ଲକ୍ଷ୍ନୌ,୧୮ା୬(ଆଇଏଏନ୍ଏସ୍): ଉତ୍ତରପ୍ରଦେଶର ରାମପୁର ଏବଂ ଆଜମଗଡ଼ ଲୋକ ସଭା ଆସନ ଲାଗି ହେବାକୁ ଯାଉଥିବା ଉପନିର୍ବାଚନ ବିରୋଧୀ ଦଳ ସମାଜବାଦୀ ପାର୍ଟି (ଏସ୍ପି) ପାଇଁ ଅଗ୍ନିପରୀକ୍ଷା ହେବାକୁ ଯାଉଛି। ଉଭୟ ଆସନ ଏସ୍ପି ଦଖଲରେ ଥିଲା। ଦଳକୁ ଦୁଇ ନମ୍ବର ସ୍ଥାନ ବଜାୟ ରଖିବାକୁ ହେଲେ ଏହି ଦୁଇ ଆସନ ଜିତିବା ଜରୁରୀ। ଏହା ବ୍ୟତୀତ ଉକ୍ତ ଦୁଇ ଆସନର ଉପନିର୍ବାଚନ ବହୁଜନ ସମାଜ ପାର୍ଟି (ବିଏସ୍ପି)ର ଭବିଷ୍ୟତ ମଧ୍ୟ ନିର୍ଦ୍ଧାରଣ କରିବ। କାରଣ ଏହି ଦଳ ୟୁପି ରାଜନୀତିରେ ପୁଣି ଥରେ ମୁଖ୍ୟ ଭୂମିକା ନେବାକୁ ଜୋର୍ଦାର ଉଦ୍ୟମ ଚଳାଇଛି। ଜୁନ୍ ୨୩ରେ ରାମପୁର ଓ ଆଜମଗଡ଼ ଆସନ ଲାଗି ଭୋଟ ଗ୍ରହଣ କରାଯିବ। ତେବେ ଉଭୟ ଦଳରୁ ଲଢ଼ୁଥିବା ପ୍ରାର୍ଥୀଙ୍କ ପାଇଁ ଏପର୍ଯ୍ୟନ୍ତ ଏସ୍ପି ଅଧ୍ୟକ୍ଷ ଅଖିଳେଶ ଯାଦବ କିମ୍ବା ବିଏସ୍ପି ସୁପ୍ରିମୋ ମାୟାବତୀ ପ୍ରଚାର ମଇଦାନକୁ ଓହ୍ଲାଇ ନାହାନ୍ତି।
ଗତ ମାର୍ଚ୍ଚରେ ଅଖିଳେଶ ଯାଦବ ଉତ୍ତରପ୍ରଦେଶ ବିଧାନସଭାକୁ ନିର୍ବାଚିତ ହେବା ପରେ ସେ ଆଜମଗଡ଼ ଲୋକ ସଭା ଆସନ ଛାଡ଼ିଥିଲେ। ତାଙ୍କ ସମ୍ପର୍କୀୟ ଭାଇ ତଥା ପୂର୍ବତନ ଏମ୍ପି ଧର୍ମେନ୍ଦ୍ର ଯାଦବ ଉକ୍ତ ଆସନରୁ ପ୍ରାର୍ଥୀ ହୋଇଛନ୍ତି। ଦଳକୁ ଭୋଟ ଦେବା ପାଇଁ ଅଖିଳେଶ ଗୁରୁବାର ରାତିରେ ଭୋଟରମାନଙ୍କୁ ନିବେଦନ କରିଥିଲେ। ଆଜମଗଡ଼ରେ ବିଏସ୍ପି ଗୁଡ୍ଡୁ ଜମାଲିଙ୍କୁ ପ୍ରାର୍ଥୀ କରିଛି ଏସ୍ପି ଭୋଟ ଭାଙ୍ଗିବାରେ ଏହା ସହାୟକ ହେବ। କାରଣ ଜମାଲିଙ୍କୁ ଅଧିକ ମୁସଲମାନ ଭୋଟ ମିଳିବ ବୋଲି କୁହାଯାଉଛି। ଏହା ବ୍ୟତୀତ ଭାଜପା ସେଠାରେ ଭୋଜପୁରୀ ଅଭିନେତା ଦିନେଶ ଲାଲ ଯାଦବ ନିରାହୁଆଙ୍କୁ ପ୍ରାର୍ଥୀ କରିଛି।
ସେହିପରି ମହମ୍ମଦ ଆଜମ ଖାନ୍ଙ୍କ ଗଡ଼ କୁହାଯାଉଥିବା ରାମପୁରରେ ଲଢ଼େଇ ମୁଖ୍ୟତଃ ଏସ୍ପି ଏବଂ ଭାଜପା ମଧ୍ୟରେ ହେବ। ଅସୁସ୍ଥତା ସତ୍ତ୍ୱେ ଆଜମ ଦଳୀୟ ପ୍ରାର୍ଥୀ ଅସୀମ ରାଜାଙ୍କ ପାଇଁ ପ୍ରଚାର କରିଥିଲେ। ଭାଜପା ସେଠାରୁ ଘନଶ୍ୟାମ ଲୋଧିଙ୍କୁ ପ୍ରାର୍ଥୀ କରିଛି। ଘନଶ୍ୟାମ ଏକଦା ଆଜମଙ୍କର ସହଯୋଗୀ ଥିଲେ। ରାମପୁରରେ ବିଏସ୍ପି ପ୍ରାର୍ଥୀ ଦେଇନାହିଁ। ସର୍ବପୁରାତନ ଦଳ କଂଗ୍ରେସ ଏଥର ଉପନିର୍ବାଚନରେ ଭାଗ ନେଇ ନାହିଁ।
