ବମ୍ବେ: ବଲିଉଡ୍ରେ ଏବେ ଚାଲିଛି ବିବାହ ସିଜନ। ଗୋଟିଏ ପରେ ଗୋଟିଏ ସେଲିବ୍ରିଟି ବିବାହ ବନ୍ଧନରେ ଆବଦ୍ଧ ହେଉଛନ୍ତି। କରୋନା ମହାମାରୀ ଯୋଗୁ ବେଶ୍ ପ୍ରଭାବିତ ହୋଇଥିଲା ୨୦୨୦। ଲକ୍ଡାଉନ୍ ଯୋଗୁ ସମସ୍ତ ଉତ୍ସବ ଉପରେ କଟକଣା ଲାଗିଥିଲା। ହେଲେ ଏବେ ସ୍ଥିତି ବଦଳିଛି। କଟକଣା କୋହଳ ପରେ ଅନେକ ଯୋଡ଼ି ହାତକୁ ଦୁଇ ହାତ ହୋଇଛନ୍ତି। ହେଲେ ଏଭଳି କିଛି କଳାକାର ଅଛନ୍ତି ଯେଉଁମାନେ ଚଳିତ ବର୍ଷ ବିବାହ କରିପାରନ୍ତି। ଏହି ତାଲିକା ଶୀର୍ଷରେ ରହିଛନ୍ତି ଋଚା ଚଡ୍ଢା-ଅଲୀ ଫଜଲ। ଋଚା ଓ ଅଲୀଙ୍କ ବିବାହ ଗତ ଏପ୍ରିଲରେ ହୋଇଥାନ୍ତା। ମାତ୍ର ସବୁ ଭଣ୍ଡୁର କରିଦେଇଥିଲା କରୋନା। ମହାମାରୀ ଯୋଗୁ ସେମାନଙ୍କ ବିବାହକୁ କିଛି ଦିନ ଗଡ଼ାଇ ଦିଆଯାଇଥିଲା।
ବରୁଣ ଧଓ୍ବନ ପ୍ରେମିକା ନତାଶା ଦଲାଲଙ୍କ ହାତ ଧରିବେ ବୋଲି କୁହାଯାଉଛି। ଉଭୟ ନିର୍ବନ୍ଧ କରିସାରିଛନ୍ତି। ଏଣୁ ଶୀଘ୍ର ପ୍ରଶଂସକଙ୍କୁ ଖୁସି ଖବର ଶୁଣାଇପାରନ୍ତି।
ଅଭିନେତା ରଣବୀର କପୁର ପ୍ରେମିକା ଆଲିଆ ଭଟ୍ଟଙ୍କୁ ବିବାହ କରିପାରନ୍ତି। ଦୀର୍ଘଦିନ ଧରି ଉଭୟ ଉଭୟଙ୍କୁ ଡେଟ୍ କରୁଛନ୍ତି। ସେମାନଙ୍କ ସମ୍ପର୍କକୁ ପରିବାରର ସହମତି ମିଳିସାରିଛି। ଯଦି ସବୁକିଛି ଠିକ୍ ଚାଲେ ତେବେ ଚଳିତ ବର୍ଷ ବିବାହ ବନ୍ଧନରେ ସେମାନେ ଆବଦ୍ଧ ହୋଇପାରନ୍ତି ବୋଲି ଚର୍ଚ୍ଚା ହେଉଛି।
ସେହିଭଳି ବଲିଉଡ୍ର ଚର୍ଚ୍ଚିତ ରୋମାଣ୍ଟିକ୍ ଯୋଡି ଅର୍ଜୁନ କପୁର-ମଲାଇକା ଅରୋରା, ସୁସ୍ମିତା ସେନ୍-ରୋହମନ ସଲ ମଧ୍ୟ ବିବାହ ବନ୍ଧନରେ ଆବଦ୍ଧ ହୋଇପାରନ୍ତି।
