ବଇଣ୍ଡା,୧୮।୪(ଡି.ଏନ.ଏ.): ଆଠମଲ୍ଲିକ ଓ ଠାକୁରଗଡ଼ ଥାନା ଅଞ୍ଚଳରେ କିଛିଦିନ ହେଲା ଚୋରା ମଦ କାରବାର ବଢ଼ିବାରେ ଲାଗିଛି। ବିଶେଷକରି ଜାମୁଡୋଲି, ଲୁହାସିଂହା, ନଅଁଗା, ଠାକୁରଗଡ଼, କୃତ୍ତିବାସପୁର, ପାଇକସାହି, ଟାପଢୋଲ, ସାପଘରା, କୁରୁମଟାପ, ସାନହୁଲା, ପେଡିପଥର, ଆମ୍ବସରମୁଣ୍ଡା ଆଦି ପଞ୍ଚାୟତରେ ଅସାଧୁ ବ୍ୟବସାୟୀମାନେ ସକ୍ରିୟ ହୋଇପଡ଼ିଥିବା ଦେଖାଯାଉଛି। ଏଠାରେ ଥିବା କେତେକ ତେଜରାତି, ପାନ ଦୋକାନ, ଝୁମ୍ପୁଡି ହୋଟେଲ, ଢାବା ଆଦିରେ ଏହି ଚୋରା ଦେଶୀ ଓ ବିଦେଶୀ ମଦ ବିକ୍ରି କରାଯାଉଥିବା ଅଭିଯୋଗ ହେଉଛି। କିନ୍ତୁ ଅବକାରୀ ବିଭାଗ ପକ୍ଷରୁ ଠିକ୍ ଭାବେ ଚଢାଉ କରାଯାଉ ନ ଥିବା ଯୋଗୁ ଗ୍ରାମାଞ୍ଚଳରେ ଆଇନଶୃଙ୍ଖଳା ବିପର୍ଯ୍ୟସ୍ତ ହୋଇପଡୁଛି। ଏହି ଅଞ୍ଚଳରେ ଥିବା ଏକ ମଦ ଦୋକାନ ଓ ଦେଶୀ ମଦ ଭାଟି ମ୍ୟାନେଜର ବ୍ୟବସାୟ ବୃଦ୍ଧି ନିମନ୍ତେ ଦୈନିକ ବାଇକ୍ ମାଧ୍ୟମରେ ଚୋରା ମଦ ଗ୍ରାମାଞ୍ଚଳକୁ ଚାଲାଣ କରୁଥିବା ଅଭିଯୋଗ ହେଉଛି। ଏଥିସହ ଜଙ୍ଗଲିଆ ସ୍ଥାନଗୁଡିକରେ ଦେଶୀ ମହୁଲି ମଦ ରନ୍ଧା ଯାଇ ବିଭିନ୍ନ ଅଞ୍ଚଳକୁ ପଠାଯାଉଛି। ଅବକାରୀ ବିଭାଗ ପକ୍ଷରୁ କେଉଁଠି କେମିତି ଚଢ଼ାଉ କରାଯାଇ ୫ ରୁ ୧୦ ଲିଟର ଦେଶୀ ମହୁଲି ମଦ ଜବତ କରାଯାଉଥିବାବେଳେ ମଦ ମାଫିଆମାନଙ୍କୁ ଧରିବାରେ ବିଫଳ ହେଉଛି। ଫଳରେ ମଦ ମାଫିଆମାନେ ବିଭାଗର କେତେଜଣ କର୍ମଚାରୀଙ୍କୁ ହାତ ଗୁଞ୍ଜା ଦେଇ ଏହି କାରବାର ଜାରି ରଖିଥିବା ଜୁମୁଡୋଲି ଗ୍ରାମବାସୀ ଅଭିଯୋଗ କରିଛନ୍ତି। ତୁରନ୍ତ ଏ ଦିଗରେ ବିଭାଗୀୟ ଅଧିକାରୀମାନେ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି। ଏ ନେଇ ଆଠମଲ୍ଲିକ ଅବକାରୀ ବିଭାଗ ଉପନିରୀକ୍ଷକ ପ୍ରଫୁଲ୍ଲ କୁମାର ପତି କହିଛନ୍ତି, ବିଭାଗ ପକ୍ଷରୁ ଅନେକ ସମୟରେ ଚଢ଼ାଉ କରାଯାଉଛି।
