ମୁମ୍ବାଇ,୧୬ା୩(ପି.ଟି.): ଇଂଲଣ୍ଡରେ ଅନୁଷ୍ଠିତ ୨୦୧୯ ବିଶ୍ୱକପରେ ଭାରତର ପ୍ରଥମ ପସନ୍ଦର ବୋଲର ରହିଥିବା କୁଲଦୀପ ଯାଦବ ଓ ୟୁଜବେନ୍ଦ୍ର ଚହଲ(କୁଲ୍-ଚା) ପରବର୍ତ୍ତୀ ସମୟରେ ଅନେକ ପରିବର୍ତ୍ତନର ସାମ୍ନା କରିଛନ୍ତି। ୨୦୨୧ରେ କୁଲଦୀପଙ୍କ ଆଣ୍ଠୁରେ ସର୍ଜରୀ ହୋଇଥିବା ବେଳେ ଖରାପ ପ୍ରଦର୍ଶନ କାରଣରୁ ଚହଲ ଆଉ ପ୍ରଥମ ପସନ୍ଦର ବୋଲର ନାହାନ୍ତି। ଅନେକ ଗୁରୁତ୍ୱପୂର୍ଣ୍ଣ ମ୍ୟାଚ ଓ ବିଶ୍ୱକପ ଭଳି ଇଭେଣ୍ଟରେ ଚହଲଙ୍କୁ ଗୋଟିଏ ବି ମ୍ୟାଚରେ ସୁଯୋଗ ମିଳୁନାହିଁ। ତେବେ ଆଗାମୀ ଅଷ୍ଟ୍ରେଲିଆ ବିପକ୍ଷ ସିରିଜରେ ଏହି ଦୁଇ ଖେଳାଳିଙ୍କ ଉପରେ ସଭିଙ୍କ ନଜର ରହିବ।
ଦୁଇ ବୋଲରଙ୍କ ଠାରୁ ଗୁଗଲୀ, ଲେଗ୍ ବ୍ରେକ୍ ଏବଂ ଫ୍ଲିପର ପରି ବିବିଧତା ଦେଖିବାକୁ ପ୍ରଶଂସକ ମାନେ ବ୍ୟଗ୍ର। ଭାରତୀୟ ଦଳର ଷ୍ଟାଣ୍ଡ ଇନ କ୍ୟାପଟେନ୍ ହାର୍ଦ୍ଦିକ ପାଣ୍ଡ୍ୟାଙ୍କ ନେତୃତ୍ୱରେ ବୁଧବାର ଭାରତୀୟ ଖେଳାଳି ଓ୍ବାଙ୍ଖେଡେରେ ଅଭ୍ୟାସ କରିଥିଲେ। ଶୁକ୍ରବାର ଠାରୁ ଆରମ୍ଭ ହେବାକୁ ଥିବା ଦିନିକିଆ ସିରିଜ୍ ପାଇଁ ଭାରତୀୟ ଦଳରେ ରବୀନ୍ଦ୍ର ଜାଡେଜା ଓ ଓ୍ବାଶିଂଟନ୍ ସୁନ୍ଦରଙ୍କ ପରି ଖେଳାଳି ରହିଛନ୍ତି। ଉଭୟ ଖେଳାଳି ବଲ୍ ଓ ବ୍ୟାଟ ଜରିଆରେ ସମାନ ଭାବରେ ପ୍ରଭାବଶାଳୀ। କୁଲ୍-ଚା ଯୋଡିଙ୍କ ନିକଟରେ ସମାନ ବ୍ୟାଟିଂ ଦକ୍ଷତା ନଥିବା ବେଳେ କୁଲ୍ଦୀପ ନିମ୍ନକ୍ରମରେ ଉପଯୋଗୀ ବ୍ୟାଟିଂ କରିପାରନ୍ତି।
ତେବେ ଫିଙ୍ଗର ସ୍ପିନରଙ୍କ ଅପେକ୍ଷା ରିଷ୍ଟ ସ୍ପିନରଙ୍କ ଉଇକେଟ ନେବାର ଦକ୍ଷତା ଅଧିକ ରହିଥାଏ। ତେଣୁ କୁଲ୍-ଚା ଯୋଡିଙ୍କ ଉପରେ ମ୍ୟାନେଜମେଣ୍ଟ ଭରସା ଦେଖାଇପାରେ। ଭାରତର ନିୟମିତ ଅଧିନୟକ ରୋହିତ ଶର୍ମା ପ୍ରଥମ ଦିନିକିଆରେ ସାମିଲ ନାହାନ୍ତି। ବୁଧବାର ପାଣ୍ଡ୍ୟାଙ୍କ ସମେତ ମହମ୍ମଦ ସିରାଜ, ଜୟଦେବ ଉନାଡକଟ, ଉମ୍ରାନ ମଲିକ, ଶାର୍ଦ୍ଦୂଳ ଠାକୁର, ସୂର୍ଯ୍ୟ କୁମାର ଯାଦବ ଓ ଇଶାନ କିଶନ ଅଭ୍ୟାସ କରୁଥିବାର ନଜର ଆସିଥିଲେ।
ମୁଖ୍ୟ କୋଚ୍ ରାହୁଲ ଡ୍ରାଭିଡ୍ ଏହି ସେସନରେ ଅନୁପସ୍ଥିତ ଥିବା ବେଳେ ବ୍ୟାଟିଂ କୋଚ୍ ବିକ୍ରମ ରାଠୋଡ, ଫିଲ୍ଡିଂ କୋଚ୍ ଟି ଦିଲୀପ୍, ବୋଲିଂ କୋଚ୍ ପାରସ୍ ମାହାମ୍ବ୍ରେ ଓ ଥ୍ରୋ ଡାଉନ୍ ସ୍ପେଶାଲିଷ୍ଟ ରାଘବେନ୍ଦ୍ର ଓ ନୁଆନ୍ ସେନିଭିରାଣ୍ଟେ ଖେଳାଳିଙ୍କୁ ଅଭ୍ୟାସ କରାଇଥିଲେ। ବର୍ଡର ଗାଭାସ୍କର ଟ୍ରଫିର ଅନ୍ତିମ ଦୁଇ ଟେଷ୍ଟରୁ ବାଦ ପଡିଥିବା ଲୋକେଶ ରାହୁଲ ମଧ୍ୟ ଟ୍ରେନିଂ ସେସନରେ ଅନୁପସ୍ଥିତ ଥିଲେ। ସୁର୍ଯ୍ୟକୁମାର ଯାଦବ ଆକ୍ରମଣାତ୍ମକ ବ୍ୟାଟିଂ ଅଭ୍ୟାସ କରିଥିବା ବେଳେ ହାର୍ଦ୍ଦିକ ପାଣ୍ଡ୍ୟା କିଛି ସମୟ ବୋଲିଂ ଅଭ୍ୟାସ କରିଥିଲେ।
