ଲଣ୍ଡନ, ୯।୪: ତାପମାତା ବୃଦ୍ଧି ଓ ଜଳବାୟୁ ପରିବର୍ତ୍ତନ ଯୋଗୁ ପ୍ରକୃତି ବ୍ୟାପକ ପ୍ରଭାବିତ ହେବାରେ ଲାଗିଛି। ଏଥିଯୋଗୁ ସମଗ୍ର ପ୍ରାଣୀଜଗତ ପ୍ରାକୃତିକ ବିପର୍ଯ୍ୟୟର ସମ୍ମୁଖୀନ ହେଉଛି। କ୍ରମବର୍ଦ୍ଧିଷ୍ଣୁ ତାପମାତ୍ରା ହେତୁ ହିମବାହ ତରଳିବାରେ ଲାଗିଛି। କେନ୍ଦ୍ରୀୟ ହିମାଳୟର ହିମବାହ ଦ୍ରୁତ ବେଗରେ ହ୍ରାସ ପାଇଛି, ଯେଉଁଥିପାଇଁ ୨୦୦୦ରୁ ୨୦୨୦ ମସିହା ମଧ୍ୟରେ ଗ୍ଲାସିଆଲ ଲେକ୍ (ହିମବାହ ତରଳି ସୃଷ୍ଟି ହୋଇଥିବା ହ୍ରଦ)ର ସଂଖ୍ୟା ବୃଦ୍ଧି ପାଇଛି। ଗତ ୨୦ ବର୍ଷ ମଧ୍ୟରେ ହିମାଳୟରୁ ୨.୭ ଗିଗା ଟନ୍ (୨୭୦କୋଟି ଟନ୍) ଓଜନର ହିମବାହ ତରଳିଛି। ଏହା ୫୭୦ ନିୟୁତ ହାତୀଙ୍କ ଓଜନ ସହିତ ସମାନ ବୋଲି ବିଶେଷଜ୍ଞ ଦାବି କରିଛନ୍ତି। ବ୍ରିଟେନ୍ର ୟୁନିଭର୍ସିଟି ଅଫ୍ ସେଣ୍ଟ୍ ଆଣ୍ଡ୍ରେୟୁସ୍୍, ଚାଇନିଜ୍ ଏକାଡେମୀ ଅଫ୍ ସାଇନ୍ସ, ଅଷ୍ଟ୍ରେଲିଆର ଗ୍ରାଜ୍ ୟୁନିଭର୍ସିଟି ଅଫ୍ ଟେକ୍ନୋଲୋଜି ଏବଂ ଗର୍ନେଜ ମେଲୋନ ୟୁନିଭର୍ସିଟି ପକ୍ଷରୁ ହିମବାହ କ୍ଷୟ ବିଷୟରେ ଅଧ୍ୟୟନ କରାଯାଇଛି। ହିମବାହ ତରଳିବା କାରଣରୁ ହିମାଳୟ ପର୍ବତରେ ବହୁ ପରିବର୍ତ୍ତନ ପରିଲକ୍ଷିତ ହେଉଥିବା ବିଶେଷଜ୍ଞମାନେ କହିଛନ୍ତି। ପ୍ରଥମ ଥର ପାଇଁ ହିମାଳୟରୁ କ୍ଷୟ ହୋଇଥିବା ହିମବାହର ପରିମାଣ ଆକଳନ ବିଶେଷଜ୍ଞମାନଙ୍କ ଦ୍ୱାରା ସମ୍ଭବ ହୋଇଛି। ଅଧ୍ୟୟନ ସମ୍ପର୍କିତ ରିପୋର୍ଟର ବିସ୍ତୃତ ବିବରଣୀ ଜର୍ନାଲ୍ ‘ନେଚର ଜିଓସାଇନ୍ସ’ରେ ପ୍ରକାଶ ପାଇଛି। ହିମାଳୟର ଅନ୍ୟ ପାର୍ଶ୍ୱ ଅପେକ୍ଷା କେନ୍ଦ୍ରୀୟ ଅଞ୍ଚଳରେ ଅଧିକ ମାତ୍ରାରେ ହିମବାହ ତରଳୁଥିବା ବିଶେଷଜ୍ଞମାନେ ଲକ୍ଷ୍ୟ କରିଛନ୍ତି। ଗ୍ଲାସିଓ-ହାଇଡ୍ରୋଲୋଜିକାଲ ମଡେଲ ଜରିଆରେ ସାଟେଲାଇଟ୍ରୁ ସଂଗୃହୀତ ଡେଟା ଦ୍ୱାରା ହିମବାହ କ୍ଷୟ ସମ୍ପର୍କରେ ତଥ୍ୟ ହାସଲ କରାଯାଇଛି। ଅନ୍ୟପକ୍ଷେ ପୂର୍ବ ଅଧ୍ୟୟନଗୁଡ଼ିକର ବିଶେଷଜ୍ଞମାନେ ଏ ବିଷୟରେ ଅବଗତ ନ ଥିବା ରିପୋର୍ଟରେ କୁହାଯାଇଛି।
୨୦୦୦ରୁ ୨୦୨୦ ମଧ୍ୟରେ ହିମାଳୟରେ ପ୍ରୋଗ୍ଲାସିଆଲ୍ ଲେକ୍ ସଂଖ୍ୟା ବଢ଼ିଛି। ଗ୍ଲାସିଆଲ୍ ଲେକ୍ ସଂଖ୍ୟାରେ ୪୭% ବୃଦ୍ଧି ଘଟିଥିବାବେଳେ ଅଞ୍ଚଳରେ ୩୩% ଏବଂ ଆୟତନରେ ୪୨% ବୃଦ୍ଧି ଘଟିଛି। ହିମବାହ ତରଳିବା ପଛର ମୁଖ୍ୟ କାରଣ ଖୋଜି ବାହାର କରି ଏହାର ପ୍ରତିକାର କରିବା ବର୍ତ୍ତମାନ ସମୟରେ ବଡ଼ ଚ୍ୟାଲେଞ୍ଜ ପାଲଟିଛି। ଗ୍ଲାସିଆଲ୍ ଲେକ୍ର ପରିମାଣ ବଢ଼ିବା ଯୋଗୁ ସମୁଦ୍ର ପତ୍ତନରେ ବୃଦ୍ଧି ଘଟିବ। ଫଳରେ ତଳିଆ ଅଞ୍ଚଳ ଏବଂ ସମୁଦ୍ର ଆଖପାଖ ସହରକୁ ବିପଦ ମାଡ଼ିବା ନେଇ ବିଶେଷଜ୍ଞମାନେ ସତର୍କ କରାଇଛନ୍ତି।
