ଭୁବନେଶ୍ୱର,୩୧।୭(ବ୍ୟୁରୋ): ରାଜ୍ୟରେ ସର୍ବନିମ୍ନ ଖୁଚୁରା ମୂଲ୍ୟ(ଏମ୍ଆର୍ପି)ଠାରୁ ଅଧିକ ଦରରେ ମଦ ବିକ୍ରି ହେଉଛି। ଏପରି କି ମଦ ଦୋକାନୀମାନେ ଗ୍ରାହକଙ୍କୁ ରସିଦ୍ ଦେଉନାହାନ୍ତି। ଶନିବାର ପ୍ରଶ୍ନକାଳରେ ବିଜେଡି ସଭ୍ୟ ଅରବିନ୍ଦ ଢାଲିଙ୍କ ମୂଳ ପ୍ରଶ୍ନର ଉତ୍ତରରେ ଅବକାରୀ ମନ୍ତ୍ରୀ ଅଶ୍ୱିନୀ କୁମାର ପାତ୍ର ଏକଥା ସ୍ବୀକାର କରିଛନ୍ତି ।
ମୂଳ ପ୍ରଶ୍ନକର୍ତ୍ତା ପଚାରିଥିଲେ ଯେ ରାଜ୍ୟରେ ଯେଉଁ ଦେଶୀ ଓ ବିଦେଶୀ ମଦ ବିକ୍ରି କରାଯାଉଛି, ତାହା ଏମ୍ଆରପିଠାରୁ ଅଧିକ ଦାମରେ ବିକ୍ରି ହେଉଛି। ଏ ଖବର ସରକାରଙ୍କ ଦୃଷ୍ଟିକୁ ଆସିଛି କି? ଅବକାରୀ ମନ୍ତ୍ରୀ କହିଛନ୍ତି ଯେ ୨୦୨୨-୨୩ ଆର୍ଥିକ ବର୍ଷର ପ୍ରଥମ ୬ ମାସରେ ୩୧ଟି ଏଭଳି ମାମଲା(ଏମ୍ଆର୍ପିରୁ ଅଧିକ ଦରରେ ବିକ୍ରି) ରୁଜୁ କରାଯାଇଛି ଓ ସେଥିରୁ ମାତ୍ର ୮ଟି ମାମଲା ଫଇସଲା ହୋଇଛି ଏବଂ ବାକି ୨୩ଟି କେସ୍ ବିଚାରାଧୀନ ରହିଛି।
ଭାଜପା ସଭ୍ୟ ବିଷ୍ଣୁ ଚରଣ ସେଠୀ ମଧ୍ୟ କହିଲେ, ୧୦ ଟଙ୍କାର ଜିନିଷ କିଣିଲେ ରସିଦ ମିଳୁଛି। ମଦ କିଣିଲେ ରସିଦ ମିଳୁନି। ରସିଦ ଦେବା ବ୍ୟବସ୍ଥା ଅଛି କି ନାହିଁ। ବିଜେଡି ସଭ୍ୟ ଅନନ୍ତ ଦାସ କହିଲେ, ଚନ୍ଦନେଶ୍ୱର, ଦୀଘାରେ ଲୋକେ ଦିନରାତି ସର୍ବତ, ପଇଡ଼ ପିଇଲା ଭଳି ମଦ ପିଉଛନ୍ତି। ପୋଲିସବାଲା ଦେଖୁଛନ୍ତି। କିଛି କରୁନାହାନ୍ତି। ଏହାକୁ ବନ୍ଦ କରିବେ କି? ମନ୍ତ୍ରୀ କହିଲେ, ଅନ୍ୟ ସାମଗ୍ରୀ ଭଳି ମଦ କିଣିଲେ ରସିଦ ବ୍ୟବସ୍ଥା ରହିଛି। ତେବେ ରସିଦ ନେବେ କି ନାହିଁ ତାହା ଗ୍ରାହକଙ୍କ ଉପରେ ନିର୍ଭର କରୁଛି। ରାଜ୍ୟରେ ଦେଶୀ ଓ ବିଦେଶୀ ମଦ ଦୋକାନଗୁଡ଼ିକରେ ଏମ୍ଆର୍ପିଠୁ ଅଧିକ ଦାମରେ ମଦ ବିକ୍ରି ହେଉଥିବାର ଖବର ସରକାରଙ୍କ ଦୃଷ୍ଟିକୁ ଆସିଛି। ଅଚାନକ ଦୋକାନଗୁଡ଼ିକ ପରିଦର୍ଶନ ସମୟରେ କିମ୍ବା ଅଧିକ ଦାମରେ ବିକ୍ରିର କୌଣସି ଅଭିଯୋଗ ଆସିବା ମାତ୍ରେ ତାହାର ତଦନ୍ତ ଜିଲା ସ୍ତରରେ ଓ ଆବଶ୍ୟକସ୍ଥଳେ ଡିଭିଜନ ଓ ରାଜ୍ୟସ୍ତରୀୟ ସ୍କ୍ବାଡ୍ ଦ୍ୱାରା କରାଯାଇଥାଏ। ଅଭିଯୋଗର ସତ୍ୟାସତ୍ୟ ନିର୍ଦ୍ଧାରଣ ପରେ ସମ୍ପୃକ୍ତ ଲାଇସେନ୍ସଧାରୀଙ୍କ ବିରୋଧରେ ଗୁରୁତର ଅନିୟମିତତା ରିପୋର୍ଟ(ଏସ୍ଆଇଆର) ଦରଜ ହୋଇ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥାଏ ବୋଲି ମନ୍ତ୍ରୀ କହିଛନ୍ତି।
୨୦୨୧-୨୨ରେ ରାଜ୍ୟରେ ଏମ୍ଆର୍ପିଠାରୁ ଅଧିକ ଦରରେ ମଦ ବିକ୍ରି ସମ୍ପର୍କିତ ୨୯ଟି ମାମଲା ହୋଇଛି। ଏଥିରେ ୨୯ଲକ୍ଷ ଟଙ୍କା ଜରିମାନା ଆଦାୟ ହୋଇଛି। ସେହିପରି ୨୦୨୨-୨୩ ଆର୍ଥିକ ବର୍ଷର ଜୁନ୍ ମାସ ଶେଷ ସୁଦ୍ଧା ମୋଟ ୩୧ଟି ଏମ୍ଆରପି ଉଲ୍ଲଂଘନ କେସ୍ରେ ୮ଲକ୍ଷ ଟଙ୍କା ଜରିମାନା ଆଦାୟ ହୋଇଛି। ଦୀଘାରେ ପଶ୍ଚିମବଙ୍ଗରୁ ମଦ ପିଇ ଲୋକେ ସେଠାରେ ବସୁଛନ୍ତି। ପଶ୍ଚିମବଙ୍ଗରୁ ମାଦକ ଦ୍ରବ୍ୟ ଚୋରା ଚାଲାଣ ହେଉଛି। ମାତ୍ର ସେଠାକାର ପୋଲିସ ଆମ ରାଜ୍ୟର ପୋଲିସକୁ ସହଯୋଗ କରୁନାହାନ୍ତି ବୋଲି ମନ୍ତ୍ରୀ କହିଛନ୍ତି।
