ମହାକାଳପଡ଼ା,୧୯ା୧୨ (ଡି.ଏନ୍.ଏ.):ଅନୁସୂଚିତ ଜନଜାତିର ବିକାଶ ପାଇଁ କେନ୍ଦ୍ର ଓ ରାଜ୍ୟ ସରକାର ବିଭିନ୍ନ ଜନକଲ୍ୟାଣ ଯୋଜନା କାର୍ଯ୍ୟକାରୀ କରିଛନ୍ତି। ସମାଜର ମୁଖ୍ୟସ୍ରୋତରେ ସାମିଲ କରିବାକୁ ସେମାନଙ୍କ ଜୀବନୀ ଶୈଳୀର ପରିବର୍ତ୍ତନ ଆଣିବା ପାଇଁ ସରକାର ଅର୍ଥ ବ୍ୟୟ କରୁଛନ୍ତି। ହେଲେ ତୃଣମୂଳ ସ୍ତରରେ ଜନଜାତିଙ୍କ ପାଇଁ ସରକାରଙ୍କ ଯୋଜନା ସତେ ଯେମିତି ଅଟକି ଯାଇଛି। ଏଭଳି ଏକ ଦୃଶ୍ୟ ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଧୀନ ପେଟଛେଲା ପଞ୍ଚାୟତ ଶବରପଡ଼ା ଗାଁର ଶାନ୍ତି ଆହାଡି (୪୨)ଙ୍କ କ୍ଷେତ୍ରରେ। ସ୍ବାମୀ ଗୁନାଙ୍କ ମୃତ୍ୟୁ ପରେ ଶାନ୍ତିଙ୍କ ମୁଣ୍ତରେ ପଡ଼ିଛି ଚଡ଼କ। ସରକାରୀ ଜମିରେ ଦୀର୍ଘବର୍ଷ ହେବ ବସବାସ କରୁଛନ୍ତି। ସ୍ବାମୀଙ୍କ ମୃତ୍ୟୁ ପରେ ବିଧବା ଭତ୍ତା ମିଳିଥିଲେ ମଧ୍ୟ ତାହା ପରିବାର ଚଳାଇବା ସମ୍ଭବ ନୁହେଁ ବୋଲି ସେ କହିଛନ୍ତି। ଅପରପକ୍ଷରେ ପେଟ ଚାଖଣ୍ଡେ ପାଇଁ ଶାନ୍ତିଙ୍କ ୭ବର୍ଷର ଶିଶୁ ପୁତ୍ରକୁ ସାଙ୍ଗରେ ଧରି ଏ ଦୁଆର ସେ ଦୁଆର ଘୂରି ବୁଲୁଛନ୍ତି। ମାଗିଯାଚି ଯାହା ମିଳେ ମା’ ପୁଅ ଖାଇଥାନ୍ତି। ନ ମିଳିଲେ ଭୋକ ଉପାସରେ ପାଣି ପିଇ ରହିବାକୁ ପଡେ ବୋଲି ସେ କହିଛନ୍ତି। ବ୍ଲକରେ ଅନେକ ପ୍ରଭାବଶାଳୀ ବ୍ୟକ୍ତି ଚଞ୍ଚକତା କରି ଖାଦ୍ୟ ସୁରକ୍ଷା ଓ ପକ୍କା ଘର ଯୋଜନାରେ ନିଜ ନାମ ପଞ୍ଜୀକୃତ କରି ସରକାରୀ ଯୋଜନାର ଫାଇଦା ଉଠାଇଥିବା ବେଳେ ଶାନ୍ତିଙ୍କ ପାଇଁ ସାତସପନ ପାଲଟିଛି। ବର୍ଷା ହେଉକି ବତାସ ସଞ୍ଜ ନଇଁଲେ ଆଶ୍ରା ଖୋଜନ୍ତି ଶାନ୍ତି କେଉଁଟି ଟିକେ ମୁଣ୍ଡ ଗୁଞ୍ଜିବାକୁ। ଅର୍ଥ ଅଭାବରୁ ପୁତ୍ର ରାଜେଶ ବିଦ୍ୟାଳୟ ମାଟି ମାଡ଼ି ପାରିନାହାନ୍ତି। ଶୀତ ବସ୍ତ୍ର ନ ଥିବାରୁ ଏହି ପରିବାର ଅଖା ଘୋଡ଼େଇ ହୋଇ ରାତି କାଟୁଛନ୍ତି। ଏହି ପରିବାରକୁ ଆବାସ ଯୋଜନାରେ ଅନ୍ତର୍ଭୁକ୍ତ ଓ ଖାଦ୍ୟ ସୁରକ୍ଷା ଯୋଜନାର ରାଶନ ସାମଗ୍ରୀ ଯୋଗାଇ ଦେବା ସହ ବସୁନ୍ଧରା ଯୋଜନାରେ ଘର ଡିହ ପଟ୍ଟା ଯୋଗାଇ ଦେବାକୁ ସାମାଜିକ କର୍ମୀ ସୁବାସ ସ୍ବାଇଁ ଦାବି କରିଛନ୍ତି। ଏ ସମ୍ପର୍କରେ କେନ୍ଦ୍ରାପଡ଼ା ଜିଲାପାଳ ଅମୃତ ଋତୁରାଜଙ୍କୁ ପଚାରିବାରେ ଏହି ପରିବାର ସମ୍ପର୍କରେ ତଦନ୍ତ କରାଯିବା ପରେ ସରକାରୀ ଯୋଜନାରେ ସାମିଲ କରାଯିବ ବୋଲି କହିଛନ୍ତି।
