୍ତ ବିଲ ପାରିତ କରିଛନ୍ତି। ପ୍ରଥମ ଦିନରେ କୃଷି ଆଇନ ପ୍ରତ୍ୟାହାର ପାଇଁ ବିଲ ଉପରେ ମୋହର ଲାଗିଛି। ଭୋଟର ପରିଚୟ ପତ୍ର ସହିତ ଆଧାର, ଏନଡିପିଏସ ବିଲ, ବିବାରପତିଙ୍କ ଦରମା-ଭତ୍ତା ଏବଂ ସେବା ସର୍ତ୍ତ ବିଲ୍, ସିବିଆଇ-ଏନଫୋର୍ସମେଣ୍ଟ ଡାଇରେକ୍ଟୋରେଟ ମୁଖ୍ୟଙ୍କ କାର୍ଯ୍ୟକାଳକୁ ପାଞ୍ଚ ବର୍ଷ ବୃଦ୍ଧି, ପ୍ରଜନନ ଫର୍ଟିଲିଟି ଟ୍ରିଟମେଣ୍ଟ ଇଣ୍ଡଷ୍ଟ୍ରି ରେଗୁଲେସନ ବିଲ ଆଦି ସଂସଦର ଅନୁମୋଦନ ଲାଭ କରିଛି।
