ପଟ୍ଟାମୁଣ୍ଡାଇ,୧୮ା୩(ସ୍ବ.ପ୍ର.): ନ୍ୟାଶନାଲ ଗ୍ରୀନ୍ ଟ୍ରିବୁନାଲ (ଏନ୍ଜିଟି) ସ୍ଥାନୀୟ ମାଳିପୁର ଛକ ନିକଟ ଡାମପୁର-ଉଦୟପୁର କାଣିନଦୀ ପାଟନାଳୀ ବନ୍ଧ ଓ ଜମିରୁ ମାଟି ନ ଖୋଳିବାକୁ ନିର୍ଦ୍ଦେଶ ଦେଇଛନ୍ତି। ହେଲେ କେତେଜଣ ବ୍ୟକ୍ତି ଜେସିବି ଲଗାଇ ମାଟି ଖୋଳୁଛନ୍ତି। ସେହି ମାଟିକୁ ହାଇଓ୍ବାରେ ଅନ୍ୟତ୍ର ଚାଲାଣ କରୁଛନ୍ତି। ପ୍ରଶାସନ ଏ ସଂକ୍ରାନ୍ତରେ ଅବଗତ ଥିଲେ ମଧ୍ୟ ନୀରବଦ୍ରଷ୍ଟା ସାଜିଛି। ମାଳିପୁର, ଉଦୟପୁର, ବାଲିପାଟଣା ଓ ଖୋର୍ଦ୍ଧା ଗ୍ରାମବାସୀ ଏହାକୁ ବିରୋଧ କରୁଛନ୍ତି। ହେଲେ ମାଟି ଉଠାଣ କରୁଥିବା ବ୍ୟକ୍ତିମାନେ ପ୍ରଭାବଶାଳୀ ହୋଇଥିବାରୁ ଗ୍ରାମବାସୀ ଭୟରେ ମୁହଁ ଖୋଲୁ ନାହାନ୍ତି। ଏ ସଂକ୍ରାନ୍ତରେ ପୋଲିସ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ହୋଇଛି।
ସୂଚନାଯୋଗ୍ୟ, ଏହି ମାଟି ମାଫିଆମାନେ ଅଳଭା ନିକଟ ବ୍ରାହ୍ମଣୀ ନଦୀପଠାରୁ ମାଟି ଉଠାଣ କରୁଥିଲେ। ଏନ୍ଜିଟିର କଡା ନିର୍ଦ୍ଦେଶ ପରେ ପଟ୍ଟାମୁଣ୍ଡାଇ ତହସିଲଦାର ସେଠାରୁ ମାଟି ଉଠାଣ ବନ୍ଦ କରିଥିଲେ। ଏହି ଘଟଣାରେ ତହସିଲଦାର ଗୋଟିଏ ଗାଡ଼ି ଜବତ କରି ୧୫ ହଜାର ଟଙ୍କା ଜରିମାନା ଆଦାୟ କରିଥିଲେ। ଏବେ ଉଦୟପୁର-ମାଳିପୁର କାଣୀ ପାଟନାଳୀ ବନ୍ଧ ଓ ଜମିକୁ କାଟି ବେଆଇନ ଭାବେ ମାଟି ଉଠାଣ ଚାଲିଛି। ପାରାଦୀପ ଭୂତମୁଣ୍ଡାଇ ଅଞ୍ଚଳର ଜଣେ ମାଟି ମାଫିଆ ସରକାରୀ ନୀତି ନିୟମ ଓ ଏନ୍ଜିଟି ନିର୍ଦ୍ଦେଶକୁ ଅବମାନନା କରି ମାଟି ଉଠାଣ କରୁଥିବା ଅଭିଯୋଗ ହୋଇଛି। ପ୍ରତିଦିନ ଶତାଧିକ ଟ୍ରିପ୍ ମାଟି ଚାଲାଣ ହେଉଛି। ଫଳରେ ସମ୍ପୃକ୍ତ ଅଞ୍ଚଳ ପ୍ରତି ବିପଦ ସୃଷ୍ଟି ହୋଇଛି। ପଟ୍ଟାମୁଣ୍ଡାଇ ତହସିଲଦାର ମାଟି ଉଠାଣ ନ ରୋକିଲେ ଉଦୟପୁର, ଡାମରପୁର ସମେତ ୫ ମୌଜାର ଗ୍ରାମବାସୀ ଆନ୍ଦୋଳନକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି। ଏ ସମ୍ପର୍କରେ ପଟ୍ଟାମୁଣ୍ଡାଇ ତହସିଲଦାର ଦିଲୀପ କୁମାର ସେଠୀ କହିଛନ୍ତି, ଉଦୟପୁର-ଡାମରପୁର କାଣୀ ପାଟନାଳି କଡ଼ରୁ ମାଟି ଉଠାଣ ହେଉଥିବା ମୁଁ ଜାଣିଛି। ଖୁବ୍ଶୀଘ୍ର ମାଟି ଉଠାଣ କରୁଥିବା ଲୋକଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ସୂଚନାଯୋଗ୍ୟ, ମଙ୍ଗଳବାର ପଟ୍ଟାମୁଣ୍ଡାଇ ତହସିଲଦାର ଓ ଜଳସଂପଦ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ପ୍ରଭାତ କୁମାର ସାହୁ ଖୋଳା ଯାଉଥିବା କାଣୀ ପାଟନାଳି ବନ୍ଧ ଓ ଜମି ବୁଲି ଦେଖିଥିଲେ। ପୂର୍ବରୁ ଏ ସଂକ୍ରାନ୍ତରେ ସୂଚନା ପାଇ ମାଟି ମାଫିଆ ଜେସିବି, ହାଇୱ୍ବା ଓ ଟ୍ରକ ସେଠାରୁ ନେଇ ଯାଇଥିଲେ। ହେଲେ ବୁଧବାରଠାରୁ ପୁଣି ଥରେ ମାଟିଖୋଳା ଆରମ୍ଭ ହୋଇଥିବା ସ୍ଥାନୀୟ ଲୋକେ କହିଛନ୍ତି।
