ନୂଆଦିଲ୍ଲୀ,୧୧ା୧୨(ପ୍ରସ୍ତୁତି: ଦୁର୍ଯ୍ୟୋଧନ ମିଶ୍ର): ଝାଡ଼ଖଣ୍ଡର ରାଜ୍ୟ ସଭା ସାଂସଦ ଧୀରଜ ପ୍ରସାଦ ସାହୁଙ୍କ ସମ୍ପର୍କୀୟମାନଙ୍କ ମାଲିକାନାରେ ଥିବା ମଦଭାଟିଗୁଡ଼ିକରୁ ୩୦୦ କୋଟିରୁ ଊର୍ଦ୍ଧ୍ୱ ଟଙ୍କା ବାହାରିସାରିଲାଣି। ୨୦୧୮ ମେ’ରେ ଧୀରଜ ଉଚ୍ଚ ସଦନ ପାଇଁ କଂଗ୍ରେସରୁ ପୁନଃ ପ୍ରତିଦ୍ୱନ୍ଦ୍ୱିତା ବେଳେ ନିର୍ବାଚନ କମିଶନ (ଇସି)ଙ୍କ ନିକଟରେ ଦାଖଲ କରିଥିବା ସତ୍ୟପାଠରେ ତାଙ୍କ ପାଖରେ ମୋଟ ୩୪.୮୩ କୋଟି ଟଙ୍କାର ସମ୍ପତ୍ତି ଥିବା ଦର୍ଶାଇଥିଲେ। ସେଥିରୁ ୨.୦୪ କୋଟି ଟଙ୍କାର ବିଭିନ୍ନ ଅସ୍ଥାବର ସମ୍ପତ୍ତି ରହିଥିଲା। ଅସ୍ଥାବର ସମ୍ପତ୍ତି ଭିତରେ ଆସୁଥିବା ନଗଦ ଟଙ୍କାର ପରିମାଣ ମାତ୍ର ୨୭ ଲକ୍ଷ ବୋଲି ସେ ଉକ୍ତ ଆଫିଡେଭିଟ୍ରେ ଉଲ୍ଲେଖ କରିଥିଲେ।
ଡିସେମ୍ବର ୬ରୁ ଓଡ଼ିଶାର ବଲାଙ୍ଗୀର ସୁଦପଡ଼ା ମଦଭାଟି ସମେତ ୮ଟି ସ୍ଥାନ, ଝାଡ଼ଖଣ୍ଡ ଏବଂ ପଶ୍ଚିମବଙ୍ଗରେ ଆୟକର (ଆଇଟି) ବିଭାଗ ପକ୍ଷରୁ ଚାଲିଥିବା ଚଢ଼ାଉ ବେଳେ ଗଣି ହେଉ ନ ଥିବା ବସ୍ତା ବସ୍ତା ଟଙ୍କାକୁ ଦେଖି ଲୋକଙ୍କ ଆଖି ଖୋସି ହୋଇଗଲାଣି। ତେଣୁ ଧୀରଜ ସାଢ଼େ ୪ ବର୍ଷ ଭିତରେ ଏମିତି କେଉଁ ‘ମହାଦେବ’ଙ୍କୁ ଖୁସି କରିଦେଲେ ଯେ ତାଙ୍କ ପାଖକୁ ଏତେ ଟଙ୍କା ଚାଲିଆସିଲା ବୋଲି ସାଧାରଣରେ ପ୍ରଶ୍ନ ଉଠିଲାଣି।
ନଭେମ୍ବର ୭ ଓ ୧୭ରେ କଂଗ୍ରେସ ଶାସିତ ଛତିଶଗଡ଼ ବିଧାସଭାର ୯୦ ଆସନ ପାଇଁ ନିର୍ବାଚନ ଅନୁଷ୍ଠିତ ହୋଇଥିଲା। ସରଗରମ ପ୍ରଚାର ଚାଲିଥିବାବେଳେ ନଭେମ୍ବର ୩ରେ ଭୋଟ ପରିଣାମକୁ ପ୍ରଭାବିତ କରିବା ଭଳି ଏକ ଖବର ଆସିଥିଲା। ନିଜକୁ ମହାଦେବ ବେଟିଂ ଆପ୍ର ମାଲିକ ବୋଲାଉଥିବା ଶୁଭମ୍ ସୋନି ଏକ ଭିଡିଓ ଜାରି କରିଥିଲେ। ସାମାଜିକ ଗଣମାଧ୍ୟମରେ ବହୁଳ ପ୍ରସାରିତ ଉକ୍ତ ଭିଡିଓରେ ଶୁଭମ୍ କହିଥିଲେ, ସେ ମହାଦେବ ଆପ୍ ଚଳାଇବା ପାଇଁ ଅନୁମତି ପ୍ରଦାନ ସକାଶେ ଲୋକଙ୍କ ନିବେଶ ଅର୍ଥରୁ ତତ୍କାଳୀନ ମୁଖ୍ୟମନ୍ତ୍ରୀ ଭୂପେଶ ବଘେଲଙ୍କୁ ୫୦୮ କୋଟି ଟଙ୍କା ଲାଞ୍ଚ ଦେଇଛନ୍ତି।
ସେତେବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଭାଜପା ନେତାମାନେ ଏହାକୁ ପ୍ରସଙ୍ଗ କରି କ୍ଷମତାସୀନ କଂଗ୍ରେସକୁ ଟାର୍ଗେଟ କରିଥିଲେ। ଏହାକୁ ଛତିଶଗଡ଼ରେ ବଘେଲ ସରକାର ଧରାଶାୟୀ ହେବାର ଅନ୍ୟତମ ମୁଖ୍ୟ କାରଣ ବୋଲି କୁହାଯାଉଛି। ଏପରି ସମୟରେ ଧୀରଜଙ୍କ ସମ୍ପର୍କୀୟଙ୍କ ମଦଭାଟି, ଘର, ଅଫିସ ଆଦିରୁ ବହୁ କୋଟି ଟଙ୍କା ଜବତ ହେବା କେବଳ ଓଡ଼ିଶା ନୁହେଁ, ବରଂ ସାରା ଦେଶରେ ଚର୍ଚ୍ଚାର ବିଷୟ ପାଲଟିଛି। ତେଣୁ ଏହା ମଦ ବିକ୍ରିରୁ ନା ମହାଦେବ ଆପ୍ ଜରିଆରେ ମିଳିଥିବା ଟଙ୍କା ବୋଲି ପ୍ରଶ୍ନ ହେଉଛି।
ଭାଜପା ନେତାମାନେ ୬୪ ବର୍ଷୀୟ ଧୀରଜଙ୍କ ବିରୋଧରେ ସାଂଘାତିକ ଅଭିଯୋଗ ଆଣିଛନ୍ତି। ସ୍ଥାନୀୟ ନେତାଙ୍କଠାରୁ ନେଇ କେନ୍ଦ୍ରମନ୍ତ୍ରୀ ଅନୁରାଗ ସିଂ ଠାକୁର ଓ ମୀନାକ୍ଷୀ ଲେଖିଙ୍କ ପର୍ଯ୍ୟନ୍ତ ନେତାମାନେ ଏହି ବିପୁଳ ଟଙ୍କାର ଉତ୍ସ କ’ଣ ବୋଲି ପ୍ରଶ୍ନ କରିଛନ୍ତି। ଝାଡ଼ଖଣ୍ଡ ଭାଜପା ଏମ୍ପି ବିଦ୍ୟୁତ୍ ବରଣ ମହତୋ ଏବଂ ପୂର୍ବତନ ମନ୍ତ୍ରୀ ସି.ପି. ସିଂଙ୍କ ମତରେ ଛତିଶଗଡ଼ରେ କଂଗ୍ରେସ ପୂର୍ଣ୍ଣ ସଂଖ୍ୟାଗରିଷ୍ଠତା ହାସଲ କରି ନ ପାରିଲେ ଝୁଲା ପରିସ୍ଥିତିରେ ନିଅଣ୍ଟ ପଡ଼ିବାକୁ ଥିବା ବିଧାୟକମାନଙ୍କୁ କିଣିବା (ଘୋଡ଼ାବେପାର) ପାଇଁ ଧୀରଜ ଏହି ନଗଦ ଟଙ୍କା ବିଭିନ୍ନ ସ୍ଥାନରେ ଲୁଚାଇ ରଖିଥିଲେ। ଅନେକ ଗାଡ଼ିରେ ଟଙ୍କା ବୁହାହୋଇ ଓଡ଼ିଶାକୁ ଅଣାଯାଇଥିଲା। ସେହିପରି ଆସନ୍ତା ବର୍ଷ ଶେଷ ଆଡ଼କୁ ଝାଡ଼ଖଣ୍ଡରେ ଅନୁଷ୍ଠିତ ହେବାକୁ ଥିବା ବିଧାନସଭା ନିର୍ବାଚନରେ ମଧ୍ୟ କଂଗ୍ରେସ ଧୀରଜଙ୍କ ନଗଦ ଟଙ୍କାକୁ ଖର୍ଚ୍ଚ କରିଥାଆନ୍ତା ବୋଲି ଭାଜପା ନେତାମାନେ ଅଭିଯୋଗ ଆଣିଛନ୍ତି।
ପ୍ରଧାନମନ୍ତ୍ରୀ ମୋଦି ଆଇଟି ପକ୍ଷରୁ ଜବତ ଟଙ୍କାକୁ ନେଇ ଶୁକ୍ରବାର ମାଇକ୍ରୋବ୍ଲଗିଂ ସାଇଟ୍ ଏକ୍ସ’ରେ ଉଲ୍ଲେଖ କରିଥିଲେ। ଲୋକଙ୍କଠାରୁ ଲୁଟାଯାଇଥିବା ପ୍ରତ୍ୟେକଟି ଟଙ୍କା ଫେରାଇବାକୁ ପଡ଼ିବ ବୋଲି ସେ ନିଜ ପୋଷ୍ଟରେ ଉଲ୍ଲେଖ କରିଥିଲେ। ତେଣୁ ଏହା ମହାଦେଦ ଆପ୍ ଜରିଆରେ ଛତିଶଗଡ଼ ଜନତାଙ୍କୁ ଲୁଟାଯାଇଥିବା ଅର୍ଥ ନା ପଶ୍ଚିମ ଓଡ଼ିଶାରେ ମଦ ବିକ୍ରିରୁ ମିଳିଥିବା ଟଙ୍କା ବୋଲି ପ୍ରଶ୍ନ ଉଠିଛି। ଭାଜପା ନେତାମାନଙ୍କ ମତରେ ଖୋଳତାଡ଼ ଜାରି ରହିଲେ ଆହୁରି ବାହାରିବ। ଜବତ ଟଙ୍କାର ପରିମାଣ ୫୦୦ କୋଟିକୁ ଟପିଯିବ।
ଭାରତରେ ଅଦ୍ୟାବଧି କୌଣସି ଏଜେନ୍ସି ପକ୍ଷରୁ ଜଣେ ବ୍ୟକ୍ତି ବା ଗ୍ରୁପ୍ଠାରୁ ଏତେ ପରିମାଣର ଟଙ୍କା ଜବତ ହୋଇ ନ ଥିଲା। ତେଣୁ ଛତିଶଗଡ଼ରେ ମହାଦେବ ବେଟିଂ ଆପ୍ ଦୁର୍ନୀତିର ତଦନ୍ତ କରୁଥିବା ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ସମେତ ଦେଶର ପ୍ରିମିୟର ଇନ୍ଭେଷ୍ଟିଗେଟିଂ ଏଜେନ୍ସି କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ଦ୍ୱାରା ଧୀରଜଙ୍କ ମାମଲାର ତଦନ୍ତ କରାଗଲେ ସବୁ ସତ ପଦାକୁ ଆସିବ ବୋଲି ଲୋକେ କହୁଛନ୍ତି। ଅନ୍ୟପକ୍ଷେ କଂଗ୍ରେସ ନେତା ଜୟରାମ ରମେଶ କହିଛନ୍ତି, ଧୀରଜଙ୍କ ବ୍ୟବସାୟ ସହ ଦଳର କିଛି ସମ୍ପର୍କ ନାହିଁ। ତାଙ୍କଠାରୁ ମିଳିଥିବା ବିପୁଳ ନଗଦ ଟଙ୍କାର ଉତ୍ସ ସେ ହିଁ ବତାଇପାରିବେ।
