ନୂଆଦିଲ୍ଲୀ,୧୦।୧୧: ଦିଲ୍ଲୀର ଐତିହାସିକ ଲାଲକିଲ୍ଲା (Red Fort) ନିକଟରେ ସୋମବାର ସନ୍ଧ୍ୟାରେ ଏକ କାର୍ରେ ହୋଇଥିବା ଶକ୍ତିଶାଳୀ ବିସ୍ଫୋରଣ ଘଟଣାରେ ଏକ ଗୁରୁତ୍ୱପୂର୍ଣ୍ଣ ତଥ୍ୟ ସାମ୍ନାକୁ ଆସିଛି। ଏହି ବିସ୍ଫୋରଣସ୍ଥଳରୁ ତଦନ୍ତକାରୀ ଦଳ ଗୋଟିଏ ଜୀବନ୍ତ ଗୁଳି (Live Bullet) ଉଦ୍ଧାର କରିଛନ୍ତି।
ଟ୍ରାଫିକ୍ ସିଗନାଲ୍ ନିକଟରେ ଏକ ଧୀର ଗତିରେ ଯାଉଥିବା ଗାଡ଼ିରେ ଏହି ବିସ୍ଫୋରଣ ଘଟିଥିଲା। ଏଥିରେ ୧୦ ଜଣଙ୍କର ମୃତ୍ୟୁ ଘଟିଥିବା ବେଳେ ଅନେକ ଆହତ ହୋଇଛନ୍ତି ଏବଂ ଏକାଧିକ ଗାଡ଼ି ନଷ୍ଟ ହୋଇଯାଇଛି।
ଦିଲ୍ଲୀ ପୋଲିସ୍ କମିଶନର ସତୀଶ ଗୋଲଚା ସ୍ପଷ୍ଟ କରିଛନ୍ତି ଯେ ବିସ୍ଫୋରଣ ହୋଇଥିବା ଗାଡ଼ି ଭିତରେ ଯାତ୍ରୀମାନେ ଥିଲେ। ଘଟଣାସ୍ଥଳର ଗୁରୁତ୍ୱକୁ ଦୃଷ୍ଟିରେ ରଖି NIA (ଜାତୀୟ ଅନୁସନ୍ଧାନ ଏଜେନ୍ସି) ଏବଂ NSG (ଜାତୀୟ ସୁରକ୍ଷା ଗାର୍ଡ) ଟିମ୍ ତୁରନ୍ତ ସେଠାରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଲାଲକିଲ୍ଲା ଦିଲ୍ଲୀର ଏକ ଜନଗହଳିପୂର୍ଣ୍ଣ ଅଞ୍ଚଳରେ ଅବସ୍ଥିତ ଥିବାରୁ ଏହି ଘଟଣାକୁ ଗୁରୁତର ସହ ନିଆଯାଇଛି।
