ବରଗଡ଼,୮ା୧୧(ପ୍ରେମାନନ୍ଦ ଖମାରୀ): ଆସନ୍ତା ୧୭ ତାରିଖ ଛତିଶଗଡ଼ ବିଧାନସଭା ନିର୍ବାଚନର ଦ୍ବିତୀୟ ପର୍ଯ୍ୟାୟ ମତଦାନ ଅନୁଷ୍ଠିତ ହେବ। ଏହି ଅନୁଯାୟୀ, ମତଦାନର ୪୮ ଘଣ୍ଟା ପୂର୍ବରୁ ଅର୍ଥାତ୍ ଆସନ୍ତା ୧୫ ତାରିଖ ସନ୍ଧ୍ୟା ୫ଟାରୁ ୧୭ ତାରିଖ ପର୍ଯ୍ୟନ୍ତ ଛତିଶଗଡ଼ ସୀମାନ୍ତ ଅର୍ଥାତ୍ ନିକଟବର୍ତ୍ତୀ ବରଗଡ଼ ଜିଲାର ସୋହେଲା, ଭଟଲି, ଅମ୍ବାଭୋନା ପାଇକମାଳ ଏବଂ ପଦ୍ମପୁର ଅଞ୍ଚଳର ୨୦ଟି ଦେଶୀ, ବିଦେଶୀ ମଦ ଦୋକାନ ବନ୍ଦ ରହିବ। ସେହିପରି ଆସନ୍ତା ଡିସେମ୍ବର ୩ରେ ହେବାକୁ ଥିବା ଭୋଟ୍ ଗଣତି ଦିନ ମଧ୍ୟ ସମ୍ପୃକ୍ତ ୨୦ ମଦ ଦୋକାନ ବନ୍ଦ ରହିବ। ଜିଲା ଅବକାରୀ କାର୍ଯ୍ୟାଳୟର ପତ୍ରସଂଖ୍ୟା-୨୫୫୯ ତା-୮।୧୧।୨୩ରିଖରେ ଏହି ସୂଚନା ଦିଆଯାଇଛି।
ବିଜ୍ଞପ୍ତିରେ ଉଲ୍ଲେଖ ରହିଥିବା ସୂଚନାନୁଯାୟୀ, ସେହି ସମୟସୀମା ମଧ୍ୟରେ ସୋହେଲା ଅବକାରୀ ଷ୍ଟେଶନ ଅଧୀନ ସୋହେଲା, ସରକଣ୍ଡା, ସୋହେଲା ଉପରପଡ଼ା, ଇଚ୍ଛାପାଲିରେ ରହିଥିବା ଦେଶୀ ମଦ ଦୋକାନ, ସୋହେଲାସ୍ଥିତ ବିଦେଶୀ ମଦ ଦୋକାନ ବନ୍ଦ ରହିବ। ସେହିପରି ଭଟଲି ଅବକାରୀ ଷ୍ଟେଶନ ଅଧୀନ ପ୍ରକାଶପୁର, ବଡ଼ଧରା, ମେଣ୍ଢାପାଲିସ୍ଥିତ ଦେଶୀମଦ ଦୋକାନ, ପ୍ରକାଶପୁର ବିଦେଶୀ ମଦ ଦୋକାନ, ପାଇକମାଳ ଅବକାରୀ ଷ୍ଟେଶନ ଅଧୀନ ଡଭା, ବଡ଼ ଅନକି, ଡୁଙ୍ଗୁରିପାଲି, ଭଇଁଷାଦର୍ହା, ଜଗଦଲପୁର, ବୁକ୍ରାମୁଣ୍ଡା ଦେଶୀମଦ ଦୋକାନ, ପଦ୍ମପୁର ଅବକାରୀ ଷ୍ଟେଶନ ଅଧୀନ ଲଖମରା, ଗୁଞ୍ଚାଡିହି ଦେଶୀମଦ ଦୋକାନ ନିର୍ଦ୍ଧାରିତ ସମୟରେ ବନ୍ଦ ରହିବ।
