ନୂଆଦିଲ୍ଲୀ, ୨୭ା୧୨: ଦିଲ୍ଲୀ ଓ ହରିଦ୍ୱାରରେ ଅନୁଷ୍ଠିତ ଧର୍ମ ସଂସଦରେ ଘୃଣିତ ବକ୍ତବ୍ୟକୁ ନେଇ ସୁପ୍ରମକୋର୍ଟର ୭୬ ଜଣ ଆଇନଜୀବୀ ଚିନ୍ତା ପ୍ରକଟ କରିଛନ୍ତି। ସର୍ବୋଚ୍ଚ ଅଦାଲତ ଏଥିରେ ହସ୍ତକ୍ଷେପ କରିବା ଲାଗି ସେମାନେ ଭାରତର ପ୍ରଧାନ ବିଚାରପତି (ସିଜେଆଇ) ଏନ୍.ଭି. ରମନାଙ୍କୁ ପତ୍ର ଲେଖି ଅନୁରୋଧ କରିଛନ୍ତି। ସେମାନଙ୍କ କହିବା ଅନୁଯାୟୀ ଧର୍ମ ସଂସଦରେ ଦିଆଯାଇଥିବା ଧମକ କେବଳ ଦେଶର ଏକତା ଓ ଅଖଣ୍ଡତା ପ୍ରତି ବିପଦ ସୃଷ୍ଟି କରିନାହିଁ ଏହା କୋଟି କୋଟି ମୁସଲମାନ ନାଗରିକଙ୍କ ଜୀବନ ପ୍ରତି ମଧ୍ୟ ଆତଙ୍କର କାରଣ ହୋଇଛି। ଘୃଣିତ ମନ୍ତବ୍ୟ ଦେଇଥିବା ବ୍ୟକ୍ତିମାନଙ୍କ ତାଲିକା ଦେଇ ସେମାନଙ୍କ ଉପରେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବା ଆଇନଜୀବୀମାନେ ଅଭିଯୋଗ କରିଛନ୍ତି। ଏଭଳି ଧର୍ମ ସଂସଦ ବନ୍ଦ କରାଯିବା ଲାଗି ନ୍ୟାୟପାଳିକାର ହସ୍ତକ୍ଷେପ ଜରୁରୀ ହୋଇପଡ଼ିଛି। ସିଜେଆଇଙ୍କୁ ଲେଖାଯାଇଥିବା ପତ୍ରରେ ଖ୍ୟାତନାମା ଆଇନଜୀବୀ ଦୁଷ୍ୟନ୍ତ ଡାଭେ, ପ୍ରଶାନ୍ତ ଭୂଷଣ, ବ୍ରିନ୍ଦା ଗ୍ରୋଭର, ସଲମାନ ଖୁର୍ସିଦ ଏବଂ ପାଟନା ହାଇକୋର୍ଟର ପୂର୍ବତନ ବିଚାରପତି ଅଞ୍ଜନା ପ୍ରକାଶ ପ୍ରମୁଖ ସ୍ବାକ୍ଷର କରିଛନ୍ତି। ଦୁଇଟି ଧର୍ମ ସଂସଦରେ ଦିଆଯାଇଥିବା ବକ୍ତୃତା କେବଳ ଘୃଣିତ ମନ୍ତବ୍ୟ ନୁହେଁ, ବରଂ ଗୋଟିଏ ସମ୍ପ୍ରଦାୟର ଗଣହତ୍ୟା ଲାଗି ଖୋଲା ଆହ୍ବାନ ବୋଲି ସେମାନେ କହିଛନ୍ତି।
ଗଣହତ୍ୟା ଏବଂ ମୁସଲମାନଙ୍କ ବିରୋଧରେ ଅସ୍ତ୍ର ଧରିବା ଲାଗି ଦିଆଯାଇଥିବା ଖୋଲା ଆହ୍ବାନକୁ ନେଇ ଉତ୍ତେଜନା ପ୍ରକାଶ ପାଇବା ସହ ସୋସିଆଲ ମିଡିଆରେ ନିନ୍ଦା କରାଯାଇଛି। ହରିଦ୍ୱାର ଘଟଣାର ୪ ଦିନ ପରେ ପୋଲିସ ମାମଲା ରୁଜୁ କରିଥିଲା, ଯେଉଁଥିରେ ମାତ୍ର ଜଣଙ୍କୁ ଅଭିଯୁକ୍ତ କରାଯାଇଛି। ପରେ ଧରମ ଦାସ ଓ ସାଧ୍ୱୀ ଅନ୍ନପୂର୍ଣ୍ଣାଙ୍କ ନଁା ସେଥିରେ ଯୋଡ଼ାଯାଇଛି। ସାଧ୍ୱୀ ଅନ୍ନପୂର୍ଣ୍ଣା (ପୂର୍ବରୁ ପୂଜା ଶକୁନ ପାଣ୍ଡେ ଭାବେ ପରିଚିତ) ଧର୍ମ ସଂସଦରେ କହିଥିଲେ, ଯଦି ତୁମେ ସେମାନଙ୍କୁ ଶେଷ କରିବାକୁ ଚାହୁଁଛ, ତେବେ ସେମାନଙ୍କୁ ମାରିଦିଅ। ସେମାନଙ୍କ ମଧ୍ୟରୁ ୨୦ ଲକ୍ଷକୁ ହତ୍ୟା କରିବା ଲାଗି ଆମେ ୨୦୦ ସୈନ୍ୟ ଚାହୁଁ ବୋଲି ସେ କହୁଥିବା ଏକ ଭିଡିଓ ପ୍ରସାରିତ ହୋଇଛି। ଯେଉଁମାନେ ଏହି ଧର୍ମ ସଂସଦ ଆୟୋଜନ କରିଥିଲେ ଓ ଉତ୍ତେଜକ ବକ୍ତବ୍ୟ ଦେଇଥିଲେ, ସେମାନେ କୌଣସି ଭୁଲ୍ କରି ନ ଥିବା କହୁଛନ୍ତି। ସେ ଯାହା କହିଥିଲେ ସେଥିପାଇଁ ଲଜ୍ଜିତ ନୁହନ୍ତି ଏବଂ ପୋଲିସକୁ ଭୟ କରନ୍ତି ନାହିଁ ବୋଲି ହିନ୍ଦୁ ରକ୍ଷା ସେନାର ପ୍ରବୋଧାନନ୍ଦ ଗିରି କହିଛନ୍ତି। ଗିରିଙ୍କ ଅନେକ ସମୟରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସମେତ ବରିଷ୍ଠ ଭାଜପା ନେତାମାନଙ୍କ ସହ ଫଟୋରେ ଦେଖିବାକୁ ମିଳିଥାଏ। ସୋସିଆଲ ମିଡିଆରେ ପ୍ରସାରିତ ହେଉଥିବା ଏକ ଭିଡିଓରେ ସେ କହିଛନ୍ତି, ‘ମ୍ୟାନ୍ମାର ଭଳି ଆମ ପୋଲିସ, ରାଜନେତା, ସୈନ୍ୟ ଓ ପ୍ରତ୍ୟେକ ହିନ୍ଦୁ ନିଶ୍ଚୟ ଅସ୍ତ୍ର ଉଠାଇ ଅଭିଯାନରେ ସାମିଲ ହେବେ। ଏହା ବ୍ୟତୀତ ଅନ୍ୟ ବିକଳ୍ପ ନାହିଁ’। ପୂର୍ବରୁ ଏଭଳି ଉତ୍ତେଜକ ମନ୍ତବ୍ୟ ସତ୍ତ୍ୱେ ସମ୍ପୃକ୍ତ ବ୍ୟକ୍ତିମାନଙ୍କ ବିରୋଧରେ ଆଇପିସିର ଧାରା ୧୫୩, ୧୫୩ଏ, ୧୫୩ବି, ୨୯୫ଏ, ୫୦୪, ୫୦୬, ୧୨୦ବି, ୩୪ରେ କୌଣସି ପ୍ରଭାବୀ କାର୍ଯ୍ୟାନୁଷ୍ଠାନ ନିଆଯାଇନାହିଁ। ତେଣୁ ଏଭଳି ଧର୍ମୀୟ ସମାବେଶ ରୋକିବା ଲାଗି ନ୍ୟାୟପାଳିକାର ହସ୍ତକ୍ଷେପ ଜରୁରୀ ହୋଇପଡ଼ିଥିବା ଆଇନଜୀବୀମାନେ ସିଜେଆଇଙ୍କୁ କହିଛନ୍ତି। ଅଦାଲତରେ ଏଭଳି ଅନେକ ପିଟିଶନ ବିଚାର ଅପେକ୍ଷାରେ ପଡ଼ି ରହିଥିବା ସେମାନେ ଜଣାଇଛନ୍ତି।
