ଫୁଲବାଣୀ ଅଫିସ/ଟିକାବାଲି,୧୮।୧୧: କନ୍ଧମାଳ ଜିଲା ଟିକାବାଲି ଥାନା ଅଞ୍ଚଳର ବିଦ୍ୟୁତ ବିଭାଗର କର୍ମଚାରୀ କାଳୁ ଚରଣ ପଲେଇ ଶୁକ୍ରବାର ଭିଜିଲାନ୍ସ ହାତରେ ଧରାପଡ଼ିଛନ୍ତି। ସେ ବିଦ୍ୟୁତ୍ ସଂଯୋଗ କରାଇ ଦେବାକୁ ଜଣେ ଗ୍ରାହାକଙ୍କଠାରୁ ୫ ହଜାର ଲାଞ୍ଚ ନେଉଥିବା ବେଳେ ଶୁକ୍ରବାର ଭିଜିଲାନ୍ସ ବିଭାଗ ତାଙ୍କୁ ଗିରଫ କରିଛି।
ଛତିଘର ଗାଁର ରିଙ୍କୁ ଭୁକ୍ତା ନାମକ ଜଣେ ବ୍ୟକ୍ତି ତାଙ୍କ ଦୋକାନ ଘରକୁ ନୂଆ ବିଦ୍ୟୁତ୍ କନେକଶନ ନେବା ପାଇଁ ଅନ୍ଲାଇନରେ ଆବେଦନ କରିବା ସହ ଆବଶ୍ୟକ ଟଙ୍କା ପଇଠ କରିଥିଲେ। ହେଲେ ୫ ହଜାର ଟଙ୍କା ନ ଦେଲେ ବିଦ୍ୟୁତ୍ ସଂଯୋଗ ଦେଇ ହେବ ନାହିଁ ବୋଲି ଲାଇନ୍ମ୍ୟାନ୍ କାଳୁ ଗ୍ରାହକ ରିଙ୍କୁଙ୍କୁ କହିଥିଲେ। ଏ ନେଇ ରିଙ୍କୁ ୧୭ ତାରିଖରେ ଭିଜିଲାନ୍ସରେ ଅଭିଯୋଗ କରିଥିଲୋ ଶୁକ୍ରବାର ଯୋଜନା ଅନୁସାରେ ରିଙ୍କୁଙ୍କ ପାଖକ ଟଙ୍କା ନେବା ପାଇଁ କର୍ମଚାରୀ କାଳୁ ଆସିଥିଲେ। ଟଙ୍କା ନେଇ ଗାଡି ଡିକିରେ ରଖିବା ପରେ ସେଠାରେ ପୂର୍ବରୁ ପ୍ରସ୍ତୁତ ଥିବା ଭିଜିଲାନ୍ସ ଅଧିକାରୀମାନେ ତାଙ୍କୁ ଧରିଥିଲେ। ଏ ନେଇ ବ୍ରହ୍ମପୁର ଭିଜିଲାନ୍ସରେ ଏକ ମାମଲା ନଂ.୨୫/୨୨ ରୁଜୁ ହୋଇଛି।
