ଦିଗପହଣ୍ଡି,୧୪।୫(ଅଶେଷ ନାଥ ମିଶ୍ର): ପ୍ରସ୍ତୁତ ହେଉଥିଲା ଅପମିଶ୍ରିତ ଦେଶୀ ମଦ। ପାଟ୍ରୋଲିଂ କରୁଥିବା ବେଳେ ଅତର୍କିତ ଚଢ଼ାଉ କରିଥିଲା ଦିଗପହଣ୍ଡି ପୋଲିସ। ଘଟଣାରେ ୮ ଶହ ଲିଟର ମହୁଆ ପୋଚ ଜବତ ହୋଇଥିବା ବେଳେ ୪ଜଣଙ୍କ ନାମରେ ମାମଲା ରୁଜୁ ହୋଇଛି। ଅଭିଯୁକ୍ତମାନେ ହେଲେ ତେଲିଆପଲ୍ଲୀ ଗ୍ରାମର ବଳରାମ ମଲ୍ଲିକ, ବୁଦ୍ଧିଆ ମଲ୍ଲିକ, ଏବଂ ଢେପାଗୁଡ଼ା ଗ୍ରାମର ଦେବରାଜ ମଲ୍ଲିକ ଏବଂ ରଞ୍ଜନ ମଲ୍ଲିକ।
ସୂଚନାନୁଯାୟୀ, ଗଞ୍ଜାମ ଜିଲା ଦିଗପହଣ୍ଡି ଥାନା ଏସ୍ଆଇ ଜ୍ୟୋତି ରଞ୍ଜନ ବେହେରା ସଦଳବଳେ ଚୋରା ମଦ ଧରପଗଡ ପାଇଁ ପାଟ୍ରୋଲିଂ କରୁଥିବା ବେଳେ ଦିଗପହଣ୍ଡି ବ୍ଳକ କୋଟିନଡ଼ା ପଞ୍ଚାୟତ ତେଲିଆପଲ୍ଲୀ ଗ୍ରାମ ନିକଟ ଦୁର୍ଗମ ଜଙ୍ଗଲରେ ଚୋରା ଅପମିଶ୍ରିତ ଦେଶୀମଦ ପ୍ରସ୍ତୁତ ହେଉଥିବା ଖବର ପାଇଥିଲେ। ପୋଲିସ ଟିମ ଅତର୍କିତ ଚଢାଉ କରିଥିଲା। ପୋଲିସକୁ ଦେଖି ମଦ ପ୍ରସ୍ତୁତ କରୁଥିବା ଜଣେ ବ୍ୟକ୍ତି ଜଙ୍ଗଲ ମଧ୍ୟକୁ ଧାଇଁ ପଳାଇଥିଲେ। ତାଙ୍କୁ ଧରିବା ପାଇଁ ପୋଲିସ କର୍ମଚାରୀ ମାନେ ଉଦ୍ୟମ କରିଥଲେ ମଧ୍ୟ ସଫଳ ହୋଇ ନ ଥିଲେ। ପୋଲିସ ସେଠାରୁ ୨ ପ୍ଲାଷ୍ଟିକ ଡ୍ରମରେ ଥିବା ୪ ଶହ ଲିଟର ମହୁଆ ପୋଚ ଜବତ କରିଥିଲେ। ଘଟଣାସ୍ଥଳରେ ଜବତ ତାଲିକା ପ୍ରସ୍ତୁତ କରାଯିବା ପରେ ସେଗୁଡିକୁ ନଷ୍ଟ କରାଯାଇଥିଲା। ବଳରାମ ମଲ୍ଲିକ ଏବଂ ବୁଦ୍ଧିଆ ବିନା ଲାଇସେନ୍ସରେ ମଦକୁ ଅଧିକ ନିଶା ଯୁକ୍ତ କରିବା ନିମନ୍ତେ ରାଜ ପିଡ଼ିଆ, କେନ୍ଦୁପତ୍ର, ଜଙ୍ଗଲରୁ ସଂଗୃହିତ ବିଭିନ୍ନ ଗଛର ଚେରମୂଳି, ମହୁଲ ଗୁଡ଼ ପ୍ରଭୃତି ବ୍ୟବହାର କରି ଦେଶୀମଦ ପ୍ରସ୍ତୁତ କରୁଥିଲେ। ଏନେଇ ଏସ୍ଆଇ ଥାନାରେ ଏତଲା ଦେବାପରେ ଭାରପ୍ରାପ୍ତ ଆଇଆଇସି ତଥା ଡିଏସ୍ପି ପ୍ରଶାନ୍ତ କୁମାର ପାତ୍ର ଥାନା ମାମଲା ନଂ.୧୭୨/୨୫ ଅନୁଯାୟୀ ଅଭିଯୁକ୍ତ ଦ୍ବୟଙ୍କ ନାମରେ ମାମଲା ରୁଜୁ କରି ତଦନ୍ତ ଚଳାଇଛନ୍ତି। ସେହିପରି ଢେପାଗୁଡ଼ା ଗ୍ରାମ ନିକଟ ଜଙ୍ଗଲରେ ପୋଲିସ ଟିମ ଚଢ଼ାଉ କରି ୨ ପ୍ଲାଷ୍ଟିକ ଡ୍ରମରେ ମହଜୁଦ ଥିବା ୪ ଶହ ଲିଟର ଅପମିଶ୍ରିତ ମଦପୋଚ ଜବତ କରିଛନ୍ତି। ଏହି ମଦ ପ୍ରସ୍ତୁତିରେ ସମ୍ପୃକ୍ତ ଥିବା ଢେପାଗୁଡ଼ା ଗ୍ରାମର ଦେବରାଜ ମଲ୍ଲିକ ଏବଂ ରଞ୍ଜନ ମଲ୍ଲିକଙ୍କ ନାଁରେ ଥାନା ମାମଲା ନଂ.୧୭୩/୨୪ ଅନୁଯାୟୀ ମକଦ୍ଦମା ରୁଜୁ କରାଯାଇଛି। ଖୁବ ଶୀଘ୍ର ଫେରାର ଅଭିଯୁକ୍ତମାନଙ୍କୁ ଗିରଫ କରାଯିବ ବୋଲି ଭାରପ୍ରାପ୍ତ ଆଇଆଇସି କହିଛନ୍ତି।
